ភ្នំពេញ៖សម្តេចតេជោ ហ៊ុន សែន បានប្រកាសថា នៅលើពិភពលោកនេះ មិនមាននរណា អាចផលិតអង្ករសិប្បនិម្មិត្តបាននោះទេ។ ការបង្កើតព័ត៌មានអំពីអង្ករសិប្បនិម្មិត្ត ឬអង្ករផ្លាស្ទិច គ្រាន់តែជាសង្គ្រាមចិត្តសាស្ត្រតែប៉ុណ្ណោះ។
សម្តេចតេជោ បានប្រកាសបែបនេះក្នុងពិធីប្រគល់សញ្ញាបត្រដល់និស្សិតផ្នែកសុខាភិបាល មកពីសាកលវិទ្យាល័យពុទ្ធិសាស្ត្រ ប្រមាណ ១,៣៥៦នាក់ នៅមជ្ឈមណ្ឌលកោះពេជ្រ រាជធានីភ្នំពេញ នៅព្រឹកថ្ងៃទី០៦ ខែមិថុនា ឆ្នាំ២០១៩ ។
សម្តេចតេជោ បានបញ្ជាក់ថា គ្រាន់តែធ្វើស្រូវអង្ករមែនទែន ក៏ធ្លាក់ថ្លៃ ជួបបញ្ហាទៅហើយ។ ដូច្នេះចុះទម្រាំផលិតជាអង្ករសិប្បនិម្មិត្ត គឺត្រូវការបច្ចេកវិទ្យា និងចំណាយច្រើនក្នុងការផលិតអង្ករសិប្បនិម្មិត្តនេះ។ជាមួយនឹងការប្រកាសថា មិនមានអង្ករសិប្បនិម្មិត្ត សម្តេចតេជោ ហ៊ុន សែន ក៏បានលើកឡើងពីបញ្ហាប្រឈមរបស់អង្ករកម្ពុជា ទៅនឹងប្រទេសជិតខាង ដូចជាថៃ និងវៀតណាម ដោយសារតែអង្ករកម្ពុជាយើង ប្រើប្រាស់ដើមទុនច្រើនក្នុងការផលិតស្រូវអង្ករ គឺថ្លៃជាងប្រទេសថៃ និងវៀតណាម។
សម្តេចតេជោ ហ៊ុន សែន បានអំពាវនាវឲ្យក្រសួងកសិកម្ម រុក្ខាប្រមាញ់ និងនេសាទ និងប្រជាកសិកម្ម ប្រើប្រាស់ជីធម្មជាតិ ដោយមិនប្រើជាតិគីមី លើដំណាំស្រូវ និងដំណាំដាំដុះ បន្លែផ្លែឈើទាំងអស់។ ខាងកាំកុងត្រូល ក៏ត្រូវដើរតួនាទីមួយដែរ ក្នុងការប្រើប្រាស់ជាតិគីមី ដែលឈានដល់ការបំផ្លាញសុខភាពប្រជាពលរដ្ឋរបស់យើង។ រីឯប្រជាពលរដ្ឋយើង ក៏កុំទិញបន្លែត្រីសាច់ណា ដែលមានជាតិគីមី៕
