វត្តមាននៃការអញ្ជើញមកទទួលគារវកិច្ច សម្តេចតេជោនាយករដ្ឋមន្ត្រី រួមមានថ្នាក់ដឹកនាំ និងមន្ត្រីជាន់ខ្ពស់នៃសាធារណរដ្ឋប្រជាមានិតចិនសំខាន់ៗជាច្រើនរូប និងមន្ត្រីទូតរបស់កម្ពុជាប្រចាំនៅប្រទេសចិន។
កំឡុងពេលទស្សនកិច្ចនេះ សម្តេចតេជោនាយករដ្ឋមន្ត្រី នឹងជួបពិភាក្សាការងារជាមួយប្រមុខដឹកនាំសំខាន់ៗ របស់ប្រទេសចិនរួមមាន លោក ស៊ី ជីនភីង (Xi Jinping) ប្រធានាធិបតីចិន លោក លី ចាន់ស៊ូ (Li Zhanshu) ប្រធានគណៈកម្មាធិការអចិន្ត្រៃយ៍នៃសភាប្រជាជនចិន លោក វ៉ាង យ៉ាង (Wang Yang) ប្រធានសភាប្រឹក្សានយោបាយចិន និងជួបពិភាក្សាទ្វេភាគីជាមួយ លោក លី ខឺឈាង (Li Keqiang) នាយករដ្ឋមន្ត្រីចិន និងប្រមុខដឹកនាំ និងធុរកិច្ចជន ចិនជាច្រើនរូបទៀត។
ការជួបពិភាក្សា នឹងផ្តោតទៅលើការពង្រឹង និងពង្រីកបន្ថែមទៀតនូវកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងកម្ពុជា និងចិន ដើម្បីផលប្រយោជន៍នៃប្រជាជាតិទាំងពីរ។
តាមកម្មវិធីថ្ងៃនេះ សម្ដេចអគ្គមហាសេនាបតីតេជោ ហ៊ុន សែន នឹងជួបសំណេះសំណាល ជាមួយនិស្សិតកម្ពុជា កំពុងសិក្សានៅប្រទេសចិនផងដែរ។
សូមបន្ថែមថា សម្តេចតេជោ ហ៊ុន សែន បានដឹកនាំគណៈប្រតិភូជាមន្ត្រីជាន់ខ្ពស់រាជរដ្ឋាភិបាល និងអ្នកវិនិយោគកម្ពុជាជាច្រើនរូប ចាកចេញពីកម្ពុជា កាលពីម៉ោង ៩ព្រឹកថ្ងៃអាទិត្យ ទី២០ ខែមករា ឆ្នាំ២០១៩ ដើម្បីទៅបំពេញទស្សនកិច្ចផ្លូវការ នៅប្រទេសចិន ចាប់ពីថ្ងៃទី២០-២៣ ខែមករា ឆ្នាំ២០១៩៕
