កំពង់ចាម៖លោកឧកញ៉ា ឡូវ ហ៊ឺង ទីប្រឹក្សាសម្តេតេជោ ហ៊ុន សែន បានផ្តល់ជាអំណោយដល់ប្រជាពលរដ្ឋនៅភូមិខ្ទឹង ឃុំទងត្រឡាច ស្រុកស្រីសន្ធរ ខេត្តកំពង់ចាម ហើយបានប្រកាស បើកការដ្ឋានសាងសង់ជាផ្លូវការជាផ្លូវលំ០១ខ្សែប្រវែង ១២៦២ម៉ែត្រ ដែលនឹងចំណាយថវិកាប្រមាណ៥៥០០ដុល្លារអាមេរិក កាលពីទី២០ ខែកុម្ភះ ឆ្នាំ២០២២នេះ។
តំណាងលោកឧកញ៉ា ឡូវ ហ៊ឹង ក៏បានអញ្ជើញចូលរួមនៃពិធីនោះ ក្រៅពីនោះរួមមាន លោក ស៊ីម គង់ អភិបាលនៃគណះអភិបាលស្រុកស្រីសន្ធរនិងលោក ចាស់ ជឿន មេឃុំទងត្រឡាចប្រជាពលរដ្ឋប្រមាណ២០០គ្រួសារបានចូលរួមពិធីប្រកាសបើកការដ្ឋានសាងសង់ផ្លូវលំក្រាលដី០១ខ្សែប្រវែង១២៦២ម៉ែត្រផងដែរ។
តំណាងលោកឧកញ៉ា ឡូវ ហ៊ឺង លោកមេឃុំ ចាស់ ជឿន មានប្រសាសន៍ថា សាលាបឋមសិក្សាខ្ទឹង០១ខ្នង៥បន្ទប់ ជាអំណោយដ៍ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្រ្តី ទើបបានកសាងរួចរាល់ហើយជាស្ថាពរនិងបានផ្តល់អោយឧកាសអោយ ក្មួយៗសិស្សានុសិស្សបានចូលរៀនជាស្ថាពរហើយ ។
លើសពីនេះលោកបញ្ជាក់ថា ក្នុងនាមលោកឧកញ៉ា ឡូវ ហ៊ឹង ក៏សំណូមពរដល់មាតាបិតាឬអាណាព្យាបាលសិស្សមេត្តាបញ្ជូនកូនចៅដែលគ្រប់អាយុដល់វ័យសិក្សាអោយមកចុះឈ្មោះចូលរៀនអោយបានគ្រប់ៗគ្នា ។
លោក ស៊ីម គង់អភិបាលនៃគណះអភិបាលស្រុកស្រីសន្ធរបានលើកឡើងថា ផ្លូវលំក្រាលដី០១ខ្សែប្រវែង១២៦២ម៉ែត្រ ដែលគ្រោងចំណាយថវិកាប្រមាណ៥៥០០ ដុល្លាដែលឧបត្ថម្ភថវិកា ដោយលោកឧកញ៉ា ឡូហ៊ឺង បានសម្រេចប្រកាសបើកការដ្ឋានសាងសង់នាថ្ងៃនេះ ដែលជាសមិទ្ធិផលថ្មីបន្ថែមទៀតនៅក្នុងឃុំទងត្រឡាច។
លោកអភិបាលស្រុកបានរំលឹកដល់ពលរដ្ឋត្រូវចងចាំនូវពាក្យស្លោកដែលយើងមិនអាចភ្លេចបាននោះគឺ អ្នកដឹកនាំកម្ពុជាយើងគ្រប់ជំនាន់គឺ“អរគុណសន្តិភាព” ម៉្យាងវិញទៀត ការនាំគ្នាចងចាំនិងគិតដល់សន្តិភាពគ្រប់វិនាទី ធ្វើឲ្យប្រទេសយើងកាន់តែមានសុវត្ថិភាព ស្ថិរភាព និងសន្តិភាពយូរអង្វែងដែលជាបំណងប្រាថ្នារបស់ពលរដ្ធខ្មែរគ្រប់ៗរូប។
តំណាងលោកឧកញ៉ា ឡូវ ហ៊ឹង បាន សំណូមពរ និងការផ្តាំផ្ញើពីលោកឧកញ៉ាគឺ សូមអោយប្រជាពលរដ្ឋក្នុងឃុំទងត្រឡាចទាំងអស់ចូលរួមថែររក្សា និងការពារសមិទ្ធិផលដែលបានកសាងស្ថាបនាឡើង ដើម្បីទុកសម្រាប់ការប្រើប្រាស់អោយបានយូរអង្វែង និងជាមរតកសម្រាប់កូនចៅយើងជំនាន់ក្រោយផងដែរ។
សូមរំលឹកថា អំណោយរបស់ ឧកញ៉ា ឡូវ ហ៊ឺង ដែលបានផ្តល់ជូនប្រជាពលរដ្ឋនៅភូមិខ្ទឹង ប្រមាណ២០០គ្រួសារ ក្នុងមួយគ្រួសារទទួលបានក្រម៉ា១ និងថវិកា១ ម៉ឺនរៀលផងដែរ៕
