ភ្នំពេញ៖ រដ្ឋមន្រ្តីក្រសួងព័ត៌មាន ខៀវ កាញារីទ្ធ អនុញ្ញាតអោយ រដ្ឋលេខាធិការក្រសួងព័ត៌មាន សាម៉ន បណ្ឌិត្យ និង សហការី នៅព្រឹកថ្ងៃទី ១៥ ខែវិច្ឆិកា ឆ្នាំ២០២១ មានឱកាសចូលជួបសម្តែងការគួរសម និងពិភាក្សាការងារ នៅទីស្តីការក្រសួង ហើយជំនួបនេះ ទទួលបាននូវឱវាទល្អៗពីថ្នាក់ដឹកនាំ ក្នុងនាមយុវជននិងជាទំពាំងស្នងឬស្សី សម្រាប់ប្រទេសជាតិ។
រដ្ឋលេខាធិការក្រសួងព័ត៌មាន សាម៉ន បណ្ឌិត្យ បានបញ្ជាក់ប្រាប់សារព័ត៌មាន ដេលីខ្មែរថា «ថ្ងៃនេះយើងខ្ញុំក្នុងនាមយុវជនជំនាន់ក្រោយបានដឹកនាំ សហការី ជាយុវជន ជួបថ្នាក់ដឹកនាំ គឺមានតម្លៃធំណាស់ ដោយបានទទួលនូវអនុសាសន៍ល្អៗពីថ្នាក់ដឹកនាំស្ថាប័នដែលយើងខ្ញុំកំពុងតែបម្រើការងារ ជាពិសេស ឯកឧត្តម រដ្ឋមន្រ្តីបាន ណែនាំដំប៉ូន្មានល្អៗ ដើម្បីជាត្រីវិស័យ តម្រង់ទិសដៅការងារបន្តទៀត ក្នុងនាមជាយុវជនជំនាន់ក្រោយ ត្រូវខិតខំរៀនសូត្រពីរៀមច្បងជំនាន់មុន និងអ្នកនៅជុំវិញខ្លួន ដើម្បីជាបទពិសោធន៍មួយសម្រាប់អភិវឌ្ឍន៍ខ្លួនទៅថ្ងៃអនាគត»។
លើសពីនេះ រដ្ឋលេខាធិការខាងលើបន្ថែមថា រៀងសំខាន់ថ្ងៃនេះគឺ សុំអនុសាសន៍ពីថ្នាក់ដឹកនាំជើងចាស់ សម្រាប់អភិវឌ្ឍន៍ការងារ គ្នុងនាមយុវជន ដែលជាស្នូលរបស់បក្ស និងជាភ្នែកច្រមុះរបស់រាជរដ្ឋាភិបាល ដើម្បីគាំទ្រគោលនយោបាយរបស់បក្ស ឲ្យកាន់តែខ្លាំងក្លាទៅមុខទៀត ហើយដូច្នោះនេះជាការចង្អុលបង្ហាញមួយ ឲ្យពួកយើងបន្តខិតខំប្រឹងប្រែង ការងារ ក្នុងនាមជាអ្នកបន្តវេន្ត ត្រូវរូបរួមគ្នា សាមគ្គីគ្នា បម្រើសង្គមជាតិនិងប្រជាជន។
