ខេត្តកណ្ដាល៖ លោក រស់ ភីរុណ អគ្គលេខាធិការគណៈកម្មការគ្រប់គ្រងល្បែងពាណិជ្ជកម្ម (គ.ល.ក) បានណែនាំដល់អាជ្ញាធរខេត្តកណ្ដាល ពិសេសកងកម្លាំងមានសមត្ថកិច្ច ដែលមានតួនាទីបង្ក្រាបល្បែងស៊ីសងខុសច្បាប់ក្នុងមូលដ្ឋានខេត្តកណ្ដាល មិនត្រូវមានការសង្ស័យក្នុងការបង្ក្រាបល្បែងផ្សងសំ ណាងនានា នៅក្នុងភូមិសាស្ត្រខេត្តកណ្ដាល ព្រោះគណៈកម្មការគ្រប់គ្រងល្បែងពាណិ ជ្ជកម្ម (គ.ល.ក)ចេញអាជ្ញាប័ណ្ណឱ្យក្រុមហ៊ុនចំនួន៤ទីតាំងប៉ុណ្ណោះនៅក្នុងភូមិសាស្ត្រខេត្តកណ្ដាលទាំងមូល។
លោក រស់ ភីរុណ អគ្គលេខាធិការគណៈកម្មការគ្រប់គ្រងល្បែងពាណិជ្ជកម្ម (គ.ល.ក)បានណែនាំបែបនេះក្នុងឱកាស លោកអញ្ជើញជាអធិបតី តំណាង អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធាន គ.ល.ក ក្នុងកិច្ចប្រជុំពិភាក្សាស្តីពីការគ្រប់គ្រងល្បែងផ្សងសំណាង និងគ្រប់គ្រងផលប៉ះពាល់ពីល្បែងស៊ីសងខុសច្បាប់គ្រប់ប្រភេទ នៅខេត្តកណ្ដាល នាព្រឹកថ្ងៃទី២៦ ខែមីនា ឆ្នាំ២០២៤។
កម្មវិធីនេះ ដោយមានការចូលរួមពីសំណាក់ លោក គង់ សោភ័ណ្ឌ អភិបាល នៃគណៈអភិបាលខេត្តកណ្ដាល,លោក ឡោក ហ៊ួរ អនុប្រធានគណៈកម្មការទី២នៃរដ្ឋសភា, លោក អាំង សំបូរ សមាជិកកម្មការទី២នៃរដ្ឋសភា និងមានការអញ្ជើញចូលរួមពីថ្នាក់ដឹកនាំខេត្ត កងកម្លាំងទាំងបី, អភិបាលក្រុង-ស្រុក មន្ទីរអង្គភាពជុំវិញខេត្ត អាជីវករ និងអ្នកពាក់ព័ន្ធមួយចំនួនចូលរួមផងដែរ។
លោក រស់ ភីរុណ អគ្គលេខាធិការគណៈកម្មការគ្រប់គ្រងល្បែងពាណិជ្ជកម្ម (គ.ល.ក)បានថ្លែងថា គណៈកម្មការគ្រប់គ្រងល្បែងពាណិជ្ជកម្ម (គ.ល.ក)បានចេញអាជ្ញាប័ណ្ណឱ្យក្រុមហ៊ុនចំនួន៤ ទីតាំង រួមមាន៖
1- ក្រុមហ៊ុន ដំរីមាស ឯ.ក ដែលមានអាសយដ្ឋានផ្ទះលេខបេ ៩២៨ ផ្លូវមេត្រី១៤ (បុរីមនោរម្យ ព្រែកតាទែន) ភូមិស្នែងដីដុះ ឃុំព្រែកតាទែន ស្រុកពញាឮ។
2- ក្រុមហ៊ុន ម៉ូឌែន ឡូតធើរី ឯ.ក មានអាសយដ្ឋានផ្ទះលេខ១២៦J (បុរីវិមានភ្នំពេញ)ផ្លូវលេខ២៤ ភូមិ ក្រោម ឃុំព្រែកអញ្ចាញ ស្រុកមុខកំពូល។
3- ក្រុមហ៊ុន ឆ្នោតខ្មែរ មានអាសយដ្ឋានផ្ទះលេខ៣៧៣ ផ្លូវលេខ២០៥ ភូមិតាខ្មៅ សង្កាត់តាខ្មៅ ក្រុង តាខ្មៅ។
4- ក្រុមហ៊ុន លាភមហាសម្បត្តិ ឡូតូ ឯ.ក ដែលមានអាសយដ្ឋានផ្ទះលេខ៥៦-៤៨ ផ្លូវលេខA09 ភូមិព្រែកសំរោង សង្កាត់តាខ្មៅ ក្រុងតាខ្មៅ។
លោកអគ្គលេខាធិការ(គ.ល.ក) បន្ថែមថា ក្នុងករណីមានល្បែងផ្សងសំណាង ខុសទីតាំងចំនួន៤ នៅក្នុងភូមិសាស្ត្រខេត្តកណ្ដាលខាងលើ ត្រូវបង្ក្រាបឱ្យបានទាន់ពេលវេលា និងមិនត្រូវមានការសង្ស័យថាទីតាំងទាំងនោះមានអាជ្ញាប័ណ្ណត្រឹមត្រូវឡើង។
ចំណែក លោក គង់ សោភ័ណ្ឌ អភិបាល នៃគណៈអភិបាលខេត្តកណ្ដាល បានបញ្ជាក់អំពីល្បែងស៊ីសងខុសច្បាប់ បើមាននៅខេត្តកណ្ដាលលោកនឹងដាក់ដាក់បទបញ្ជាដាច់ខាតថា បើល្បែង ស៊ីសងខុសច្បាប់នោះ បានកើតឡើងនៅក្រុង-ស្រុកណាត្រូវឱ្យអាជ្ញាធរ និងកម្លាំងសមត្ថកិច្ច ក្រុង ស្រុក ចុះបង្ក្រាបបទល្មើសល្បែងស៊ីសងខុសច្បាប់នេះជាបន្ទាន់ ហើយបើកើតមាននៅក្រុង-ស្រុក ណាមួយ អភិបាលក្រុង-ស្រុក និងកងកម្លាំងសមត្ថកិច្ច ត្រូវរឹតបន្តឹង បើករណីនេះនៅតែមានកើតឡើងនៅដែនសមត្ថកិច្ចខ្លួនទទួលខុសត្រូវ។
មន្រ្តីជំនាញ របស់គណៈកម្មការគ្រប់គ្រងល្បែងពាណិជ្ជកម្ម បានឡើងធ្វើបទបង្ហាញ និងពន្យល់អំពីច្បាប់គ្រប់គ្រងល្បែងស៊ីសងមានច្បាប់ និងអត់ច្បាប់ផងដែរ។
