(ភ្នំពេញ)៖ លោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារនៃក្រសួងសេដ្ឋកិច្ចនិងហិររញ្ញវត្ថុបានសរសេរលិខិតពីរច្បាប់ចុះថ្ងៃទី២៥ ខែមីនានេះទៅឧកញ៉ា២ រូប ដែលរងការចោទថា ជំពាក់បំណុលរបស់រដ្ឋ ហើយរហូតមកដល់ពេលនេះមិនទាន់មកទូទាត់នៅឡើយទេ។
លោកឧកញ៉ាល្បីឈ្មោះនៅកម្ពុជាខាងលើទី១ គឺ លោកឧកញ៉ា ស្រី វុទ្ធី នាយកក្រុមហ៊ុន ងួន វុទ្ធី ត្រេឌីង ឌីវើឡូបមិន ខបផូរ៉េហ្សិន និងទី២ លោកឧកញ៉ា សូ ងួន នាយក្រុមហ៊ុន សូ ងួន ដឹកជញ្ជូននិងសេវាអាហរ័ណនីហរ័ណ ក្នុងកម្មវត្ថុ ដូចគ្នាគឺ «អញ្ជើញក្រុមហ៊ុនទាំងពីរនេះ មកទូទាត់បំណុលពន្ធ ដែលជំពាក់រដ្ឋ»។
លិខិតលោក គង់ វិបុលសង្គត់ធ្ងន់ថា« ការបង់ពន្ធអាករ គឺជាកាតព្វកិច្ចរបស់អ្នកជាប់ពន្ធគ្រប់រូប ដើម្បីរួមចំណែកក្នុងថវិកាជាតិ។ កន្លងមកអគ្គនាយកដ្ឋានពន្ធដារបានអញ្ជើញឧកញ៉ានាយកក្រុមហ៊ុន ដើម្បីដោះស្រាយបំណុលពន្ធរបស់ក្រុមហ៊ុន តាមរយៈលិខិតអញ្ជើញ ជូនដល់អាសយដ្ឋានក្រុមហ៊ុន ដែលបានចុះបញ្ជីនៅរដ្ឋបាលសារពើពន្ធ ប៉ុន្តែឧកញ៉ានាយកមិនបានមកតាមការអញ្ជើញនិងមិនបានទូទាត់បំណុលពន្ធឡើយ»។
អគ្គនាយកដ្ឋានពន្ធដារបានកំណត់ឲ្យលោកឧកញ៉ា សូ ងួន និងលោកឧកញ៉ា ស្រី វុទ្ធី មកអគ្គនាយកដ្ឋានពន្ធដារ មិនឲ្យលើសពី១៥ថ្ងៃ បន្ទាប់ពីកាលបរិច្ឆេទលើលិខិតអញ្ជើញ ក្នុងទំព័រសារព័ត៌មាននេះ( ថ្ងៃទី២៥ ខែមីនា ឆ្នាំ២០២០ )ដើម្បីដោះស្រាយបំណុលពន្ធរដ្ឋ។
ពាក់ព័ន្ធនិងករណីនេះ Daily-Khmer ពុំទាន់បានសុំការពន្យល់ពីឧកញ៉ាល្បីឈ្មោះទាំងពីរខាងលើបាននៅឡើយទេ នៅថ្ងៃទី២៧ ខែមីនានេះ។ ប៉ុន្តែយើងតាមលិខិតរបស់ពន្ធដារក្នុងករណីមិនបានអញ្ជើញមកតាមកាលកំណត់ខាងលើនេះទេ «ឧកញ៉ានាយកត្រូវចាត់ទុកថា បានប្រព្រឹត្តបទល្មើសព្រហ្មទណ្ឌលើបទប្បញ្ញត្តិស្តីពីពន្ធដារដូចមានចែងក្នុងមាត្រា ១២៧ ១៣៥ និងមាត្រា១៣៦នៃច្បាប់ស្តីពីសារពើពន្ធ។
ហេតុដូច្នោះហើយអគ្គនាយកដ្ឋានពន្ធដារនឹងចាត់វិធានការតាមផ្លូវច្បាប់ ប្តឹងទៅតុលាការផ្តន្ទាទោសតាមច្បាប់ជាធរមាន ដោយរាល់ការចំណាយជាបន្ទុករបស់ឧកញ៉ា ជាម្ចាស់ក្រុមហ៊ុន»៕
