ភ្នំពេញ៖ មន្ត្រីក្រសួងទេសចរណ៍ បានឲ្យដឹងថា ក្នុងអំឡុងពេលបុណ្យចូលឆ្នាំចិន នៅឆ្នាំនេះ នៅទូទាំងប្រទេសកម្ពុជា ទទួលបានអ្នកទេសចរ កើនឡើងក្នុងរង្វង់ជាង ១០% បើធៀបនឹងបុណ្យចូលឆ្នាំចិន កាលពីឆ្នាំមុន។
លោក ទិត្យ ចន្ថា រដ្ឋលេខាធិការ និងជាអ្នកនាំពាក្យក្រសួងទេសចរណ៍ មិនបានបញ្ជាក់ពីចំនួនអ្នកទេសចរប៉ុន្មាននាក់នោះទេ ដែលបានដើរកម្សាន្តតាមតំបន់រមណីយដ្ឋានទេសចរណ៍ នៅទូទាំងប្រទេសកម្ពុជា ក្នុងអំឡុងពិធីបុណ្យចូលឆ្នាំចិននេះទេ ដោយលោក អះអាងថា មន្ត្រីជំនាញ កំពុងបូកសរុប។
លោក ទិត្យ ចន្ថា បានបញ្ជាក់ថា “កំណើនអ្នកទេសចរ មានច្រើនជាងឆ្នាំមុន។ ដោយសារអី? ដោយសារហេដ្ឋានរចនាសម្ព័ន្ធល្អ ជាពិសេសទេសចរក្នុងស្រុក គឺបងប្អូនប្រជាពលរដ្ឋយើង មានចំណូល មានមធ្យោបាយ មានយានយន្ត មានឡាន អាចទៅទស្សនាបានគ្រប់កន្លែងបានទាំងអស់នៅ ទូទាំងប្រទេស។ អញ្ចឹង កើនឡើងប្រហែលជាង ១០%។ ប៉ុន្តែចំនួនសរុប កំពុងបូកសរុប”។
យោងតាម មន្ទីរទេសចរណ៍ ខេត្តសៀមរាប បានប្រកាសកាលពីថ្ងៃទី០៧ ខែកុម្ភៈ ឆ្នាំ២០១៩ ថា ក្នុងអំឡុងពេលបុណ្យចូលឆ្នាំចិន ចាប់ពីថ្ងៃទី០៤ ដល់ថ្ងៃទី០៧ ខែកុម្ភៈនេះ នៅខេត្តសៀមរាប មានភ្ញៀវទេសចរជាតិ និងអន្តរជាតិ កើនឡើងជិត ៤%។ ពោលគឺភ្ញៀវទេសចរ ដែលបានទៅលេងកម្សាន្តនៅខេត្តសៀមរាប ពិសេសតំបន់រមណីយដ្ឋានអង្គរ សរុបមានចំនួនប្រមាណជាង ៩ម៉ឺននាក់។
ដោយឡែក មន្ទីរទេសចរណ៍ ខេត្តព្រះសីហនុ បានប្រកាសថា ភ្ញៀវទេសចរ ដែលបានមកសម្រាកកម្សាន្ត ក្នុងឱកាសបុណ្យចូលឆ្នាំថ្មី ប្រពៃណីចិន គិតចាប់ពីថ្ងៃទី៤ ដល់ថ្ងៃទី៦ ខែកុម្ភៈ ឆ្នាំ២០១៩ នៅខេត្តព្រះសីហនុ ឬឆ្នេរសមុទ្រកំពង់សោម គឺមានទេសចរប្រមាណ ៥៨.០០០នាក់ ថយចុះជាង ៣៤ %។ ក្នុងនោះ មានអ្នកទេសចរជាតិ ប្រមាណ ៤៥.៥០០នាក់ ថយចុះ ជាង ៤២% និងអ្នកទេសចរអន្តរជាតិ ប្រមាណ ១២.៥០០ នាក់ កើនឡើងជិត ៤០%។
អំឡុងពេលបុណ្យចូលឆ្នាំចិននេះ តម្លៃនៃការស្នាក់នៅ តាមផ្ទះសំណាក់ និងសណ្ឋាគារ រួមទាំងតម្លៃម្ហូបអាហារ និងសេវាកម្មផ្សេងៗ នៅតាមរមណីយដ្ឋាននានា ពិសេសនៅតំបន់មាត់សមុទ្រ បានបន្តឡើងថ្លៃ ១ ជា ២ ឬក៏អាចដល់ ១ ជា ៣ក៏មាន។ ការឡើងថ្លៃនេះ បានក្លាយជាទម្លាប់ទៅហើយ នៅតាមតំបន់ទេសចរណ៍នានា ក្នុងប្រទេសកម្ពុជា នៅអំឡុងពេលមនបុណ្យទានម្តងៗ ជារៀងរាល់ឆ្នាំទៅហើយ៕
