ភ្នំពេញ: អាជ្ញាសាលាដំបូងរាជធានីភ្នំពេញ បានផ្អាកការចុះអនុវត្តសាលដីកា តុលាការកំពូល ដើម្បីរឹបអូសយកដីធ្លីរបស់យោធិនពិការម្នាក់ស្ថិតនៅភូមិឌួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញនៅថ្ងៃទី១៦ ខែឧសភា ឆ្នាំ២០១៩។
ការផ្អាកនេះគឺបន្ទាប់ពីមានលិខិតអន្តរាគមន៍របស់ខុទ្ទកាល័យសម្ដេចនាយករដ្ឋមន្ត្រីហ៊ុនសែនចំនួន បានដាក់ទៅរដ្ឋមន្ត្រី ក្រសួងយុត្តិធម៌និងប្រធានអាជ្ញាធរជាតិដោះស្រាយទំនាស់ដីធ្លី ឲ្យផ្អាកការអនុវត្តន៍ជាបណ្ដោះអាសន្ននៅក្នុងសំណុំរឿងអនុវត្តដោយបង្ខំលេខ៥៦ ចុះថ្ងៃទី២២ ខែមិថុនា ឆ្នាំ២០១៨ របស់សាលាដំបូងរាជធានីភ្នំពេញ ។
យោធិនពិការឈ្មោះ មាស សុផាត បានថ្លែងក្នុងសន្និសីទកាសែតថា លោកសង្ឃឹមថា បើមានលិខិតអន្តរាគមន៍ពីខុទ្ទកាល័យសម្ដេចនាយករដ្ឋមន្ត្រី ហ៊ុន សែន ទៅរដ្ឋមន្ត្រីក្រសួងយុត្តិធម៌និងប្រធានអាជ្ញាធរជាតិដោះស្រាយទំនាស់ដីធ្លី ឲ្យផ្អាកការអនុវត្តដោយបង្ខំក្នុងការយកដីរបស់លោក ហើយតុលាការនៅតែមានអ្នកចង់អនុវត្តដីការរបស់តុលាការកំពូល ដើម្បីឲ្យលោកចេញពីដីរបស់នេះ គឺលោកមិនមានអ្វីនឹងតតាំងនោះទេ មានតែសាំងពីរលីត្រចាក់ស្រោចខ្លួន ដើម្បីដុតសម្លាប់ខ្លួន ក្នុងការការពារដីរបស់ខ្លួនតែប៉ុណ្ណោះ។ ពីព្រោះបើទោះបីជាយើងតតាំងជាមួយគេក៏មិនឈ្នះគេដែរ ។
លោក មាស សុផាត បានថ្លែងថា មានតែសម្ដេចតេជោនិងរាជរដ្ឋាភិបាល ដែលបានជួយលោក និងអាជ្ញាធរមូលដ្ឋានដែលបានទទួលស្គាល់លោកពិតប្រាកដថារស់នៅលើដីនោះ ដែលជាហេតុធ្វើឲ្យលោកមានក្តីសង្ឃឹម។ ហើយលោកក៏មានក្តីសង្ឃឹមទៅលើតុលាការផងដែរ និងពិចារណាឡើងវិញទៅលើការអនុវត្តដីការបស់តុលាការកំពូល ក្នុងការយល់ដឹងរបស់លោកទៅឲ្យភាគីម្ខាងទៀត ពីព្រោះលោកគឺជាប្រជាពលរដ្ឋស្លូតត្រង់ពិតប្រាកដ មិនបានទៅលួចប្លន់ដីរបស់បុគ្គលនោះទេ។
លោកថ្លែងថា “តុលាការនិងពិចារណាត្រួតពិនិត្យឡើងវិញ នៅសភាពខ្វះខាត ដែលមានកន្លងមក ពិសេសការលួចបន្លំ ដោយប៉ុនប្រសប់និងដោយមានជំនាញ ពីរភាគីម្ខាងទៀត ដើម្បីយកដីរបស់ខ្ញុំ ហើយខ្ញុំជឿជាក់ថាទីចុងបំផុតមានតែសម្ដេចតេជោ ហ៊ុន សែន ទេ ដែលផ្ដល់ភាពយុត្តិធម៌ដល់ខ្ញុំ”។
