នៅសាលាឃុំអូរសារាយ ស្រុកត្រាំកក់ ខេត្តតាកែវ រដ្ឋបាលខេត្តតាកែវ និងក្រសួងរៀបចំដែនដី នគរូបនីយកម្ម និងសំណង់ បានរៀបចំបើកកិច្ចប្រជុំសម្របសម្រួលដោះស្រាយបញ្ចប់វិវាទដីធ្លីដ៏រ៉ាំរ៉ៃមួយដែលអូសបន្លាយជាយូរមកហើយ រវាងប្រជាពលរដ្ឋចំនួន៤៥គ្រួសារ រស់នៅភូមិឫស្សីមួយគុម្ព ឃុំអូរសារាយ ស្រុកត្រាំកក់ ខេត្តតាកែវ ដែលទាមទារដីចំនួន៧២ហិកតាពីឈ្មោះ ទេព សុខន និង តូច រ៉ាន់វ៉ា ក្រោមអធិបតីភាពរបស់លោក វ៉ី សំណាង អភិបាលនៃគណៈអភិបាលខេត្តតាកែវ លោក សុំ មនោរម្យ នាយករងខុទ្ទកាល័យក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី០១ ខែមេសា ឆ្នាំ២០២៥ ដោយមានការចូលរួមពីអភិបាលរងខេត្តតាកែវ ប្រធាន-អនុប្រធានមន្ទីរអង្គភាពពាក់ព័ន្ធ អភិបាល-អភិបាលរងស្រុកត្រាំកក់ កងកម្លាំងប្រដាប់អាវុធ មន្ត្រីរាជការពាក់ព័ន្ធ និងប្រជាពលរដ្ឋចូលរួមផងដែរ។
ថ្លែងក្នុងពិធីនោះ លោក វ៉ី សំណាង បានលើកឡើងពីការយកចិត្តទុកដាក់របស់ថ្នាក់ដឹកនាំរាជរដ្ឋាភិបាល ក្រសួងពាក់ព័ន្ធ និងអាជ្ញាធរមូលដ្ឋាន ក្នុងការដោះស្រាយរាល់ទុក្ខលំបាករបស់បងប្អូនប្រជាពលរដ្ឋ។ជាពិសេសបញ្ហាពាក់ព័ន្ធទៅនឹងករណីទំនាស់ដីធ្លី ដោយធ្វើយ៉ាងណាស្វែងរកដំណោះស្រាយ ឲ្យបានឆាប់រហ័សជូនបងប្អូនប្រជាពលរដ្ឋ។ ករណីសំណើអន្តរាគមន៍របស់បងប្អូនប្រជាពលរដ្ឋទាំង៤៥គ្រួសារនៅពេលនេះ ត្រូវបានថ្នាក់ដឹកនាំក្រសួងរៀបចំដែនដី និងអាជ្ញាធរខេត្តតាកែវ បានធ្វើការសម្របសម្រួល និងដោះស្រាយបញ្ចប់ទំនាស់រួចរាល់ហើយ។ ក្រោមគោលនយោបាយឈ្នះឈ្នះរបស់សម្ដេចតេជោ ហ៊ុន សែន ភាគីពាក់ព័ន្ធទាំងអស់បានឈានដល់ការឯកភាពគ្នា ដោយភាគីអ្នកទិញត្រូវប្រគល់ថវិកាដែលបានព្រមព្រៀងគ្នា ទៅឱ្យបងប្អូនប្រជាពលរដ្ឋជាម្ចាស់ដីទៅតាមទំហំដី ដែលមន្ត្រីសុរិយោដីចុះទៅវាស់វែងនៅទីតាំងដោយផ្ទាល់ និងដោយមានការចូលរួមពីប្រជាពលរដ្ឋជាម្ចាស់ដីផងដែរ។
ទន្ទឹមនឹងនេះ លោក វ៉ី សំណាង ក៏បានធ្វើការណែនាំដល់មន្ត្រីសុរិយោដី ដែលចុះទៅធ្វើការវាស់វែងដីរបស់បងប្អូនប្រជាពលរដ្ឋ ត្រូវធ្វើការប្រកបដោយការទទួលខុសត្រូវខ្ពស់ មានតម្លាភាព និងជៀសវាងដាច់ខាតការចុះវាស់វែងដោយលម្អៀង។ ហើយបើមានបញ្ហាខុសប្រក្រតីកើតឡើង មន្ត្រីដែលប្រព្រឹត្តនឹងទទួលខុសត្រូវចំពោះមុខច្បាប់៕ មន្ទីរព័ត៌មានខេត្តតាកែវ
