(កំពង់ចាម)៖ ព្រះករុណា ព្រះបាទព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នាវេលាព្រឹកថ្ងៃទី២៧ ខែធ្នូ ឆ្នាំ២០១៩ បានសព្វព្រះរាជហឫទ័យយាងចែកព្រះរាជអំណោយដល់ប្រជាកសិករក្រីក្រ លោកគ្រូ អ្នកគ្រូ សិស្សានុសិស្ស និងក្រុមគ្រូពេទ្យ នៅតាមដងទន្លេតូច ស្ថិតក្នុងភូមបឹងទឹង ឃុំទងត្រឡាច ស្រុកស្រីសន្ធរ ខេត្តកំពង់ចាម។
ប្រជាកសិករក្រី ដែលទទួលបានព្រះរាជអំណោយមានចំនួន៤៦០គ្រួសារ ដោយក្នុងមួយគ្រួសារៗទទួលបាន អង្ករ៥០គីឡូក្រាម ឃីត១កញ្ចប់ (មានមុង១ ភួយ១ សារុង១ និងក្រមា១), មី១កេស ត្រីខ១០កំប៉ុង, អំពូលភ្លើងប្រើថាមពលពន្លឺព្រះអាទិត្យ១គ្រឿង, ស្បែកជើងផ្ទាត់១គូ, អាវយឺត១ និងអាវរងារ១ ដែលមានស្លាកព្រះរាជអំណោយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា, ថវិកា១សែនរៀល និងអាហារសម្រន់ពេលព្រឹកផងដែរ។
ក្នុងព្រះរាជពិធីនេះដែរ ព្រះករុណាជាអម្ចាស់ជីវិតលើត្បូង ក៏បានប្រោសព្រះរាជទានព្រះរាជអំណោយដល់លោកគ្រូ អ្នកគ្រូចំនួន៦នាក់ ដោយក្នុងម្នាក់ៗទទួលបានឃីត១កញ្ចប់ (មានមុង១, ភួយ១, សារុង១ និងក្រមា១) អាវយឺត១ និងអាវរងារ១ ដែលមានស្លាកព្រះរាជអំណោយ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងថវិកា១សែនម៉ឺនរៀល។
ចំណែកសិស្សានុសិស្សចំនួន២៧០នាក់ ទទួលបានអាហារពេលព្រឹកមួយពេលមានទឹកបរិសុទ្ធ១ដប, ទឹកក្រូច១កំប៉ុង, មីចាន២, នំប៉ាវ១, នំផ្អែម១កញ្ចប់ និងផ្លែប៉ោម១ផ្លែ ព្រមទាំងសម្លៀកបំពាក់មួយសម្រាប់ អាវយឺតមានស្លាកព្រះរាជអំណោយព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចំនួន១ ថវិកា៥.០០០រៀល និងសម្ភារៈសិក្សាមួយចំនួនផងដែរ។
ដោយឡែកសម្រាប់ក្រុមគ្រូពេទ្យចំនួន៦នាក់ ក្នុងម្នាក់ៗទទួលបាន ឃីត១កញ្ចប់ (មានមុង១, ភួយ១, សារុង១ និងក្រមា១) អាវយឺត១ និងអាវរងារ១ ដែលមានស្លាកព្រះរាជអំណោយព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងថវិកា១សែនរៀល៕
