Worldometer បានចុះផ្សាយថា កំណើនមនុស្សស្លាប់ដោយសារវីរុសCovid-19នៅសហរដ្ឋអាមេរិក បានកើនឡើងដល់ជាង២០ម៉ឺននាក់ហើយ គឺចំនួន២០៤ ៥០៦នាក់ និងកំណើនមនុស្សឆ្លងសរុបបានកើនឡើងដល់ជាង៧លាននាក់ គឺចំនួន៧ ០៤៦ ២១៦នាក់ គិតត្រឹមព្រឹកថ្ងៃអង្គារ ទី២២ ខែកញ្ញានេះ ដោយបន្ថែមអ្នកស្លាប់ថ្មីចំនួន៣៨៨នាក់ និងអ្នកឆ្លងថ្មីចំនួន៣៦ ៣៧២នាក់ ក្នុងរយៈពេល២៤ម៉ោងចុងក្រោយ ។
ក្នុងរយៈពេល២៤ម៉ោងចុងក្រោយនេះដែរ វីរុសCovid-19 បានសម្លាប់មនុស្សអស់ចំនួន ៤០២៨នាក់ និងបានឆ្លងទៅមនុស្សថ្មីចំនួន ២២៦ ៨៥២នាក់ នៅទូទាំងពិភពលោក ហើយប្រទេសឥណ្ឌាជាប់លេខ១នៅលើពិភពលោកនៅថ្ងៃទី២២ ខែកញ្ញានេះ ដែលមានមនុស្សស្លាប់ថ្មីប្រចាំថ្ងៃ និងឆ្លងថ្មីប្រចាំថ្ងៃច្រើនជាងគេ គឺឥណ្ឌាមានមនុស្សស្លាប់ថ្មីចំនួន ១០៥៦នាក់ និងមានមនុស្សឆ្លងថ្មីចំនួន ៧៤ ៤៩៣នាក់ ។
សូមបញ្ជាក់ថា គិតត្រឹមព្រឹកថ្ងៃអង្គារនេះ កំណើនមនុស្សឆ្លងវីរុសCovid-19សរុបនៅទូទាំងពិភពលោក បានកើនឡើងដល់ ៣១ ៤៧២ ២០៥នាក់ និងកំណើនមនុស្សស្លាប់សរុបបានកើនឡើងដល់ ៩៦៨ ៩១៣នាក់ ខណៈដែលកំណើនមនុស្សជាសះស្បើយសរុប បានកើនឡើងដល់ ២៣ ០៩៧ ២៧៩នាក់ ៕
