បន្ទាប់ពីអនុវត្តការដាំចេកអំបូងលឿងសាកល្បង លើនៅផ្ទៃដីចំនួន៥០០ហិកតាទទួលបានជោគជ័យ របស់ក្រុមហ៊ុនកៅស៊ូ បឹងកេត នៅពេលនេះ ក្រុមហ៊ុនក្នុងស្រុកមួយនេះ គ្រោងនឹងបង្កើនផ្ទៃដីដាំចេកអំបូងលឿងអោយបានទំហំដី១៥០០ហិកតាបន្ថែមទៀត ដើម្បីបង្កើនការនាំចេញនេះទៅកាន់ទីផ្សារប្រទេសចិន។
នៅថ្ងៃទី២០ ខែមករាកន្លងមក លោក ហ៊ុន ណេង ប្រធានគណៈកម្មការទី៤ នៃរដ្ឋសភា និងលោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ នឹងនេសាទ បានអញ្ជើញអបអរសាទរក្រុមហ៊ុនកៅស៊ូបឹងកេត នៅខេត្តកំពង់ចាម ដែលបានអនុវត្តបានជោគជ័យការដាំចេកអំបូងលឿងទទួលបានជោគជ័យ និងប្រារព្ធកម្មវិធីវេចខ្ចប់ចេកអំបូងលឿងនេះនាំទៅកាន់ទីផ្សារអន្តរជាតិ។
តាមរបាយការណ៍របស់ក្រុមហ៊ុន បានឲ្យដឹងថា ក្រុមហ៊ុនបានចុះទុនវិនិយោគលើទឹកប្រាក់ប្រមាណជាង ៨លានដុល្លារ ដាំដុះចេកអំបូងលឿងលើផ្ទៃដីសាកល្បង ៥០០ ហិកតា ក្នុងនោះផ្ទៃដី ១០០ ហិកតា កំពុងធ្វើការប្រមូលផល និងវេចខ្ចប់នាំចេញទៅកាន់ទីផ្សារចិន ហើយអនាគតគ្រោងពង្រីកផ្ទៃដីដាំដុះឲ្យដល់ ១,៥០០ហិកតា ដើម្បីឆ្លើយតបតាមតម្រូវការទីផ្សារប្រទេសចិន។
លោក វេង សាខុន បានជំរុញអោយក្រុមហ៊ុនសហការជាមួយអគ្គនាយកដ្ឋានកសិកម្មលើការងារទិដ្ឋភាពច្បាប់ និងបទដ្ឋានបច្ចេកទេស ជាពិសេស ការងារភូតគាមអនាម័យ ធ្វើយ៉ាងណាឲ្យការនាំចេញផលិតផលចេកឆ្លើយតបតាមស្តង់ដារទីផ្សារ។
ទោះយ៉ាងណា រដ្ឋមន្ត្រីកសិកម្មក៏បានថ្លែងអបអរសាទរនូវការសាកល្បង ទទួលបានភាពជោគជ័យ ខណៈចេកអំបូងលឿងនេះកំពុងមានការពេញនិយមខ្លាំងនៅលើទីផ្សារជាតិអន្តរជាតិហើយការពង្រីកផ្ទៃដីដាំចេកនេះ បានធ្វើឡើង ខណៈកម្ពុជាកំពុងផ្តល់ការលើកទឹកចិត្តនិងបានចាប់យកភាគីចិនធ្វើជាដៃគូវិនិយោគដំណាំចេកដែលមានសក្តានុពលផ្នែកសេដ្ឋកិច្ចយ៉ាងធំធេងសម្រាប់ទីផ្សារចិនទាំងក្នុងពេលបច្ចុប្បន្ន និងពេលអនាគត។
ប្រទេសចិនកំពុងមានតម្រូវការខ្លាំងលើការប្រើប្រាស់ធ្វើម្ហូបអាហារនោះបានជំរុញអោយកម្ពុជា យកខេត្ត៤ ជំរុញការដាំចេញអំបូងលឿងនេះ ហើយខេត្តទាំងនោះរួមមាន៖ ខេត្តរតនគិរី មណ្ឌលគិរី ត្បូងឃ្មុំ កំពង់ចាម និងខេត្តកំពត៕
