(រាជធានីភ្នំពេញ)៖អគ្គនាយកដ្ឋានការពរអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» ដឹកនាំដោយលោក បានរៀបចំកិច្ចប្រជុំថ្នាក់ដឹកនាំ ដោយ លោក ផាន អូន ដឹកនាំប្រជុំ ដើម្បីពិនិត្យ និងពិភាក្សាលើការងារចម្បងមួយចំនូន ដឺករៀបចំឡើងនៅថ្ងៃទី០២ ខែវិច្ឆិកា ឆ្នាំ២០២០។
កិច្ចប្រជុំមានការចូលរួមពី លោក អគ្គនាយករង លោកប្រធាននាយកដ្ឋាន និងលោក លោកស្រី អនុប្រធាននាយកដ្ឋាន។ ដោយឡែកថ្មីៗនេះ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃក្រសួងពាណិជ្ជកម្ម បើកយុទ្ធនាការផ្សព្វផ្សាយច្បាប់ និងលិខិតបទដ្ឋានគតិយុត្តពាក់ព័ន្ធនឹងការធ្វើធុរកិច្ចប្រេងឥន្ធនៈនៅតាមបណ្តារាជធានី-ខេត្ត។
បន្ទាប់ពីច្បាប់ស្តីពីការគ្រប់គ្រងគុណភាព សុវត្ថិភាព លើផលិតផល ទំនិញ និងសេវា ត្រូវបានប្រកាសឱ្យប្រើកាលពីថ្ងៃទី២៦ ខែមិថុនា ឆ្នាំ២០០០ រួចមក ច្បាប់ស្តីពីកិច្ចការពារអ្នកប្រើប្រាស់ ត្រូវបានប្រកាសឱ្យប្រើតាមរយៈព្រះរាជក្រមលេខនស/រកម/១១១៩/០១៦ ចុះថ្ងៃទី២ ខែវិច្ឆិកា ឆ្នាំ២០១៩។
ជាមួយគ្នានោះគណៈកម្មាធិការជាតិការពារអ្នកប្រើប្រាស់ ត្រូវបានបង្កើតឡើងតាមរយៈអនុក្រឹត្យលេខ ១៣៥ អនក្រ.បក ចុះថ្ងៃទី២៧ ខែសីហា ឆ្នាំ២០២០ ដើម្បីបំពេញភារកិច្ចនានាពាក់ព័ន្ធនឹងកិច្ចការពារអ្នកប្រើប្រាស់ ស្របតាមបញ្ញត្តិនៃច្បាប់នេះ។
អគ្គនាយកដ្ឋាន ក.ប.ប. ត្រូវបានផ្តល់អាណត្តិដោយច្បាប់ឱ្យធ្វើជាសេនាធិការរបស់គណៈកម្មាធិការជាតិការពារអ្នកប្រើប្រាស់ និងត្រូវបានផ្តល់នីតិសម្បទាជានគរបាលយុត្តិធម៌ ស្ថិតក្រោមច្បាប់ទាំងពីរខាងលើ។
ក្នុងគោលបំណងជំរុញឱ្យការអនុវត្តច្បាប់ និងលិខិតបទដ្ឋានគតិយុត្តនានានៅកម្ពុជាប្រកបដោយប្រសិទ្ធភាព និងប្រសិទ្ធផល ផ្តល់នូវទំនុកចិត្តនិងការពារផលប្រយោជន៍របស់អ្នកប្រើប្រាស់ ជំរុញឱ្យការធ្វើពាណិជ្ជកម្ម ប្រព្រឹត្តទៅប្រកបដោយទទួលបានភាពយុត្តិធម៌ក្នុងការប្រកួតប្រជែង។
មន្ត្រីអគ្គនាយកដ្ឋាន ក.ប.ប. បានបើកយុទ្ធនាការផ្សព្វផ្សាយខ្លឹមសារច្បាប់ និងលិខិតបទដ្ឋាន គតិយុត្តនានាពាក់ព័ន្ធនឹងប្រេងឥន្ធនៈ ដល់ភាគីពាក់ព័ន្ធ ដើម្បីឱ្យទទួលបាននូវព័ត៌មាន និងចំណេះដឹងពីច្បាប់ និងលិខិតបទដ្ឋានគតិយុត្តនានា ដល់ម្ចាស់ស្ថានីយនិងដេប៉ូចែកចាយប្រេងឥន្ធនៈទាំងអស់នៅទូទាំងប្រទេស។
សូមជម្រាបជូនផងដែរថា កន្លងមកអគ្គនាយកដ្ឋានក.ប.ប បានផ្សព្វផ្សាយនូវខ្សែវីដេអូអប់រំអំពីសុវត្ថិភាពម្ហូបអាហារ ខ្សែវីដេអូអប់រំការយល់ដឹងអំពីការទិញទំនិញតាមប្រព័ន្ធ Online ផ្ទាំងរូបភាពអប់រំអំពីសុវត្ថិភាពម្ហូបអាហារ និងខិតប័ណ្ណអប់រំអំពីអំពើមិនសុចរិតក្នុងធុរកិច្ចពាក់ព័ន្ធនឹងប្រេងឥន្ធនៈ។
ជាមួយគ្នានោះផងដែរកាលពីថ្ងៃទី០៧ ខែសីហា ឆ្នាំ២០២០ អគ្គនាយកដ្ឋាន ក.ប.ប. បានជួបពិភាក្សាការងារ និងផ្សព្វផ្សាយការអនុវត្តន៏ច្បាប់ និងលិខិតបទដ្ឋានគតិយុត្តពាក់ព័ន្ធនឹងវិស័យប្រេងឥន្ធនៈ ដល់បណ្តាក្រុមហ៊ុនប្រេងឥន្ធនៈធំៗចំនួន ១០ រួចមកហើយ។
