អគារកម្ពស់ ៦ជាន់ នៅក្បែរវត្តសម្មាធិ ខេត្តកែប បានបាក់សង្កត់លើកម្មករ ដែលកំពុងតែធ្វើការនៅក្នុងអគារនៃការដ្ឋានសំណង់ផ្ទះសំណាក់នោះហើយតាមក្រុមមន្ត្រីនិយាយថា ការបាក់អគារនេះគឺបានកើតឡើងនៅមុននេះបន្តិច។
សេចក្តីរាយការណ៍ឲ្យដឹងថា មនុស្សប្រមាណ ៤០នាក់កំពុងតែស្ថិតនៅក្នុងអគារបាក់នោះ និងមនុស្សពីរនាដែលរងរបួសបានចេញមកខាងក្រៅនៃអគារដែលបាក់នោះហើយ។
នាយឧត្តមសេនីយ៍គន់គីម អនុប្រធានគណៈកម្មាធិការ គ្រោះមហន្តរាយនិងក្រុមជួយសង្គ្រោះបានធ្វើដំណើរពីភ្នំពេញទៅកាន់ទីកន្លែងកើតហេតុនោះហើយ។
ចំណែកលោក អភិបាលខេត្តកែបលើកឡើងថា យ៉ាងហោចណាស់មានមនុស្សជាង ២០ នាក់ កំពុងជាប់ក្នុងគំនរអគារហើយមកដល់ពេលនេះសមត្ថកិច្ចបានជួយសង្គ្រោះមនុស្សចំនួន ៧ នាក់ដែលរបួសធ្ងន់ចេញពីអគារដែលបាក់ក៏ប៉ុន្តែរកមិនទាន់ឃើញអ្នកដែលស្លាប់នៅឡើយទេ។
កម្មករដែលស្នាក់នៅ ក្នុងអគារដែលបាក់នោះ មានចំនួន ៤០ នាក់។ ករណីបាក់អគារនេះ កើតឡើងនៅវេលាម៉ោង ៤:៣៧ រសៀល ថ្ងៃទី៣ ខែមករា នៅភូមិកែប សង្កាត់កែប ក្រុងកែប ខេត្តកែប៕
