(ភ្នំពេញ)៖ ប្រជាពលរដ្ឋបានរិះគន់លោក យូ ប៊ុនឡេង ប្រធានសាលាឧទ្ធរណ៍ភ្នំពេញ ប្រឹងពន្លឿនសវនាការ ដើម្បីយកដីពីប្រជាពលរដ្ឋក្រីក្រ រស់នៅក្នុងខណ្ឌសែនសុខ រាជធានីភ្នំពេញ ដោយមិនខ្វល់ពីផលប្រយោជន៍ច្បាប់។
ការរិះគន់បែបនេះ កើតឡើងបន្ទាប់ពីមន្ត្រីតុលាការម្នាក់ នារសៀលថ្ងៃទី២២ ខែកុម្ភៈ ឆ្នាំ២០២០នេះ បានយកដីកាកោះរបស់សាលាឧទ្ធរណ៍ ជូនដំណឹងអំពីសវនាការបែបតក់ក្រហល់ក្នុងសំណុំរឿងវិវាទដីធ្លីដ៏រាំរ៉ៃ ដែលបង្កើតជារឿងអយុត្តិធម័ចំពោះជនក្រីក្រ ស្លូតត្រង់។
លោក ឃិន សាមន អាយុ៥៧ឆ្នាំ មានទីលំនៅបច្ចុប្បន្នផ្ទះលេខ១០១៩ ភូមិអន្លង់ក្ងាន សង្កាត់ឃ្មួញ ខណ្ឌឫស្សីកែវ រាជធានីភ្នំពេញ បានមានប្រសាសន៍ប្រាប់ Daily Khmer នៅរសៀលថ្ងៃនេះថា ដីកាកោះរបស់លោកស្រី ទិតសុទ្ធី បូរ៉ាល័ក្ខណ៍ ចៅក្រមសាលាឧទ្ធរណ៍ ចុះថ្ងៃទី២៩ ខែមករា ឆ្នាំ២០២០ ប៉ុន្តែទើបតែយកមកជូនគាត់នៅវេលាម៉ោង៣ និង១៥នាទី រសៀលសៅរ៍ ថ្ងៃទី២២ ខែកុម្ភៈ ឆ្នាំ២០២០ ដោយជូនដំណឹងអំពីសវនាការបែបតក់ក្រហល់នេះ។
យោងតាមដីកាកោះ បានឲ្យដឹងថា សវនាការក្នុងបណ្តឹងសុំជំនុំជម្រះឡើងវិញ នូវអំពើអយុត្តិធម៌នេះ នឹងចាប់ផ្តើមនៅវេលាម៉ោង៨ និង៣០នាទីព្រឹក ថ្ងៃទី២៤ ខែកុម្ភៈ ឆ្នាំ២០២០ ជាកំហិត និងមិនមានការលើកលែងឡើយ។
លោក ឃិន សាមន បានប្រាប់ Daily Khmer ថា មន្ត្រីសាលាឧទ្ធរណ៍ម្នាក់ បានយកដីកាកោះនេះប្រគល់ឲ្យលោក នៅវេលាម៉ោង៣ និង១៥នាទី រសៀល ថ្ងៃទី២២ ខែកុម្ភៈ ឆ្នាំ២០២០ ប៉ុន្តែបែរសរសេរបញ្ជាក់ថា ប្រគល់ឲ្យនៅថ្ងៃទី២១ ខែកុម្ភៈ ឆ្នាំ២០២០ទៅវិញ។
ឯកឧត្តម ទូច ថាវិទ្ធ ប្រធានលេខាធិការដ្ឋាន និងជាអ្នកនាំពាក្យសាលាឧទ្ធរណ៍ បានបដិសេធមិនធ្វើអត្ថាធិប្បាយនឹងសំណួររបស់ Daily Khmer ពាក់ព័ន្ធនឹងរបៀបធ្វើការរបស់មន្ត្រីសាលាឧទ្ធរណ៍។
