ភ្នំពេញ៖ ខ្សែភាពយន្តខ្លីបែបអប់រំរឿង «ប្រពន្ធបាយកក» ឆ្លុះបញ្ចាំងពីតថភាពសង្គម និងរឿងរ៉ាវ ស្នេហាសម័យថ្មី កំពុងធ្វើឲ្យមានចាប់អារម្មណ៍ខ្លាំង។
ភាពយន្តខ្លីរឿងនេះ ជារបស់ផលិតកម្មចប (Job Production) ទទួលបានការពេញចិត្ត និងកោតសរសើរខ្លាំង រហូតមានការបញ្ចេយោបល់ (Comment ) និងការចែករំលែកជាច្រើនពេញបណ្តាញ សង្គមនានា។ អត្ថន័យនៃសាច់រឿង ដែលឆ្លុះបញ្ចាំង ពីជីវិតស្នេហាមនុស្សប្រុសស្រីមួយចំនួនក្នុងសង្គមបច្ចុប្បន្ន។
តារាសម្តែងជាច្រើនពិសេសអតីតបេក្ខជន X Factor Cambodiaកញ្ញា លាង ចាន់ឡា និងតារាសម្តែង លោក Kavin កញ្ញា ហេង វិមាន និងកញ្ញា ហេង ស្រីពេជ្រ ជាដើម។
លោក ឈួន សុខលីម អ្នកគ្រប់គ្រងការផលិតបានបញ្ជាក់ថា ជាភាពយន្ត ឆ្លុះបញ្ចាំង ពីស្នេហាផិតក្បត់របស់ស្វាមី លួចលាក់មានស្រីខាងក្រៅ មិនព្រមកែខ្លួន និងចាត់ទុកប្រពន្ធ ត្រឹមជាបាយដែល សល់ ចុងក្រោយគឺមានវិប្បដិសារីចំពោះខ្លួនឯង។
លោកបន្តថា នេះគឺជាស្នាដៃថ្មីដែលនិពន្ធ និងដឹកនាំសម្តែងដោយលោក សយ រតនា បន្ទាប់ពីរឿង «ទ្រនំបាក់មែក» «ប្ដីទីងមោង» និងរឿង «មកផ្ទះយើងវិញកូន» និងជាការខិតខំផលិតរួមគ្នាគ្រប់ផ្នែកដើម្បី បញ្ចេញស្នាដៃមានគុណភាព ហើយលោកពិតជា សប្បាយចិត្តដែលទទួលបានការបញ្ចេញ យោបល់ (Comment) កោតសរសើរ និងការរិះគន់ខ្លះៗដើម្បីកែលម្អចំណុចខ្វះខាត ដើម្បីបន្តឲ្យការផលិតភាពយន្តខ្លីលើក ក្រោយកាន់តែមានគុណភាព៕
