ខេត្តក្រចេះ៖ ចាប់ពីថ្ងៃទី១៥-១៦ ខែកក្កដា ឆ្នាំ២០២៦ ខណ្ឌរដ្ឋបាលជលផលក្រចេះ និងក្រុមឆ្មាំទន្លេតំបន់កាំពី-ជ្រោយបន្ទាយ សហការជាមួយកម្លាំងនគរបាលប៉ុស្តិ៍រដ្ឋបាលថ្មគ្រែ និងសហគមន៍នេសាទសំបុក បានចុះល្បាតត្រួតពិនិត្យ និងបង្ក្រាបបទល្មើសនេសាទតាមដងទន្លេមេគង្គ ក្នុងកន្លែងគ្រប់គ្រង និងការពារសត្វផ្សោត អន្លង់កាំពី ជ្រោយបន្ទាយ វឌ្ឍនៈ សន្តាន់ និងបឹងចារ លើយន្តការ ២៤ម៉ោងលើ២៤ម៉ោង។
ជាលទ្ធផលនៃការបង្ក្រាប បានដកហូតមងពាក់ចំនួន ២ត្បូង ប្រវែង ៤០ម៉ែត្រ ក្រលា ១៥សង់ទីម៉ែត្រ នៅចំណុចកោះព្រហ្មចារីយ៍ ឃុំជ្រោយបន្ទាយ។
ជាមួយគ្នានោះដែរ ក្រៅពីតំបន់អភិរក្សផ្សោតមន្ត្រីខណ្ឌរដ្ឋបាលបានសហការជាមួយក្រុមប្រឹក្សាសង្កាត់រកាកណ្តាល កម្លាំងនគរបាលប៉ុស្តិ៍រដ្ឋបាលរកាកណ្តាល ក្រុងក្រចេះ ដោយមានការចូលរួមពីប្រជាការពារភូមិ និងសហគមន៍នេសាទ ចុះបង្ក្រាបបទល្មើសនៅចំណុចបឹងរំលាច ក្រុងក្រចេះ ដែលទទួលបានលទ្ធផលរួមមាន៖ បានរុះរើ និងបំផ្លាញចោលឧបករណ៍នេសាទល្មើសច្បាប់ របាំងស្បៃមុងចំនួន ៩ខ្សែ ប្រវែង ៤៥០ម៉ែត្រ, លូស្បៃមុងចំនួន ៣មាត់, បង្គោលឫស្សី ៧៥ដើម និងបានចាក់លែងត្រីចម្រុះចូលបឹងធម្មជាតិវិញចំនួន ២៥គីឡូក្រាម៕