សូមជម្រាបថា ខុទ្ទកាល័យសម្តេចនាយករដ្ឋមន្ត្រី បានធ្វើលិខិតចំនួនពីរដាច់ដោយឡែកពីគ្នាទៅរដ្ឋមន្ត្រីក្រសួងយុត្តិធម៌ និងប្រធានអាជ្ញាធរជាតិដោះស្រាយទំនាស់ដីធ្លី ឲ្យផ្អាកការអនុវត្តជាបណ្តោះអាសន្ននៅក្នុងសំណុំរឿងអនុវត្តដោយបង្ខំលេខ៥៦ ចុះថ្ងៃទី២២ ខែមិថុនា ឆ្នាំ២០១៩ ក្នុងការអនុវត្តយកដីរបស់យោធិនពិការឈ្មោះ មាស សុផាត រស់នៅភូមិឌួង សង្កាត់ព្រែកព្នៅ ខណ្ឌព្រែកព្នៅ។
យោងតាមលិខិតរបស់ខុទ្ទកាល័យសម្តេចនាយករដ្ឋមន្ត្រី ចុះថ្ងៃទី២៣ ខែមេសា ឆ្នាំ២០១៩ បានជម្រាបជូនរដ្ឋមន្ត្រីក្រសួងយុត្តិធម៌ថា “លិខិតចុះថ្ងៃទី១៩ ខែមេសា ឆ្នាំ២០១៩ របស់ឈ្មោះ មាស សុផាត ជាយោធិនពិការ មានទីលំនៅបណ្តោយផ្លូវជាតិលេខ៥ ភូមិដួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ គោរពជូនសម្តេចតេជោនាយករដ្ឋមន្ត្រី សំណើសុំរកយុត្តិធម៌ដល់រូបគាត់ពាក់ព័ន្ធនឹងដីទំហំ ១៣ ៧២០ម៉ែត្រក្រឡា មានទីតាំងស្ថិតនៅភូមិដួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ជាមួយឈ្មោះ កើត សារ៉េត និងប្រពន្ធឈ្មោះ ហ៊ឹម សុធន់អ៊ូ និងផ្អាកការអនុវត្តជាបណ្តោះអាសន្នននៅក្នុងសំណុំរឿងអនុវត្តដោយបង្ខំលេខ ៥៦ ចុះថ្ងៃទី២២ ខែមិថុនា ឆ្នាំ២០១៨ របស់សាលាដំបូងរាជធានីភ្នំពេញ”។
យោងតាមលិខិតសុំអន្តរាគមន៍របស់យោធិនពិការ មាស សុផាត ដាក់ជូនទៅសម្តេចនាយករដ្ឋមន្ត្រី កាលពថ្ងៃទី១៩ ខែមេសា ឆ្នាំ២០១៩ បានបញ្ជាក់ថា ក្រុមគ្រួសារលោកបានសុំដីពីរដ្ឋអំណាច និងអាជ្ញាធរមូលដ្ឋាន កាលពីថ្ងៃទី៧ ខែសីហា ឆ្នាំ១៩៩៤ ដោយមានឯកសារទទួលស្គាល់ពីរដ្ឋអំណាចត្រឹមត្រូវតាមច្បាប់ ហើយលោកក៏បានប្រកបរបបដាំឈូក។ ហើយក៏បានសុំរដ្ឋអំណាចជីកស្រះលើដីវិវាទនេះដើម្បីចិញ្ចឹមត្រី ដោយមានលិខិតទទួលស្គាល់ពីរដ្ឋអំណាចមូលដ្ឋាន ចុះថ្ងៃទី១២ ខែធ្នូ ឆ្នាំ១៩៩៥ និងថ្ងៃទី៧ ខែកុម្ភៈ ឆ្នាំ២០១៩ ឆ្នាំ២០០៣ ទៀតផង។ ដីផ្នែកខាងក្រោយមួយប្លង់នេះ លោកបានចូលរស់នៅគ្រប់គ្រងកាន់កាប់ ប្រើប្រាស់ និងអាស្រ័យផងចាប់តាំងពីឆ្នាំ១៩៩៤ រហូតមកដល់បច្ចុប្បន្ន មានរយៈពេល២៦ឆ្នាំ មកហើយ៕
