កំពង់ស្ពឺ៖ រដ្ឋមន្ត្រីក្រសួងរ៉ែ និងថាមពល លោក កែវ រតនៈ បានលើកឡើងថា ក្រសួងមិនបន្តចេញអាជ្ញាប័ណ្ណ ឬច្បាប់ថ្មីដល់ការដ្ឋានវាយនិងកិនថ្មទៀតទេសម្រាប់រាជរដ្ឋាភិបាលនីតិកាលទី៧ នេះ ដោយរក្សាទីតាំង និងការដ្ឋានចាស់ឱ្យនៅដដែល។ ការលេីកឡេីងដូចនេះក្នុងពេចុះជួប និងផ្សព្វផ្សាយដល់កម្មករនិយោជិតរ៉ែដែលកំពុងបំពេញការងារក្នុងការដ្ឋានរ៉ែផ្ទាល់ ដើម្បីប្រមូលធាតុចូលឱ្យបានគ្រប់ជ្រុងជ្រោយ និងអាចអនុវត្តបានពីគ្រប់ភាគីពាក់ព័ន្ធ នៅថ្ងៃទី១៣ ខែមីនា ឆ្នាំ២០២៤។
លោក កែវ រតនៈ បានបញ្ជាក់ថា ការដែលក្រសួងមិនអនុញ្ញាតឱ្យមានការដ្ឋានថ្មី ដោយសារតែការផ្គត់ផ្គង់ថ្មសំណង់នៅទូទាំងប្រទេស គ្រប់គ្រាន់ហើយ។ ដូចនេះក្រសួងចង់រៀបចំតំបន់ឱ្យបានត្រឹមត្រូវ ល្អជាងមុន ដោយមិនឱ្យមានការវាយភ្នំយកថ្មកញ្ឆេតកញ្ឆូតគ្រប់កន្លែងទៀតទេ។
លោករដ្ឋមន្ត្រីក្រសួង បានលើកឡើងថា ទោះបីការដ្ឋានថ្មីមិនត្រូវបានអនុញ្ញាត ប៉ុន្តែក្រសួងធានាថា មិនខ្វះថ្មសំណង់ទេនៅទូទាំងប្រទេស ហើយក៏ធានាមិនឱ្យឡើងថ្លៃលើសលប់ពេលដែលខ្វះថ្មសំណង់នោះដែរ។ ការឡើងថ្លៃតិចតួចដោយសារតែការឡើងថ្លៃនៃប្រេងសាំង និងកម្លាំងពលកម្មនៃកម្មករជៀសមិនរួចទេ។
លោក កែវ រតនៈ ក៏បានបញ្ជាក់បន្ថែមដែរថា ការផ្តល់សេវាមិនគ្រប់គ្រាន់ និងការនាំចេញថ្មទៅក្រៅប្រទេសជាមូលហេតុដែលនាំឱ្យថ្មឡើងថ្លៃ ប៉ុន្តែក្រសួងធានាដល់តម្រូវការថ្មក្នុងប្រទេសមិនឱ្យខ្វះនោះទេ ហើយដើម្បីតម្រូវការនាំចេញក្រៅប្រទេសរួចនាំគ្នាបំផ្លាញភ្នំថ្មីៗបន្ថែមទៀតតាមរយៈការបង្កើត និងសុំអាជ្ញាប័ណ្ណថ្មីក្រសួងមិនអនុញ្ញាតឡើយ ជារួមគឺរក្សាការដ្ឋានចាស់ៗ។
លោកររដ្ឋមន្ត្រី ក៏បានព្រមានចាត់វិធានការឱ្យអស់ ទៅលើក្រុមហ៊ុន ឬជនទាំងឡាយណាដែលវាយ និងដឹកថ្មមិនបានបង់ចំណូលរដ្ឋ ប្រការនេះដើម្បីឱ្យការប្រកួតប្រជែងប្រព្រឹត្តិទៅដោយស្មើភាព។ ម្យ៉ាងវិញទៀតរក្សាទុកភ្នំតូច ធំដែលនៅសេសសល់ ដើម្បីធ្វើកន្លែងអេកូទេសចរណ៍សម្រាប់ភ្ញៀវជាតិ អន្តរជាតិ មកលេងកម្សាន្ត៕
