ភ្នំពេញ: លោកឧកញ៉ា ហុង ឆេងឈុន ប្រធានសមាគមសហ គ្រិនយុវជនកម្ពុជាសាមគ្គីដើម្បីអភិវឌ្ឍន៍ (CYEAD)និងលោក ហ៊ុន សារឿន ឯកអគ្គរាជទូតកម្ពុជាប្រចាំនៅប្រទេសថៃបានរៀបចំព្រឹត្តិ ការណ៍កម្មវិធីផ្គូផ្គងពាណិជ្ជកម្មរវាងកម្ពុជា-ថៃ ( Busin ess Matching)ជាលើកដំបូងនៅកម្ពុជា។
កម្មវិធីនេះក្រោមអធិបតីភាពដ៏ខ្ពង់ខ្ពស់របស់លោកស្រីរដ្ឋមន្រ្តី ចម និម្មល រដ្ឋមន្ត្រីក្រសួងពាណិជ្ជកម្ម ដែលរៀបចំឡើងនៅសណ្ឋាគារ ហ្វ៊ែរ ហ្វៀល បាយ ម៉ារៀត ភ្នំពេញកាលពីថ្ងៃទី២៨ ខែតុលា ឆ្នាំ២០ ២៣។
លោកស្រី ចម និម្មល រដ្ឋមន្ត្រីក្រសួងពាណិជ្ជកម្មបានថ្លែងថា មិត្តភាពកម្ពុជា-ថៃ ជាមិត្តភាពដែលមានប្រពៃណីយូរលង់ណាស់មកហើយ ក្រោមកិច្ចសហប្រតិបត្តិការទ្វេភាគីប្រមុខរាជរដ្ឋាភិបាលនៃប្រទេសទាំងពីរ បានសម្តែងនូវការពេញចិត្តចំពោះវឌ្ឍនភាពសំខាន់ៗ នៃកិច្ចប្រតិបត្តិការលើគ្រប់វិស័យ។
លោកស្រីរដ្ឋមន្រ្តីបន្ថែមថា ”មិត្តភាពនិងភាតរភាពនេះ ត្រូវបានលើកទឹកចិត្ត ដូចសភាសិតខ្មែរមួយឃ្លាលើកឡើងថា“ជួញជិតប្រសើរជាងជួញឆ្ងាយ” ដែលក្នុងបរិបទជាទ្វេភាគីផង និងជារដ្ឋក្នុងសមាគមអាស៊ានផង ការបណ្តាក់ទុនវិនិយោគ យើងតែងតែសម្លឹងខ្ពស់ទៅទ្វីបឆ្ងាយៗនៅពេលដែលប្រទេសក្នុងតំបន់ជាប់ភូមិផងរបងជាមួយគ្នា គួរត្រូវបានផ្តល់ជាអាទិភាព ក្នុងការពង្រឹងនិងពង្រីកកិច្ចសហប្រតិបត្តិការឱ្យកាន់តែស៊ីជម្រៅ»។
យោងតាម លោក ហ៊ុន សារឿន ឯកអគ្គរាជទូតកម្ពុជាប្រចាំនៅប្រទេសថៃ ក៏បានរំលឹកថា ផ្តើមចេញពីជំនួបកំពូលរវាងនាយករដ្ឋមន្ត្រីនៃព្រះរាជាណាចក្រកម្ពុជា និងនាយករដ្ឋមន្ត្រីថៃ ដែលបានអញ្ជើញមកទស្សនកិច្ចផ្លូវការនៅកម្ពុជា កាលពីថ្ងៃទី២៨ ខែកញ្ញា ឆ្នាំ២០២៣កន្លងមក ប្រមុខរាជរដ្ឋាភិបាលនៃប្រទេសទាំងពីរ បានសម្រេចជាមួយគ្នា ក្នុងការជំរុញនូវគោលដៅពាណិជ្ជកម្មទ្វេភាគីកម្ពុជា-ថៃ ឱ្យឡើងដល់ ១៥ពាន់លានដុល្លារនៅឆ្នាំ២០២៥ខាងមុខ ក៏ដូចជាជំរុញក្នុងការវិនិយោគទៅមករវាងកម្ពុជា-ថៃ។
