ភ្នំពេញ៖ ដើម្បីចូលរួមលើកស្ទួយការប្រកួត បាល់ទាត់ពានរង្វាន់ “អន្តរអគ្គនាយកដ្ឋានក្រសួងមហាផ្ទៃ” លើកទី១ ឆ្នាំ២០២៤នេះ គឺ ប្រូវីដាជាទឹកពិសាធម្មជាតិទី១នៅកម្ពុជាបានប្រកាសក្នុងសន្នីសីតសារព័ត៌មានថា ក្រុមហ៊ុនសូមចូលរួម ឧបត្ថម្ភ និងគាំទ្រការប្រកួតបាល់ទាត់ពានរង្វាន់ជាមួយនិងក្រសួងមហាផ្ទៃ។
យោងតាមសេចក្តីជូនដំណឹងរបស់ ក្រសួងមហាផ្ទៃ បានជម្រាបជូនដំណឹងដល់ ឯកឧត្តម លោកជំទាវ ជាអគ្គស្នងការ អគ្គលេខាធិការ អគ្គនាយក អគ្គាធិការ និងថ្នាក់ប្រហាក់ប្រហែលចំណុះទាំងអស់ មេត្តាជ្រាបថា៖ ដើម្បីចូល រួមលើកកម្ពស់វិស័យកីឡា រឹតចំណងមិត្តភាព សាមគ្គីភាព និងកិច្ចសហប្រតិបត្តិការក្នុងក្របខ័ណ្ឌមន្ត្រី រាជការស៊ីវិល មន្ត្រីនគរបាលជាតិ និងមន្ត្រីពន្ធនាគារ ក្រសួងមហាផ្ទៃ នឹងរៀបចំព្រឹត្តិការណ៍ប្រកួតកីឡា បាល់ទាត់ពានរង្វាន់ “អន្តរអគ្គនាយកដ្ឋានក្រសួងមហាផ្ទៃ” លើកទី១ ឆ្នាំ២០២៤ ក្នុងអំឡុងខែមីនា ឆ្នាំ ២០២៤ខាងមុខ។
អាស្រ័យហេតុនេះ សូម ឯកឧត្តម លោកជំទាវ មេត្តារៀបចំជាក្លឹបកីឡាបាល់ទាត់នៅតាម សាមីអង្គភាពរបស់ខ្លួន ដើម្បីចុះឈ្មោះប្រកួតដណ្ដើមពានរង្វាន់ “អន្តរអគ្គនាយកដ្ឋានក្រសួងមហាផ្ទៃ” លើកទី១ ឆ្នាំ២០២៤ ឱ្យបានច្រើនកុះករ។
ហេតុដូច្នោះហើយ ដើម្បីចូលរួមប្រកួតប្រជែង សូមចុះឈ្មោះក្លឹបកីឡាបាល់ទាត់ នៅអគ្គលេខាធិការដ្ឋាន នៃក្រុមប្រឹក្សាកីឡាក្រសួងមហាផ្ទៃ ពីថ្ងៃជូនដំណឹងនេះ រហូតដល់ថ្ងៃទី១៥ ខែមករា ឆ្នាំ២០២៤។
សូម ឯកឧត្តម លោកជំទាវ ជាអគ្គស្នងការ អគ្គលេខាធិការ អគ្គនាយក អគ្គាធិការ និង ថ្នាក់ប្រហាក់ប្រហែលចំណុះក្រសួងទាំងអស់ មេត្តាជ្រាប និងចាត់ចែងតាមការគួរ៕
