ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជួបសម្តែងការគួរសម និងជម្រាបលារបស់លោក Ivo Sieber ឯកអគ្គរដ្ឋទូតសហព័ន្ធស្វីសនៅរសៀលថ្ងៃទី៦ ខែមិថុនា ឆ្នាំ២០១៩ នៅទីស្តីការក្រសួងមហាផ្ទៃ សម្តេចក្រឡាហោម ស ខេង បានសូមអរគុណដល់រដ្ឋាភិបាលស្វីស នៅតែបន្តគាំទ្រដល់មន្ទីរពេទ្យគន្ធបុប្ផា ដែលជាមន្ទីរពេទ្យមួយដែលមានសារសំខាន់សម្រាប់កុមារកម្ពុជា។
លោក Ivo Sieber ឯកអគ្គរដ្ឋទូតសហព័ន្ធស្វីស បានកោតសរសើរគំនិតផ្តួចផ្តើមរបស់រដ្ឋាភិបាលកម្ពុជា ក្នុងការបង្កើតនូវមូលនិធិ ដើម្បីគាំទ្រ ទៅដល់ដំណើររបស់មន្ទីរពេទ្យគន្ធបុប្ផា។ ហើយរដ្ឋាភិបាលស្វីសនៅតែខិតខំបន្តកៀរគរប្រភពគាំទ្រពីឯកជន និងផ្នែកពាក់ព័ន្ធផ្សេងៗ ដើម្បីទ្រទ្រង់ដល់ដំណើរការ នៃមន្ទីរពេទ្យគន្ធបុប្ផានេះ។
សម្តេចក្រឡាហោម ស ខេង បានវាយតម្លៃខ្ពស់និងការរីកចម្រើន និងការអភិវឌ្ឍន៍ របស់ប្រទេសស្វីស ហើយសម្តេចក៏សូមអរគុណចំពោះរដ្ឋាភិបាលស្វីសដែលធ្លាប់បានជួយគាំទ្រដល់កំណែទម្រង់វិមជ្ឈការ និងវិសហមជ្ឈការនៅកម្ពុជា។ ហើយបច្ចុប្បន្ននេះក៏មានគម្រោងមួយចំនួនដែរ ដែលស្វីសកំពុងបន្តគាំទ្រ តាមរយៈធនាគារពិភពលោក។ ហើយសម្តេចក៏បានសង្កត់ធ្ងន់ថា របៀបវារៈក្នុងការកំណែទម្រង់នេះ គឺជាកិច្ចការមួយក៏មានសារៈសំខាន់ និងជាប្រវត្តិសាស្ត្រសម្រាប់ព្រះរាជាណាចក្រកម្ពុជា។ ហើយបច្ចុប្បន្នរាជរដ្ឋាភិបាលកំពុងខិតខំផ្ទេរអំណាចទៅដល់ថ្នាក់ក្រោមជាតិដើម្បីជំរុញធ្វើយ៉ាងណាដើម្បីអោយកំណែទម្រង់ថ្នាក់ក្រោមជាតិមានវិវត្តរីកចម្រើនទៅមុខជាលំដាប់។
សម្តេចក្រឡាហោម បានបញ្ជាក់ថា ក្រសួងមហាផ្ទៃនឹងបន្តអនុវត្តទៅតាមអ្វីដែលបានសម្រេច គឺការបង្កើតនូវវេទិការ ភាពជាដៃគូរវាងរដ្ឋាភិបាលនិងអង្គការសង្គមស៊ីវិល ដែលបានកំណត់ក្នុងមួយឆ្នាំមានជំនួប២ដង ដើម្បីខិតខំធ្វើយ៉ាងណាឱ្យមានសុខដុមនីកម្មនៅក្នុងការងាររវាងរដ្ឋាភិបាលនិងអង្គការសង្គមស៊ីវិល ៕
