(រាជធានីភ្នំពេញ)៖ នាព្រឹកថ្ងៃទី២៦ ខែធ្នូ ឆ្នាំ២០២៣ អគ្គនាយកដ្ឋាន ក.ប.ប. បានរៀបចំកិច្ចប្រជុំបូកសរុបការងារប្រចាំខែធ្នូ ឆ្នាំ២០២៣ និងលើកទិសដៅការងារអនុវត្តបន្ត ក្រោមអធិបតីភាពដ៏ខ្ពង់ខ្ពស់ លោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក ក.ប.ប.។
កិច្ចប្រជុំនេះក៏មាន ការអញ្ជើញចូលរួមពី លោក លោកស្រី ជាអគ្គនាយករង ប្រធាននាយកដ្ឋាន និងប្រធានសាខា ក.ប.ប. រាជធានី ខេត្ត។
ថ្លែងក្នុងឱកាសនេះផងដែរ លោក ផាន អូន បាន លើកឡើងអំពីសមិទ្ធផលដែលអគ្គនាយកដ្ឋាន ក.ប.ប. សម្រេចបានក្នុងរយៈពេលមួយឆ្នាំកន្លងមកនេះ ក៏ដូចជាបានកោតសរសើរដល់កិច្ចខិតខំប្រឹងប្រែងរបស់មន្ត្រីគ្រប់លំដាប់ថ្នាក់នៃអគ្គនាយកដ្ឋាន ក.ប.ប. ដែលបានខិតខំប្រឹងប្រែងបំពេញភារកិច្ចប្រកបដោយការទទួលខុសត្រូវរហូតសម្រេចបានលទ្ធផលជូនអគ្គនាយកដ្ឋានដូចថ្ងៃនេះ។
លោកអគ្គនាយកក៏បានបន្តផ្ដល់អនុសាសន៍ណែនាំផងដែរថា សូមមន្ត្រីទាំងអស់បន្តកិច្ចខិតខំប្រឹងប្រែងក្នុងឆ្នាំថ្មីនេះ ដើម្បីទទួលបានលទ្ធផលការងារជាបន្តបន្ទាប់ជូនជាតិ។