ក្រោមកិច្ចសហការជាមួយគ្នាផ្ទាល់រវាងសមាគមនិងស្ថានទូត និងការអនុវត្តទៅតាមយុទ្ធសាស្ត្រការទូតសេដ្ឋកិច្ច ដែលបានដាក់ចេញដោយក្រសួងការបរទេស ដំណាក់កាលទី១ពីឆ្នាំ២០២១ ដល់ឆ្នាំ២០២៣នេះ ធ្វើឱ្យមានការគិតគូររបស់ស្ថានទូតកម្ពុជាប្រចាំនៅព្រះរាជាណាចក្រថៃ ដើម្បីរៀបចំឱ្យមានកម្មវិធីផ្គូផ្គងធុរកិច្ចកម្ពុជា-ថៃ នៅថ្ងៃនេះឡើង ដើម្បីនាំអ្នកធុរកិច្ចរបស់ថៃដែលគាត់ចាប់អារម្មណ៍ស្វែងរកឱកាសវិនិយោគថ្មីៗនៅកម្ពុជា ក្រោយការផ្ទុះឡើងនៃជំងឺកូវីដ-១៩ ដែលជាប្រទេសមានកំណើនសេដ្ឋកិច្ចខ្លាំងមួយ នៅអាស៊ីបច្ចុប្បន្ន។
ធុរជនថៃក៏គ្រោងមានការពិភាក្សាបន្ថែមជាមួយដៃគូ និងការផ្សារភ្ជាប់រវាងប្រជាជននិងប្រជាជន ជួយជំរុញវិស័យទេសចរណ៍បន្ថែមផងដែរ។
សម្រាប់ ឧកញ៉ា ហុង ឆេងឈុន ប្រធានសមាគមសហគ្រិនយុវជនកម្ពុជាសាមគ្គីដើម្បីអភិវឌ្ឍន៍ បានថ្លែងថា បេសកកម្មរបស់សមាគមគឺដើរតួជាវេទិកា ដើម្បីជំរុញការវិនិយោគទុន តាមរយៈការផ្តល់ជូននូវការចូលរួមសិក្សាស្រាវជ្រាវណែនាំផ្នែកផ្លូវច្បាប់ជួយរកដៃគូសម្រាប់សហការជាមួយអ្នកវិនិយោគមកពីក្រៅប្រទេស និងសម្របសម្រួលក្នុងការលើកកម្ពស់វិស័យសេដ្ឋកិច្ចជាតិ តាមរយៈការជួយរកទីផ្សារនាំចេញ-នាំចូលផលិតផលក្នុងស្រុក និងទៅកាន់ទីផ្សារអន្តរជាតិ។
លោកឧកញ៉បានបន្ថែមថា ព្រឹត្តិការណ៍នេះនឹងអាចដើរតួជាវេទិកាមួយ ដើម្បីគាំទ្រដល់ការវិនិយោគនិងជាកាតាលីករដ៏មានអានុភាពសម្រាប់ការអភិវឌ្ឍសង្គម សេដ្ឋកិច្ចនិងជំរុញដល់សន្តិភាពនិងភាពសុខដុមរមនា ក្នុងចំណោមប្រជាជាតិនានាក្នុងតំបន់ផងដែរ។
ព្រឹត្តិការណ៍នេះ គឺជាលទ្ធផលមួយនៃកិច្ចប្រជុំដោយផ្លែផ្ការវាងសមា គម CYEAD និងលោក ហ៊ុន សារឿន ឯកអគ្គរាជទូតកម្ពុជាប្រចាំនៅប្រទេសថៃ កាលពីខែសីហា ឆ្នាំ២០២៣ កន្លងមក។ ក្នុងជំនួបនោះដែរ ឯកឧត្តមឯកអគ្គរាជទូត លោកបានសម្តែងនូវការគាំទ្រយ៉ាងពេញទំហឹងចក្ខុវិស័យ និងបេសកកម្មរបស់សមាគម ព្រមទាំងផ្តល់ឱកាសសម្រាប់ការកៀរគវិនិយោគិនមកពីប្រទេសថៃ ដែលមានបំណងស្វែងរកកិច្ចសហប្រតិបត្តិការជាមួយបណ្តាក្រុមហ៊ុន ឬអាជីវកម្មនៅកម្ពុជា។
លើសពីនេះ វេទិកានេះ នឹងភ្ជាប់ទំនាក់ទំនងជាមួយដៃគូពាណិ ជ្ជកម្មដ៏មានសក្តានុពល ទទួលបាននូវព័ត៌មានពាក់ព័ន្ធនឹងទំនុកចិត្តក្នុងការកសាងសម្របសម្រួលដំណើរការនៃការវិនិយោគនានា ព្រមទាំងអាចទទួលបាននូវអត្ថប្រយោជន៍ ដែលជាឱកាសក្នុងការរីកចម្រើនក្នុងទីផ្សារពោរពេញដោយថាមវន្តនៅក្នុងប្រទេសកម្ពុជា។
