ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូនបានប្រកាសឲ្យដឹងថា ក្រសួងមានគោលការណ៍ច្បាស់លាស់ក្នុងការសាងសង់ និងជួសជុលថែទាំផ្លូវថ្នល់ ពោលគឺទទួលយកតែផ្លូវណាដែលត្រូវបានសាងសង់ និងជួសជុល មានគុណភាព និងជាប់បានយូរប៉ុណ្ណោះ។
លោកទេសរដ្ឋមន្ត្រី ស៊ុន ចាន់ថុល បានប្រកាសបែបនេះ ក្នុងពិធីបើកសិក្ខាសាលាស្ដីពី បច្ចេកទេសការជួសជុលផ្លូវថ្នល់ ប្រើវិធីសាស្ត្រ Cold in Place Recycling ដោយមានការចូលរួមពីស្ថាប័នពាក់ព័ន្ធ និងមន្ត្រីបច្ចេកទេសនៃក្រសួងសាធារណការ និងដឹកជញ្ជូន កាលថ្ងៃទី០១ ខែសីហា ឆ្នាំ២០១៩ ។
សូមបញ្ជាក់ថា សិក្ខាសាលានេះ មានគោលបំណងបណ្ដុះបណ្ដាល បំពាក់បំប៉ននូវចំណេះដឹងថ្មី ចំណេះធ្វើ និងបទពិសោធន៍ថ្មីៗ បន្ថែមលើចំណេះដឹងដែលមានស្រាប់ជូនដល់មន្ត្រីពាក់ព័ន្ធនៃក្រសួងសំដៅពង្រីក និងពង្រឹងសមត្ថភាពមន្ត្រីក្នុងការសាងសង់ និងជួសជុលថែទាំផ្លូវថ្នល់តាមវិធីសាស្រ្តថ្មី ស្របតាមការរីកចម្រើនផ្នែកបច្ចេកវិទ្យាក្នុងការសាងសង់ផ្លូវឱ្យបានមាំ និងជាប់បានយូរ។
លោកទេសរដ្ឋមន្ត្រីបានបង្ហាញថា ការអភិវឌ្ឍសមត្ថភាពមន្ត្រីរាជការ គឺជាអាទិភាពទី១ ក្នុងវិស័យអាទិភាពទាំងបួននៃគោលនយោបាយចតុកោណដំណាក់កាលទី៤ របស់រាជរដ្ឋាភិបាល ព្រោះថាមន្ត្រីមានសមត្ថភាពគ្រប់គ្រាន់ ស្ថាប័ននឹងមានការរីកចម្រើន ហើយប្រទេសជាតិក៏មានការរីកចម្រើនតាមនោះដែរ ជាពិសេស សមត្ថភាព និងទេពកោសល្យ លើការសាងសង់ និងជួសជុលថែទាំផ្លូវថ្នល់ឱ្យមានគុណភាព មាំ និងជាប់បានយូរអង្វែង។
លោកស៊ុន ចាន់ថុល បានផ្ដាំផ្ញើសិក្ខាកាមទាំងអស់ឱ្យយកចិត្តទុកដាក់ក្នុងការត្រងត្រាប់ស្តាប់ការធ្វើបទបង្ហាញរបស់វាគ្មិន សំដៅក្រេបយកចំណេះដឹងថ្មីឱ្យបានច្រើនបំផុតតាមដែលអាចធ្វើបាន ព្រោះថាចំណេះដឹងទាំងនេះនឹងបម្រើដល់ការសាងសង់ និងជួសជុលផ្លូវថ្នល់យើងឱ្យបានមាំ និងប្រើប្រាស់បានយូរអង្វែង។ ធ្វើផ្លូវបានមាំ និងជាប់បានយូរអង្វែង គឺជាការសន្សំសំចៃការចំណាយថវិកាជាតិ៕