កន្លងមកលោក ឃិន សាមន ដែលជាជនរងគ្រោះក្នុងអំពើអយុត្តិធម៌ រហូតបាត់បង់ទ្រព្យសម្បត្តិស្ទើរគ្មានសល់ នៅក្នុងខណ្ឌសែនសុខ រាជធានីភ្នំពេញ បាននិយាយប្រាប់អ្នកសារព័ត៌មានថា លោក យូ ប៊ុនឡេង ប្រធានសាលាឧទ្ធរណ៍រាជធានី ភ្នំពេញ បាននិងកំពុងធ្វើឲ្យគ្រួសារគាត់រងទុក្ខវេទនា ឈឺចាប់ ព្រោះតែទង្វើរបស់អ្នកច្បាប់។
បាននិយាយនៅថ្ងៃទី៤ ខែមករា ឆ្នាំ២០២០នេះថា ចៅក្រមនៅសាលាឧទ្ធរណ៍ ដែលស្ថិតក្រោមការត្រួតត្រាពីលោក យូ ប៊ុនឡេង ដែលប្រធានស្ថាប័នសាលាជម្រះក្តីមួយនេះ បានយកសំណុំរឿងក្តីក្នុងវិវាទដីធ្លីរបស់គាត់ អូសបន្លាយអស់ពេលជាង១១ឆ្នាំកន្លង ដើម្បីកេងយកផលប្រយោជន៍ផ្ទាល់ខ្លួន ទាំងបំពានច្បាប់ជាតិ។
បុរសរូបនេះ បាននិយាយទៀតថា «រឿងក្តីរបស់ខ្ញុំបានកើតឡើង តាំងពីថ្ងៃទី១២ ខែមិថុនា ឆ្នាំ២០០៩មកម្លេះ ហើយខ្ញុំបានទទួលភាពអយុត្តិធម៌ជាង១០ឆ្នាំ ក្រោមការអនុវត្តទាំងបំពានច្បាប់របស់លោក ឌុច គឹមសន អតីតចៅក្រមសាលាដំបូងរាជធានីភ្នំពេញ បានចេញដីកាសម្រេចលក់ដីរបស់ខ្ញុំ ដែលមានទំហំជាងមួយហិកតា ក្នុងតម្លៃថោកបំផុត គឺទាបជាងប្រាក់ ខ្ញុំជំពាក់ឈ្មោះ គង់ ហួត ទៅទៀត»។
ដោយសារអំពើអយុត្តិធម៌នេះ លោក ឃិន សាមន បាននិយាយ ប្រាប់ទៀតថា «ខ្ញំបានលក់ជ្រូក លក់គោ ដើម្បីរឿងក្តីនេះ។ គោរបស់ខ្ញុំជាង១០ក្បាល លក់ហើយ គ្មានសល់អ្វីទៀតទេ។ ដោយសារអំពើអយុត្តិធម៌បែបនេះ»។
បន្ទាប់មកទៀត លោកបានដាក់ពាក្យប្តឹងទៅសាលាឧទ្ធរណ៍ ហើយត្រូវបានលោកចៅក្រម ចាយ ច័ន្ទតារាវណ្ណ ជាប្រធានក្រុមប្រឹក្សា និងមានលោកចៅក្រម ស៊ិន វិសាល និងលោកស្រីចៅក្រម ទិតសុទ្ធី បូរ៉ាល័ណ្ខណ៍ ចេញដីកាសម្រេច ចុះថ្ងៃទី២៧ ខែមីនា ឆ្នាំ២០១៩ ដោយទទួលស្គាល់ថា ដីកា លេខៈ ៣៦៧ តរ ចុះថ្ងៃទី២៨ ខែកុម្ភៈ ឆ្នាំ២០១១ របស់លោកចៅក្រម ឌុច គឹមសន ពិតជាពុំបានបំពេញតាមមាត្រា៤៤៤ និង៣០៣ នៃក្រមនីតិវិធីរដ្ឋប្បវេណី ដែលចែងយ៉ាងច្បាស់ថា ការរាល់ការលក់ ត្រូវជូនដំណឹងឲ្យម្ចាស់ដីដឹងជាមុនសិន។ ប៉ុន្តែករណីនេះ លោកចៅក្រម ឌុច គឹមសន មិនបានអនុវត្តតាមច្បាប់ចែងខាងលើនេះឡើយ។
