ភ្នំពេញ៖ កាលពីវេលាម៉ោង១០យប់ ថ្ងៃទី១៥ ខែមករា ឆ្នាំ២០២២ ជនជាតិចិនមួយក្រុម ប្រដាប់ដោយអាវុធខ្លី បានបាញ់គំរាមដណ្តើមយកកាបូបលុយពីជនជាតិចិនពីរនាក់ប្តីប្រពន្ធ ដែលកំពុងបើកទ្វារចុះរថយន្តទល់មុខស្ថានទូតម៉ាឡេស៊ី តាមផ្លូវលេខ៤១ កែងផ្លូវនរោត្តម ភូមិ១០ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
អ្នកឃើញហេតុការណ៍នៅកន្លែងកើតហេតុ បានឲ្យដឹងថា នាវេលាម៉ោង៩ និង៣០នាទីយប់ បុរសជនជាតិចិនម្នាក់ ជាជនសង្ស័យ បានដើរចូលទៅអង្គុយលេងនៅក្នុងខុនដូ លុះដល់វេលាម៉ោង១០យប់ ជនជាតិចិនពីរនាក់ប្តីប្រពន្ធ ជិះរថយន្តទៅឈប់ខាងមុខខុនដូនោះ។
អ្នកដដែលនិយាយទៀតថា គ្រាន់តែអ្នកទាំងពីរបើកទ្វារចុះពីរថយន្ត ស្រាប់តែជនសង្ស័យម្នាក់នោះ បានស្ទុះទៅដោយយកកំប៉ុងស្ព្រៃបាញ់លើមុខជនរងគ្រោះ ដណ្តើម យកកាបូបលុយ ប៉ុន្តែជនរងគ្រោះដណ្តើមប្រតាយប្រតប់យកវិញ។ ពេលនោះ ស្រាប់តែលេចមុខជនសង្ស័យជាជនជាតិចិនពីរនាក់ផ្សេងទៀត រត់ចូល និងដកកាំភ្លើងវាយលើជនរងគ្រោះ ហើយបាញ់មួយគ្រាប់ឡើងលើតែមិនផ្ទុះ លុះបាញ់លើកទី២ ទើបផ្ទុះ ហើយដណ្តើមយកកាបូបលុយ រួចនាំគ្នារត់ឡើងជិះរថយន្តម៉ាក TUNTRA ពណ៌ខ្មៅ បើករត់គេចទៅបាត់ ដោយបន្សល់ទុកម៉ូតូមួយគ្រឿង ម៉ាកអ៊ែប្លែក ពណ៌ស ក្រហម ពាក់ស្លាកលេខ កំពង់ស្ពឺ 1F-7720 ដបស្ព្រៃចំនួនមួយ និងគ្រាប់កាំភ្លើងបាញ់ហើយមិនផ្ទុះមួយគ្រាប់ ។
ក្រោយកើតហេតុភ្លាម កម្លាំងអាវុធហត្ថខណ្ឌចំការមន និងកម្លាំងនគរបាលមូលដ្ឋាន បានមកពិនិត្យ សាកសួរអ្នកឃើញហេតុការណ៍នៅកន្លែងកើតហេតុ និងប្រមូលវត្ថុតាងបន្សល់ទុក ដើម្បីយកទៅរក្សាទុកសម្រាប់បន្តស្រាវជ្រាវចាប់ខ្លួនជនដៃដល់។ ចំណែកឯជនរងគ្រោះពីរនាក់ប្តីប្រពន្ធ បានទៅពេទ្យ ដើម្បីព្យាបាលរបួស៕
