ភ្នំពេញ៖ លោក ឡេង ចាន់វីរៈ ឯកអគ្គរាជទូតកម្ពុជាប្រចាំប្រទេសហ្វីលីពីន នៅថ្ងៃទី០៨ ខែធ្នូ ឆ្នាំ២០២០នេះ បានបរិច្ចាគថវិកាចំនួន៣០០០ដុល្លារ ដើម្បីចូលរួមគាំទ្រកម្មវិធីទិញវ៉ាក់សាំងកូវីដ-១៩ របស់សម្តេចអគ្គមហាសេនាបតីតេជោ ហ៊ុន សែន សម្រាប់ចាក់ជូនពលរដ្ឋកម្ពុជា។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃនេះ បានសរសេរដោយផ្ទាល់នៅលើផេកហ្វេសប៊ុក ដើម្បីថ្លែងអំណរគុណចំពោះសប្បុរសជន ដែលចូលរួមជាថវិកាសម្រាប់ទិញវ៉ាក់សាំងការពារកូវីដ-១៩ ដែលសប្បុរសជនខ្លះបានបរិច្ចាគទឹកប្រាក់រហូតដល់ម្នាក់ៗចំនួន៣លានដុល្លារអាមេរិក។
ព្រមជាមួយគ្នានេះដែរ សម្តេចតេជោ ហ៊ុន សែន ក៏បានធ្វើលិខិតថ្លែងអំណរគុណជាបន្តបន្ទាប់ និងបានសរសេរដោយផ្ទាល់ក្នុងផេកផ្លូវការរបស់សម្តេច នូវឃ្លាដ៏មានអត្ថន័យថា៖ «នេះជាមោទនភាពនៃជាតិយើង ដែលចេះជួយគ្នាក្នុងគ្រាលំបាក»។
សូមរំឭកថា សម្តេចតេជោ ហ៊ុន សែន នៅល្ងាចថ្ងៃទី០៧ ខែធ្នូ ឆ្នាំ២០២០ បានប្រកាសពីការត្រៀមបម្រុងថវិកា សម្រាប់ទិញវ៉ាក់សាំងយកមកចាក់ជូនប្រជាជនកម្ពុជាដោយឥតគិតថ្លៃ នូវជំហានដំបូងចំនួន១លានដូស ដើម្បីចាក់ប្រជាពលរដ្ឋប្រមាណ៥សែននាក់៕
