រាជរដ្ឋាភិបាលកម្ពុជាបានចំណាយថវិកាជាច្រើនវិនិយោគលើហេដ្ឋារចនាសម្ព័ន្ធ ជាពិសេសហេដ្ឋារចនាសម្ព័ន្ធតភ្ជាប់ពីភ្នំពេញទៅកាន់បណ្ដាខេត្តនានាដែលប្រកបដោយសក្តានុពល ។នេះគឺជាការវិនិយោគប្រកបដោយចក្ខុវិស័យ ដែលនឹងអាចទាក់ទាញទាំងវិនិយោគិនជាតិ និងអន្តរជាតិឱ្យសម្លឹងទៅវិនិយោគនៅតាមបណ្ដាខេត្តទាំងនោះបន្ថែមពីលើរាជធានីភ្នំពេញដែលជាមេដែករួចមកហើយ។
បច្ចប្បន្នផ្លូវជាតិសំខាន់ៗដែលតភ្ជាប់ពីភ្នំពេញទៅបណ្ដាខេត្ត មានដូចជា ផ្លូវជាតិលេខ១ លេខ២ លេខ៣ លេខ៤ លេខ៥ ផ្លូវ៦ ផ្លូវលេខ១០ ផ្លូវលេខ១០ ជាដើមត្រូវបានរាជរដ្ឋាភិបាលសាងសង់ និងកែលម្អកាន់តែស្អាត បង្កើនកម្រិតគុណភាពផ្លូវដែលសម្រួលដល់ការធ្វើដំណើរកាន់តែឆាប់រហ័ស និងសុវត្ថិភាព។ចំណុចនេះដែលវិនិយោគិនទាំងឡាយចាប់អារម្មណ៍ផងដែរ ។
តាមរយៈការអភិវឌ្ឍផ្លូវជាតិសំខាន់ៗទាំងនេះបាននាំការវិនិយោគថ្មីៗទៅកាន់តំបន់តាមបណ្ដោយផ្លូវជាតិទាំងនោះ និងតំបន់តាមបណ្ដាខេត្តនានាជាច្រើនទៀត ដូចជាខេត្តស្វាយរៀង ខេត្តតាកែវ កំពង់ស្ពឺ ក្រចេះ ព្រះសីហនុ និងបណ្ដាខេត្តសក្ដានុពលមួយចំនួន ។
លោក ជា វុទ្ធី អគ្គលេខាធិការនៃគណៈកម្មាធិការវិនិយោគកម្ពុជាក្រុមប្រឹក្សាអភិវឌ្ឍន៍កម្ពុជាបានមានប្រសាសន៍ឱ្យដឹងកាលពីព្រឹកថ្ងៃទី៣១ ខែមីនាថា ហេដ្ឋារចនាសម្ព័ន្ធដែលមានលក្ខណៈល្អប្រសើរ នឹងចូលរួមចំណែកក្នុងការកាត់បន្ថយចំណាយធុរកិច្ច និងសន្សំសំចៃពេលវេលា ខណៈដែលរាជរដ្ឋាភិបាលបានវិនិយោគយ៉ាងច្រើនសន្ធាប់សន្ធាប់លើគម្រោងហេដ្ឋារចនាសម្ព័ន្ធចម្បង រួមមាន ការសាងសង់ផ្លូវល្បឿនលឿនជាពិសេសផ្លូវល្បឿនលឿនភ្នំពេញ-បាវិត ដែលគ្រោង នឹងបញ្ចប់ការសាងសង់នៅឆ្នាំ២០២៧ កំពង់ទឹកជ្រៅព្រែកជីកប្រវត្តិសាស្ត្រហ្វូណនតេជោ ,អាកាសយដ្ឋានអន្តរជាតិ និងមជ្ឈមណ្ឌលភស្តុភារកម្មជាដើម ។
លោកបន្តថា ហេដ្ឋារចនាសម្ព័ន្ធទាំងនេះ នឹងចូលរួមចំណែកដោយផ្ទាល់ ក្នុងការលើកកម្ពស់ការតភ្ជាប់ក្នុងតំបន់ព្រមទាំងធានាលទ្ធភាពក្នុងការដឹកជញ្ជូនឆ្លងកាត់តាមច្រករបៀងសេដ្ឋកិច្ចសំខាន់ៗនៅក្នុងប្រទេសកម្ពុជា និងក្នុងតំបន់ប្រកបដោយប្រសិទ្ធភាពខ្ពស់ ។
