ភ្នំពេញ៖ មន្ដ្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ឱ្យដឹងនៅ១០មិថុនាថា ការនាំចេញស្រូវ ទៅកាន់ប្រទេសវៀតណាម តាមច្រកមួយចំនួននៅខេត្តកំពត តាកែវ កណ្តាល ព្រៃវែង និងខេត្ដស្វាយរៀង គិតចាប់ពីថ្ងៃទី០១ ខែមករា ដល់ថ្ងៃទី១១ ខែមិថុនា ឆ្នាំ២០២០សម្រេច បានចំនួន៩២១,០៤៧តោន។
លោក វេង សាខុន ក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា ចំពោះខេត្តព្រៃវែង ជាប់ចំណាត់ថ្នាក់ផលិតស្រូវបានច្រើនជាងគេក្នងព្រះរាជាណាចក្រកម្ពុជាក្នុង រយៈពេល១០ឆ្នាំចុងក្រោយនេះ។
លោករដ្ឋមន្ត្រីបានបន្ដទៀតថា តាមរបាយការណ៍ របស់ប្រធានមន្ទីរកសិកម្មរុក្ខាប្រមាញ់ និងនេសាទខេត្ដព្រៃវែង បានឱ្យដឹងថា ការនាំស្រូវចេញទៅកាន់ប្រទេសវៀណាមកំពុងតែបន្តជាប់ជាប្រចាំ ជាពិសេសគិត ចាប់ពីថ្ងៃទី២២ ខែឧសភា ដល់ថ្ងៃទី០៨ ខែមិថុនាឆ្នាំ២០២០ គឺសម្រេចនាំស្រូវបានចំនួនសរុបប្រមាណ ៣៨, ៥២៦ តោន។
យោងតាមរបាយការណ៍របស់ អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទបានបង្ហាញថា ការនាំចេញស្រូវទៅ កាន់ប្រទេសវៀតណាមតាមបណ្តាច្រកមួយចំនួន គិតចាប់ពីថ្ងៃទី០១ ខែមករាដល់ថ្ងៃទី១១ ខែមិថុនាឆ្នាំ២០២០ សម្រេចបានចំនួន៩២១, ០៤៧ តោន ៕
