ភ្នំពេញ៖ ធនាគារអភិវឌ្ឍន៍ជនបទ និងកសិកម្ម បានចុះកិច្ចព្រមព្រៀងជាមួយធនាគារឯកទេស វីង(ខេមបូឌា)លីមីធីត ដើម្បីផ្តល់ឥណទានមានការប្រាក់ទាប គាំទ្រដល់សិប្បកម្ម សហគ្រាសធុនតូច និងមធ្យមក្នុងវិស័យកែច្នៃផលិតផលកសិកម្ម និងកសិឧស្សាហកម្ម នៅទូទាំងព្រះរាជាណាចក្រកម្ពុជា។
នៅថ្ងៃទី២៧ ខែឧសភា ឆ្នាំ២០២០ លោក កៅ ថាច អគ្គនាយកនៃធនាគារអភិវឌ្ឍន៍ជនបទ និងកសិកម្ម និងលោក Manu Rajan អគ្គនាយក នៃធនាគារឯកទេស វីង បានចុះកិច្ចព្រមព្រៀង ដើម្បីធ្វើឱ្យប្រសើរឡើងនូវខ្សែសង្វាក់ផលិតកម្មក្នុងវិស័យកសិកម្ម ក្នុងគោលដៅបង្កើតការងារបន្ថែម ពង្រឹងភាពប្រកួតប្រជែង និងពង្រីកការផលិតក្នុងស្រុក សម្រាប់ជំរុញនាំចេញ និងកាត់បន្ថយការនាំចូល។
លោក កៅ ថាច បានបញ្ជាក់ថា ដោយកំណើនអតិថិជនដែលទទួលបានឥណទានពីធនាគារអភិវឌ្ឍន៍ជនបទ និងកសិកម្ម មានកំណើនពីមួយថ្ងៃទៅមួយថ្ងៃ បានផ្តល់ជូនដល់ប្រជាកសិករនៅជនបទ ដោយអត្រាការប្រាក់ទាប មានចំនួនកាន់តែច្រើន។ ដើម្បីសម្រួលដល់ការបង់ប្រាក់ដើម និងការប្រាក់របស់អតិថិជនមកកាន់ធនាគារ ឱ្យកាន់តែងាយស្រួលជាងមុន ធនាគារអភិវឌ្ឍន៍ជនបទ និងកសិកម្ម បានព្រមព្រៀងចុះហត្ថលេខា ជាមួយធនាគារឯកទេសវីង ក្នុងគោលបំណងសំខាន់រួមាន៖
-ផ្តល់សេវាទូទាត់អេឡិចត្រូនិកតាមរយៈធនាគារវីង ដើម្បីសម្រួលឱ្យអតិថិជនរបស់ធនាគារអភិវឌ្ឍន៍ជនបទ និងកសិកម្ម បង់សងប្រាក់ដើម និងការប្រាក់សងត្រឡប់មកធនាគារវិញទាន់ពេល។
-ផ្តល់សុវត្ថិភាព និងភាពរហ័សទាន់ចិត្ត កាត់បន្ថយពេលវេលា ការធ្វើដំណើររបស់អតិថិជន នៅពេលគាត់ត្រូវមកបង់ប្រាក់ដើម ឬការប្រាក់នៅ។
-ជំរុញអតិថិជនរបស់ធនាគារអភិវឌ្ឍន៍ជនបទ និងកសិកម្មងាកមកប្រើប្រាស់សេវា Digital Banking ស្របតាមនិន្នាការនយោបាយរបស់រាជរដ្ឋាភិបាល (Digital Economy) ៕