ក្នុងគោលបំណងបង្កើតបរិយាកាសធុរកិច្ចដែលឆ្លើយតបទៅនឹងតម្រូវការក្ដីកង្វល់ របស់វិនិយោគិន រាជរដ្ឋាភិបាលបានបង្កើតយន្តការនានាជាច្រើន ។ តួយ៉ាងសម្ដេចធិបតីនាយករដ្ឋមន្ត្រី បានដឹកនាំវេទិការាជរដ្ឋាភិបាល ផ្នែកឯកជនលើកទី១៩ កាលពីខែវិច្ឆិកា ឆ្នាំ២០២៣កន្លងទៅ ដើម្បីដោះស្រាយបញ្ហាប្រឈម និងក្ដីកង្វល់ដែលធុរកិច្ច និងវិនិយោគិនជួបប្រទះក្នុងប្រតិបត្តិការរបស់ខ្លួននៅកម្ពុជា ។ឯកឧត្តមបញ្ជាក់បន្ថែម។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានឱ្យដឹងថា ក្នុងរយៈពេល៣ខែ ដើមឆ្នាំ២០២៥នេះ កម្ពុជាទទួលបានគម្រោងវិនិយោគចំនួន១៧២គម្រោង ដែលមានចំនួនលើសឆ្នាំ២០២១ទាំងមូល ដែលមានត្រឹមតែ ១៦៩គម្រោង ខណៈឆ្នាំ២០២៤កន្លងទៅ គម្រោងវិនិយោគទាំងអស់ដែលក្រុមប្រឹក្សាអភិវឌ្ឍន៍កម្ពុជាបានចុះបញ្ជីមានចំនួន៤១៤គម្រោងមានទឹកប្រាក់ប្រមាណជិត៧ពាន់លានដុល្លារអាមេរិក ។
ដោយឡែកយោងតាមរបាយការណ៍បូកសរុបការងារប្រចាំឆ្នាំ២០២៤ របស់ក្រសួងសាធារណការ និងដឹកជញ្ជូន បានឱ្យដឹងថា ក្នុងឆ្នាំ២០២៤ក្រសួងសម្រេចបាន៖ ១. ការអនុវត្តកិច្ច លទ្ធកម្មទំនិញ-សំណង់ និងសេវាសម្រាប់ដំណើររដ្ឋបាលប្រចាំឆ្នាំ២០២៤ មានចំនួនសរុប ២១គម្រោង ដែលមានតម្លៃកិច្ចសន្យាសរុបចំនួន៤៦៣២លានរៀល។ ២. ការអនុវត្តកិច្ចលទ្ធ ផលកម្មការងារស្ថាបនា – ជួសជុល និងថែទាំងផ្លូវថ្នល់ឆ្នាំ២០២៤ មានចំនួនសរុប ១៧០គម្រោង ដែលមានតម្លៃកិច្ចសន្យាសរុបចំនួន៤៨៧ ៩៣៣លានរៀល និង៣.ការអនុវត្តកិច្ចលទ្ធកម្ម ។
ចំណែកការងារជួសជុលថែមទាំងផ្លូវថ្នល់ជាប្រចាំសម្រាប់ឆ្នាំ២០២៤ របស់មន្ទីសាធារណការ និងដឹកជញ្ជូនរាជធានីខេត្ត និងរបស់អង្គភាពក្រោមឱវាទក្រសួង មានទឹកប្រាក់ចំនួន ១៤៦១៨៧ លានរៀល។ ជាមួយគ្នានោះដែររបាយការណ៍ក៏បានឱ្យដឹងថាក្រសួងបាននិងកំពុងរៀបចំសេចក្តីព្រាងគោលការណ៍ណែនាំស្តីពីក្របខ័ណ្ឌតាមដាន ត្រួតពិនិត្យ និងវាយតម្លៃសមិទ្ធកម្មផែនការអាទិភាពរបស់ក្រសួង និងបានរៀបចំសិក្ខាសាលាពិគ្រោះយោបល់ជាមួយគ្រប់អង្គភាព ព្រមទាំងបាននិង កំពុងអភិវឌ្ឍន៍ប្រព័ន្ធតាមដាន ត្រួតពិនិត្យ និងវាយតម្លៃសមិទ្ធកម្មផែនការសកម្មភាពអាទិភាព របស់ក្រសួងដើម្បីគាំទ្រនិងជំរុញការអនុវត្តយុទ្ធសាស្ត្របញ្ចកោណដំណាក់កាលទី១ និងផែន ការយុទ្ធសាស្ត្រអភិវឌ្ឍន៍ជាតិឱ្យសម្រេចបានជោគជ័យ៕ ដោយ៖ក្រុមការងារMoINFO APP
