បេក្ខជន៨នាក់ប្រកួតប្រជែងយកតំណែងប្រធានអង្គការពាណិជ្ជកម្មពិភពលោក

អង្គការពាណិជ្ជកម្មពិភពលោក (World Trade Organization) ដែលហៅកាត់ថា WTO នឹងរៀបចំការបោះឆ្នោតជ្រើសរើសប្រធាន ថ្មីនៅដំណាច់ខែសីហាខាងមុខ ខណៈដែលលោក Roberto Azevedo ដែលជាអគ្គលេខាធិការរបស់អង្គការនេះបច្ចុប្បន្នត្រូវបញ្ចប់អាណត្តិរបស់ខ្លួន នេះបើតាមការចុះផ្សាយរបស់ NHK World-Japan ។

បេក្ខជនមកពីប្រទេសចំនួន១៦៤ ដែលជាប្រទេសសមាជិករបស់អង្គការនេះ អាចដាក់ពាក្យប្រកួតប្រជែងយកតំណែងនេះបាន ហើយគិតត្រឹមថ្ងៃទី៩ ខែកក្កដា ឆ្នាំ២០២០នេះ មានបេក្ខជនចំនួន៨នាក់ មកពីប្រទេស កូរ៉េខាងត្បូង នីហ្ស៊េរីយ៉ា ម៉ិកស៊ិក អង់គ្លេស អេហ្ស៊ីប ម៉ូលដូវ៉ា កេនយ៉ា និងប្រទេសអារ៉ាប៊ី សាអ៊ូឌីត ។

អ្នកនាំពាក្យអង្គការ WTO បានប្រកាសថា បេក្ខជនទាំង៨នាក់ នឹងឡើងបង្ហាញទស្សនៈរបស់ខ្លួននៅក្នុងអង្គប្រជុំរបស់អង្គការនេះ នៅសប្តាហ៍ក្រោយ ប៉ុន្តែគេមិនទាន់ច្បាស់ទេថា អគ្គលេខាធិការរបស់អង្គការនេះបច្ចុប្បន្ន លោក Roberto Azevedo អាចនឹងត្រូវបានជ្រើសរើសឲ្យបន្តតំណែង ៕