ចំណែក លោក យូ ប៊ុនឡេង ជាប្រធានសាលាឧទ្ធរណ៍ នៅថ្ងៃទី២៩ ខែឧសភា ឆ្នាំ២០១៩ ក៏បានចុះហត្ថលេខាលើដីកាសម្រេចលោកចៅក្រម ចាយ ច័ន្ទតារាវណ្ណ និងចុះហត្ថលេខាលើលិខិតបញ្ជាក់ពីការចូលស្ថាពរនៃសាលដិកានេះទៀតផង។
ដើម្បីអនុវត្តតាមដីកាសម្រេចចូលជាស្ថាពរខាងលើនេះ និងដើម្បីរក្សាដីកុំឲ្យលក់បន្តទៀត លោក ឃិន សាមន នៅឆ្នាំ២០១៨ បានដាក់ពាក្យបណ្តឹងទៅសាលាដំបូង រាជធានីភ្នំពេញ ដើម្បីសុំដីការក្សាការពារ មិនឲ្យឈ្មោះ គង់ ហួត មិនឲ្យលក់ ផ្ទេរ ឬធ្វើអំណោយផ្សេងៗបន្តទៀត។ លោកចៅក្រមសាលាដំបូងរាជធានីភ្នំពេញ ដែលមានលោក តាំង ស៊ុនឡាយ ជាប្រធាន បានចេញដីកាលេខៈ ២៤៦ ”ថ”ដរ ចុះថ្ងៃទី២០ ខែមិថុនា ឆ្នាំ២០១៩ ហាមឃាត់មិនឲ្យលក់ ផ្ទេរ ឬធ្វើអំណោយផ្សេងៗឡើយ។
លោក ឃិន សាមន បានរៀបរាប់ទៀតថា ក្រោយមកទៀត ដីទំហំជាងមួយហិកតានេះ ត្រូវបានគេលួចលក់បន្តដោយខុសច្បាប់ឲ្យអ្នកផ្សេង ដែលមន្ត្រីនៅមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ ប្រាប់ខ្សឹបប្រាប់គាត់ថា «លក់ទៅបុរសម្នាក់ ជាក្មួយរបស់លោក យូ ប៊ុនឡេង ប្រធានសាលាឧទ្ធរណ៍ ដូច្នេះ ទើបចៅក្រមក្រោមបង្គាប់នៅសាលាឧទ្ធរណ៍ កាលពីថ្ងៃ២៥ ខែធ្នូ ឆ្នាំ២០១៩ បានលុបចោលវិញ នូវដីការក្សាការពាររបស់សាលាដំបូងរាជធានីភ្នំពេញ»។
ពាក់ព័ន្ធនឹងការលើកឡើងចំពោះអំពើអយុត្តិធម៌នេះ លោក យូ ប៊ុនឡេង មិនអាចសុំការបំភ្លឺបាននៅឡើយទេ។ ចំណែកលោក ទូច ថារិទ្ធ អគ្គលេខាធិការ និងជាអ្នកនាំពាក្យសាលាឧទ្ធរណ៍ នៅល្ងាចថ្ងៃទី៤ ខែកុម្ភៈ ឆ្នាំ២០២០នេះ បានបដិសេធមិនធ្វើអត្ថាធិប្បាយនឹងសំណួររបស់អ្នកកាសែតដែរ៕
