(រាជធានីភ្នំពេញ)៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» នៅព្រឹកថ្ងៃទី២៧ ខែធ្នូឆ្នាំ២០២១បានរៀបចំប្រជុំបូកសរុបលទ្ធផលការងារប្រចាំខែធ្នូ ឆ្នាំ២០២១ របស់អគ្គនាយកដ្ឋាន ក្រោមអធិបតីភាព លោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប.និងមានការចូលរួមពីឯកឧត្ដម លោក អគ្គនាយករង ប្រធាននាយកដ្ឋាន ប្រធានសាខា ក.ប.ប. រាជធានី ខេត្ត លោក លោកស្រី អនុប្រធាននាយកដ្ឋាន អនុប្រធានសាខា។
កិច្ចប្រជុំនាពេលនេះ ប្រតិភូរាជរដ្ឋាភិបាលកម្ពុជា ធ្វើវឌ្ឍនភាពការងារប្រចាំខែរបស់អគ្គនាយកដ្ឋាន និងការរាយការណ៍សង្ខេបរបស់នាយកដ្ឋាន និងសាខា ក.ប.ប. រាជធានី ខេត្ត ដើម្បីស្ដាប់នូវបញ្ហានានាដែលបានកើតមានឡើងក្នុងរយៈពេលអនុវត្តការងារកន្លងមក។
ក្នុងកិច្ចប្រជុំនេះ ប្រតិភូរាជរដ្ឋាភិបាលកម្ពុជា ក៏បានធ្វើការប្រគល់ប្រកាសស្ដីពីការតែងតាំងប្រគល់ភារកិច្ច និងសម្រួលភារកិច្ចមន្រ្តីរាជការស៊ីវិល ចំនួន ៥៤ រូប ព្រមទាំងបានផ្ដល់អនុសាសន៍ណែនាំដល់លោក លោកស្រី ដែលទទួលបានតែងតាំងថ្មីនិងសម្រួលភារកិច្ច ឱ្យខិតខំបំពេញការងារដោយការទទួលខុសត្រូវ ស្របតាមច្បាប់ជាធរមាន។
