ភ្នំពេញ:នៅថ្ងៃនៅថ្ងៃពុធ-សុក្រថ្ងៃទី៤-៦ ខែកុម្ភៈ ឆ្នាំ២០២៦ មន្រ្តីសាខា ក.ប.ប. ខេត្តចំនួន ៤ គឺខេត្តកំពង់ធំ ខេត្តព្រះសីហនុ ខេត្តពោធិ៍សាត់ និងខេត្តកណ្ដាល បានបន្តនូវការសហការជាមួយមន្រ្តីនៃមន្ទីរពាណិជ្ជកម្ម និងមន្រ្តីនៃមន្ទីរអប់រំ យុវជន និងកីឡាខេត្ត បន្តចុះអប់រំផ្សព្វផ្សាយស្តីពីសុវត្ថិភាពម្ហូបអាហារ កិច្ចការពារអ្នកប្រើប្រាស់ កិច្ចការប្រកួតប្រជែង កម្មវិធី CCF Complaint App និងផលប៉ះពាល់នៃគ្រឿងញៀន ជូនដល់លោកគ្រូ អ្នកគ្រូសិស្សានុសិស្ស និងអាជីវករលក់ដូរនៅក្នុងសាលាចំនួន ៤សាលា គឺ ១.វិទ្យាល័យបុស្សវែង ស្ថិតនៅក្នុងស្រុកស្រុកប្រាសាទបល្ល័ង្ក ខេត្តកំពង់ធំ ដែលមានអ្នកចូលរួមចំនួន ៣៣៣នាក់ និង ២.វិទ្យាល័យស្ទឹងហាវ ស្ថិតនៅក្នុងស្រុកស្ទឹងហាវ ខេត្តព្រះសីហនុ ដែលមានអ្នកចូលរួមចំនួន ៧២០នាក់ ៣.បឋមសិក្សានិងអនុវិទ្យាល័យដូវជ្រុំ ស្ថិតនៅក្នុងភូមិត្រាំសេះ ឃុំបត់កណ្ដាល ស្រុកបាកាន ខេត្តពោធិ៍សាត់ ដែលមានអ្នកចូលរួមចំនួន ២៨៨នាក់ និង ៤.វិទ្យាល័យហ៊ុនសែនព្រែកស្ដី ស្ថិតនៅក្នុងភូមិព្រែងស្ដី ឃុំព្រែកស្ដី ស្រុកកោះធំ ខេត្តកណ្ដាល ដែលមានអ្នកចូលរួមចំនួន ១០០៥នាក់ផងដែរ។
នៅក្នុងវគ្គអប់រំ ផ្សព្វផ្សាយនេះ មន្រ្តីជំនាញបានធ្វើការណែនាំអំពីការជ្រើសរើស ការពិនិត្យម្ហូបអាហារដែលមានសុវត្ថិភាព និងអាហារូបត្ថម្ភដែលមានគុណភាពល្អសម្រាប់បរិភោគប្រចាំថ្ងៃ ព្រមទាំងបានចែកផ្ទាំងរូបភាពផ្សព្វផ្សាយ (Poster) អំពីសុវត្ថិភាពម្ហូបអាហារ ប្រមាណជាង ៨៣៥សន្លឹកផងដែរ។ សង្កត់ធ្ងន់ក្នុងពិធីនោះ មន្រ្តីជំនាញក៏បានធ្វើការណែនាំដល់សិស្សានុសិស្ស ឱ្យមានការប្រុងប្រយ័ត្នខ្ពស់ក្នុងការទទួលទាននូវភេសជ្ជៈដែលមានជាតិស្ករខ្ពស់ និងមានជាតិផ្អែមខ្លាំង ព្រោះបណ្ដាលឱ្យកើតជំងឺលើសសម្ពាធឈាម និងជំងឺទឹកនោមផ្អែម ជាយថាហេតុ។
ទន្ទឹមនឹងនោះ មន្ត្រីជំនាញក៏បានផ្សព្វផ្សាយបន្ថែមអំពីផលលំបាក និងគ្រោះថ្នាក់នៃការប្រើប្រាស់គ្រឿងញៀន, គ្រឿងញៀនជាគ្រោះថ្នាក់ធ្ងន់ធ្ងរដល់សង្គមជាតិទាំងមូល។
