កណ្ដាល៖ ក្រុមរថយន្តដឹកដី និងខ្សាច់ ល្មើសបច្ចេកទេស ដែលខ្លះគ្មានស្លាកលេខ តទ្រុង ផ្ទុកលើសទ្រុង ធ្លាក់លើផ្លូវ នៅតែដឹកឆ្លងកាត់ជញ្ជីងទៅមុខបានយ៉ាងរលូននៅចំណុចជញ្ជីងថ្លឹងទម្ងន់ល្មើសបច្ចេកទេសអង្គស្នួល ស្ថិតស្រុកអង្គស្នួល ខេត្តកណ្ដាល តាមបណ្ដោយផ្លូវជាតិលេខ៤ ដោយឃើញតៃកុង ឬក៏ប្រ៊ូ ចុះពីរថយន្តលូកហោប៉ៅដើរសំដៅទៅជួបមន្ត្រីជញ្ជីងនៅក្នុងបន្ទប់មិនបានមួយនាទីផង អាចបន្តដំណើរទៅទៀតបាន។
សេចក្ដីរាយការណ៍បានឲ្យដឹងថា ក្នុងមួយថ្ងៃៗរថយន្តដឹកប្រភេទនេះរាប់រយគ្រឿង ដឹកដី និងខ្សាច់ចូលភូមិសាស្ត្ររាជធានីភ្នំពេញ ធ្វើឲ្យល្បាយដី ខ្សាច់ធ្លាក់ និងថ្មធ្លាក់លើផ្លូវ បង្កជាធូលីហុយ ប៉ះពាល់ដល់បរិស្ថាន សុខភាព សុវត្ថិភាព រំខានដល់ជីវភាព និងការធ្វើដំណើរ។
ទាក់ទងនឹងការលើកឡើងនេះតាំងពីថ្ងៃទី០៥ ដល់១៧ ខែវិច្ឆិកា ឆ្នាំ២០២១ លោក ម៉ឹង យូឡេង ប្រធានមន្ទីរសាធារណៈការ និងដឹកជញ្ជូន ខេត្តកណ្ដាល មិនទាន់មានការបញ្ជាក់នៅឡើយ បន្ទាប់ពីទទួលសំណួរពីក្រុមការងារយើងខ្ញុំ។
សូមរំលឹកផងដែរថា ក្រសួងរ៉ែ និងថាមពល កន្លងទៅសហការជាមួយអន្តរក្រសួង ដែលពាក់ព័ន្ធ បានចេញសារាចរណ៍ណែនាំកំណត់ថា ការដឹកជញ្ជូនដី ឬខ្សាច់ ថ្មគ្រប់ប្រភេទ ត្រូវតែស្ងួតមិនលើសទ្រុង មិនលើសទម្ងន់ គ្របឲ្យជិត មិនត្រូវធ្វើឲ្យដី និងខ្សាច់ ថ្ម ធ្លាក់លើផ្លូវ មិនត្រូវធ្វើឲ្យប៉ះពាល់ដល់បរិស្ថាន សណ្ដាប់ធ្នាប់ និងផលប្រយោជន៍សាធារណៈ ដោយគោរពបទដ្ឋានបច្ចេកទេសដែលបានកំណត់៕
