ភ្នំពេញ ៖ សមត្ថកិច្ចជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួត ប្រជែង និងបង្រាបការក្លែងបន្លំ ក.ប.ប. សាខាខេត្តតាកែវ សហការជាមួយមន្ទីរពាណិជ្ជកម្មខេត្ត ដោយមានការអនុញ្ញាតិពីសំណាក់ព្រះរាជអាជ្ញា បានដុតកម្ទេច ចោល ទំនិញពុំមានអនុលោមភាព ចំនួន២ ៧០០.៦៦គីឡូក្រាម ស្ថិតនៅទីលានចាក់ សំរាមភូមិស្នោ សង្កាត់រកាក្នុង ក្រុងដូនកែវ ខេត្តតាកែវ កាលពីថ្ងៃទី១ ខែសីហា ឆ្នាំ២០២៣ ។
មន្រ្តីជំនាញ ក ប ប បានឲ្យដឹងថា ទំនិញខូចគុណភាពដែលសមត្ថកិច្ចជំនាញ ធ្វើការកម្ទេចចោល គឺសុទ្ធតែជាទំនិញដែលបានរកឃើញ និងដកហូតពីទីផ្សារកន្លងមក និងជាទំនិញងាយប៉ះពាល់ដល់សុខភាពអ្នកបរិភោគ ក៏ដូចជាអ្នកប្រើប្រាស់ជាដើម ។
សូមបញ្ជាក់ថា សមត្ថកិច្ចជំនាញ ក.ប.ប. តែងតែឃ្លាំពិនិត្យទំនិញ ជាប្រចាំនៅលើទីផ្សារ ឃ្លាំងស្កុក និងចែកចាយ សិប្បកម្ម ដើម្បីធានាការពារ សុខុមាលភាពប្រជាពលរដ្ឋ និងអនុវត្តច្បាប់លើធុរកិច្ចជន ដែលមិនគោរពច្បាប់ ៕
