AFP កាលពីពេលថ្មីៗកន្លងមកផ្សាយថា ប៉ូលិសម៉ារ៉ុកបានចាប់ខ្លួនយុវជន៦នាក់អាយុពី១៥ដល់១៧ឆ្នាំ ដែលចាប់សុដន់នារីម្នាក់នៅលើរថយន្តក្រុង និងសើចក្អាកក្អាយ នៅក្រុង Casablanca ប្រទេសម៉ារ៉ុក ។
វីដេអូឃ្លីបបានផ្សាយតាមវេបសាយកាលពីថ្ងៃទី២០ សីហា ២០១៧ បង្ហាញឱ្យឃើញយុវជនទាំងនោះចាប់សុដន់របស់នារីម្នាក់ដែលទួញយំប្រកបដោយការភ័យខ្លាច ។
ចំពោះអ្នកបើកបររថយន្តមិនបានឈប់ ដើម្បីបន្ទច់បង្អាក់ការបៀតបៀននោះទេ ។ រឿងហេតុនោះកើតឡើងកាលពីថ្ងៃទី១៨ សីហា ២០១៧ នៅលើរថយន្តក្រុង ។ នារីដែលទទួលរងការយាយីនោះអាយុ២៤ឆ្នាំ ជាមនុស្សមានជំងឺផ្លូវចិត្ត ឬសរសៃប្រសាទ ។
រឿងអាស្រូវប្រភេទនេះ រមែងកើតឡើងជារឿយៗ ជាក់ស្តែងកាលពីប៉ុន្មានសប្តាហ៍មុន យុវជនមួយក្រុមបានចាប់រំលោភស្ត្រីម្នាក់ពេលដើរម្នាក់ឯងនៅក្រុងថេនជៀភាគខាងជើងប្រទេសម៉ារ៉ុក ។ នៅពេលវីដេអូឃ្លីបផ្សព្វផ្សាយបង្កឱ្យមានអាការរិះគន់ខ្លាំង ។
រឿងចុងក្រោយនេះបានផ្សាយតាមហ្វេសប៊ុក ហើយមានការអំពាវនាវឱ្យអាជ្ញាធរចាប់យុវជនទាំងនោះទៅដាក់ទោស ។
តាមតួលេខរបស់អាជ្ញាធរបញ្ជាក់ថា ប្រហែល២ភាគ៣នៃស្ត្រីម៉ារ៉ុកធ្លាប់មានបទពិសោធន៍ត្រូវបៀតបៀនកេរ្តិ៍ខ្មាស និងរំលោភជាច្រើនលើកនៅទីសាធារណៈ ៕