ភ្នំពេញ៖ ព្រឹកថ្ងៃទី០៣ ខែកញ្ញា ឆ្នាំ២០១៩ សម្តេចតេជោ នាយករដ្ឋមន្ត្រី ហ៊ុន សែន និងលោក មហាធា មហាម៉ាត់ (Mahathir Mohamad) នាយករដ្ឋមន្ត្រីម៉ាឡេស៊ី បានអញ្ជើញជាអធិបតីភាព ក្នុងពិធីចុះហត្ថលេខាលើកិច្ចព្រមព្រៀង ចំនួន ២។
ទី១-កិច្ចព្រមព្រៀង ស្ដីពី ការលុបបំបាត់យកពន្ធត្រួតស៊ីគ្នា ការលើកលែងពន្ធលើប្រាក់ចំណូល ព្រមទាំងការបង្ការការគេចវេសពន្ធ និងការជៀសវាងពន្ធ។ កិច្ចព្រមព្រៀងនេះ ចុះហត្ថលេខាដោយលោក អូនព័ន្ធ មុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក សៃហ្វូឌីន អាប់ឌុលឡា រដ្ឋមន្ត្រីការបរទេសម៉ាឡេស៊ី។
ទី២-កិច្ចព្រមព្រៀងមួយទៀត ជាអនុស្សារណៈយោគយល់គ្នា ស្តីពី កិច្ចសហប្រតិបត្តិការលើវិស័យទេសចរណ៍។ ឯកសារនេះ ចុះហត្ថលេខាដោយលោក ថោង ខុន រដ្ឋមន្ត្រីក្រសួងទេសចរណ៍ និងលោក សៃហ្វូឌីន អាប់ឌុលឡា រដ្ឋមន្ត្រីការបរទេសម៉ាឡេស៊ី។
បន្ទាប់ពីចុះហត្ថលេខាលើកិច្ចព្រមព្រៀងទាំងពីរនេះ នៅក្នុងសន្និសីទកាសែតរួមគ្នា សម្តេចតេជោ ហ៊ុន សែន បានប្រកាសថា កម្ពុជា និងម៉ាឡេស៊ី កំពុងពិភាក្សាគ្នា ដើម្បីប្រើទិដ្ឋាការរួម រវាងប្រទេសទាំងពីរ សម្រាប់អ្នកទេសចរ។ ពោលគឺអ្នកទេសចរ អាចចូលកម្ពុជា និងម៉ាឡេស៊ី ដោយប្រើទិដ្ឋាការតែមួយ។
សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន បានអញ្ជើញទទួលបដិសណ្ឋារកិច្ចផ្លូវការជូនលោកមហាធា មហាម៉ាត់ (Mahathir Mohamad) នាយករដ្ឋមន្ត្រីម៉ាឡេស៊ី និងលោកជំទាវ Siti Hasmah Mohamad Ali នៅក្នុងឱកាសដែល លោកអញ្ជើញមកបំពេញទស្សនកិច្ចផ្លូវការរយៈពេល៣ថ្ងៃនៅក្នុងព្រះរាជាណាចក្រកម្ពុជា។
សូមបញ្ជាក់ថា លោកនាយករដ្ឋមន្ត្រី ម៉ាឡេស៊ី មហាធា មហាម៉ាត់ បានដឹកនាំគណៈប្រតិភូ អញ្ជើញមកដល់ភ្នំពេញ កាលពីព្រឹកថ្ងៃទី០២ ខែកញ្ញា ឆ្នាំ២០១៩ ដើម្បីបំពេញទស្សនកិច្ចរយៈពេល ៣ថ្ងៃ នៅកម្ពុជា ៕
