ខេត្តកណ្តាល៖ នៅព្រឹកថ្ងៃទី២០ ខែកុម្ភៈ ឆ្នាំ២០១៩ សម្តេចតេជោ នាយករដ្ឋមន្ត្រី ហ៊ុន សែន បានអំពាវនាវឲ្យអាជ្ញាធរតាមបណ្តាខេត្ត ដែលកំពុងខ្វះខាតទឹក ប្រើប្រាស់ត្រូវរកវិធីដោះស្រាយ មិនត្រូវទុកឲ្យប្រជាពលរដ្ឋនៅតំបន់ណាមួយ ដែលគ្មានប្រភពទឹក ខ្វះទឹកប្រើប្រាស់នោះទេ ត្រូវមានរថយន្តដឹកទឹក ទៅកាន់តំបន់ទាំងនោះ ហើយត្រូវជំរុញការជីកអណ្តូងបន្ថែម។
សម្តេចតេជោ ហ៊ុន សែន បានបញ្ជាក់ថា គ្រប់ខេត្តទាំងអស់ ត្រូវណែនាំឲ្យប្រជាពលរដ្ឋ ផ្អាកឈប់ធ្វើស្រែប្រាំងតទៅទៀត បន្ទាប់ពីការច្រូតកាត់រួចរាល់ហើយ ព្រោះដោយសារខ្វះទឹក ស្រូវក៏មិនទាន់ចេញ រីឯទឹកក៏ខ្វះប្រើ។ ដូច្នេះត្រូវយកចិត្តទុកដាក់ដោះស្រាយបញ្ហានេះ។
សូមរម្លឹកថា ចាប់ពីដើមខែកុម្ភៈនេះ កង្វះទឹកស្អាតប្រើប្រាស់ បានកើតឡើងនៅតាមបណ្តាខេត្តមួយចំនួន។ ចាប់តាំងពីថ្ងៃទី១២ ខែកុម្ភៈ អាជ្ញាធរខេត្តកោះកុង បានដឹកទឹកចែកជូនប្រជាពលរដ្ឋ នៅសង្កាត់ដងទង់ ក្រុងខេមរភូមិន្ទ ហើយនៅថ្ងៃទី១៥ ខែកុម្ភៈ ឆ្នាំ២០១៩ ពន្ធនាគារខេត្តព្រះវិហារ ក៏ខ្វះខាតទឹកប្រើប្រាស់ផងដែរ។
ជាមួយគ្នានោះដែរ នៅស្ទឹងស្ទោង ក្នុងស្រុកស្ទោង ខេត្តកំពង់ធំ ក៏រីងខះ ដោយអន្លើៗ នាំឲ្យប្រជាពលរដ្ឋ ក្នុងភូមិសាស្ត្រឃុំម្សាក្រង បានប្រឈមនឹងការខ្វះខាតប្រើប្រាស់ប្រចាំថ្ងៃ។ ដោយឡែក នៅភូមិសាស្ត្រខេត្តដទៃទៀត ដូចជា នៅស្រុកលើកដែក ខេត្តកណ្តាល និងនៅស្រុកមេសាង ខេត្តព្រៃវែង ក៏ប្រឈមនឹងបញ្ហាខ្លះទឹកប្រើប្រាស់ដែរ។
បញ្ហាខ្វះទឹកប្រើប្រាស់នេះ ក្រសួងធនធានទឹក និងឧតុនិយម រួមទាំងអាជ្ញាធរខេត្ត ស្រុក ឃុំ បានអន្តរាគមន៍ ដោយដាក់ម៉ាស៊ីនបូមទឹក បូកពីទន្លេ បញ្ចូលតាមប្រឡាញ ព្រមទាំងផ្តល់នូវអណ្តូងទឹកបំពាក់ម៉ូទ័របូមជាច្រើនកន្លែង សម្រាប់ផ្គត់ផ្គង់ទឹកប្រើប្រាស់ នៅក្នុងមូលដ្ឋានផង និងសម្រាប់ជួយសង្គ្រោះស្រូវប្រាំង។ ក្រៅពីនោះ ក៏មានជីកស្រះ និងអណ្តូងបន្ថែមជាច្រើន ជាច្រើនទៀត។
កាលពីខែមករា ដើមឆ្នាំ២០១៩ ប្រមុខរាជរដ្ឋាភិបាល បានចេញប្រកាសរួចហើយ ដើម្បីក្រើនរម្លឹកពីការខ្វះទឹកប្រើប្រាស់ អំពាវនាវដល់ប្រជាពលរដ្ឋ ក៏ដូចជាអាជ្ញាធរមូលដ្ឋាន ចាត់វិធានការថែរក្សាទឹក ខណៈដែលនៅរដូវប្រាំងនេះ អាកាសធាតុឡើងកម្តៅក្តៅខ្លាំង ពិសេសនៅខែមេសាខាងមុខ។
សូមរម្លឹកថា កាលពីអំឡុងខែប្រាំង ឆ្នាំ២០១៦ គឺនៅខែមេសា និងខែឧសភា នៅទូទាំងប្រទេសកម្ពុជា ជួបប្រទះបញ្ហាខ្វះទឹកប្រើប្រាស់។ កាលណោះ អាជ្ញាធរសមត្ថកិច្ចគ្រប់លំដាប់ថ្នាក់ តាំងពីថ្នាក់ជាតិ ដល់ថ្នាក់មូលដ្ឋាន សមាជិករាជរដ្ឋាភិបាល តំណាងរាស្ត្រ ព្រឹទ្ធសភា បានចាត់វិធានការចែកទឹកដល់ប្រជាពលរដ្ឋ ទាំងទឹកស្អាតប្រើប្រាស់ប្រចាំថ្ងៃ ទឹកបរិសុទ្ធ សម្រាប់បរិភោគ។ ស្រះទឹក និងអណ្តូងជាច្រើនកន្លែង ក៏ត្រូវបានជីកជូនប្រជាពលរដ្ឋ ដើម្បីយកទឹកប្រើប្រាស់ក្នុងជីវភាពប្រចាំថ្ងៃផងដែរ៕
