សួនច្បារចាប់ពីរង្វង់មូលស្រុកជើងព្រៃ រហូតដល់ស្រុកបាធាយ ក្នុងខេត្តកំពង់ចាម ចាប់ផ្ដើមលូតលាស់ស្រស់បំព្រងជាបណ្ដើរៗ

February 24, 2020 by daily-khmer

(កំពង់ចាម)៖ ដោយមានការយកចិត្តទុកដាក់ពីឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម សួនច្បារនៅបណ្តោយផ្លូវជាតិលេខ៦អា ចាប់ពីរង្វង់មូលស្រុកជើងព្រៃ រហូតដល់ស្រុកបាធាយ ខេត្តកំពង់ចាម មានចំងាយប្រមាណ៣០គីឡូម៉ែត្រ បានដំណើរការស្រោចទឹក ចាប់ពីថ្ងៃទី២៧ ខែមករា ឆ្នាំ២០២០ ដើម្បីការពារកុំឲ្យដើមឈើ និងស្មៅដំលម្អផ្លូវងាប់តទៅទៀត។

ឯកឧត្តមអភិបាលខេត្តបានចាត់តាំងឲ្យឯកឧត្តម កែវ នាឫទ្ធិ អភិបាលរងខេត្តកំពង់ចាម ជាប្រធានគណៈកម្មាការត្រួតពិនិត្យ និងលោក សំ ពិសិដ្ឋ អនុប្រធានរដ្ឋបាលសាលាខេត្តកំពង់ចាម ធ្វើជាអនុប្រធាននៃគណៈកម្មការនេះ ដើម្បីដឹកនាំការងារថែទាំ ដាំដើមឈើ និងដាំស្មៅឡើងវិញ។

សួនច្បារខាងលើនេះ ក្រោយពេលប្រគល់មកឲ្យស្ថិតនៅក្រោមសមត្ថកិច្ចរបស់សាលាខេត្តកំពង់ចាម ដើមឈើ និងស្មៅ ចាប់ផ្តើមលូតលាស់ និងចេញផ្កាស្រស់បំព្រងជាបណ្ដើរៗ បន្ទាប់ពីសាលាខេត្ត និងមន្ទីរសារធារណៈការខេត្ត សហការណ៍ជាមួយកម្លាំងរបស់សាលាស្រុកទាំងពីរខាងលើនេះ ដឹកទឹកស្រោចជាររៀងរាល់ថ្ងៃ និងជាទៀងទាត់។

លោក សំ ពីសិដ្ឋ បានប្រាប Swift News នៅព្រឹកថ្ងៃទី២៣ ខែកុម្ភៈ ឆ្នាំ២០២០នេះ គណៈកម្មការ បានមនុស្ស៥នាក់ មានអ្នកបើកបរ៣នាក់ និងកម្មករ២នាក់ ដើម្បីដឹកទឹកមកស្រោចស្រពដំណាំ ដាំលម្អផ្លូវនេះជាប្រចាំ។

ចំណែកលោក អ៊ូត ឈាងលី ភិបាលស្រុកជើងព្រៃ បានមានប្រសាសន៍រៀបរាប់ថា បន្ទាប់ពីអាជ្ញាធរបានឲ្យឡានទឹកស្រោចទឹកលើសួនច្បារ ដែលប្រើរយៈពេលបីថ្ងៃនោះ លោកសង្កេតឃើញថា ដើមឈើ ដើមផ្កា និងស្មៅ ដែលក្រៀមស្វិតនៅក្នុងសួនច្បារប្រែមកលូតលាស់មានស្លឹក និងចេញផ្កាជាបណ្ដើរៗហើយ។

ដោយមានការសហការគ្នាយ៉ាងល្អ ដើម្បីថែរក្សាសោភណ្ឌភាពសួនច្បារ រវាងរដ្ឋបាលខេត្តកំពង់ចាម និងស្រុកទាំពីរ លោក លី ប៊ុនស៊ន អភិបាលរងស្រុកបាធាយ បានលើកឡើងថា រដ្ឋបាលស្រុកបាធាយ បានតាមដានយ៉ាងម៉ងចត់ចំពោះឡានស្រោចទឹកនៅតាមសួនច្បារជារៀងរាល់ថ្ងៃ ដើម្បីឲ្យធ្វើយ៉ាងណាឲ្យសួនច្បារខាងលើមានមានសោភណ្ឌភាពស្រស់បព្រង៕