អ្នកវិនិយោគកម្ពុជាបានចាត់ទុកថា គម្រោងផ្លូវមួយខ្សែក្រវ៉ាត់មួយរបស់រដ្ឋាភិបាលចិននឹងធ្វើឲ្យកម្ពុជាកាន់មានឱកាសវិនិយោគច្រើនជាងមុននិងបង្កើតឲ្យមានទីផ្សារធំទូលាយ ហើយនេះបើតាម ការលើកឡើងរបស់លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូចនិងមធ្យមកម្ពុជា។
លោកឧកញ៉ា តែ តាំងប៉ មានប្រសាសន៍ថា តាមពិតទៅគម្រោងផ្លូវមួយខ្សែក្រវ៉ាត់មួយនេះពិតជាផ្តល់ផលប្រយោជន៍ច្រើនដល់ប្រទេសកម្ពុជា ដែលជំរុញនូវគម្រោងវិនិយោគជាច្រើនទៀតលើគ្រប់វិស័យ ហើយក្រៅពីនេះធ្វើឲ្យប្រព័ន្ធដឹកជញ្ជូនកាន់តែសម្បូរបែបនឹងងាយស្រួលក្នុងការដឹកជញ្ជូនទំនិញទៅទីផ្សារអន្តរជាតិ។
លោកឧកញ៉ាបានមានប្រសាសន៍ទៀតថា« ចំពោះប្រទេសកម្ពុជាកាន់តែជម្រើសច្រើនជាងមុន ដោយមិនពឹងផ្អែកតែទីផ្សារតែមួយ ជាពិសេសនោះទទួលបានលំហូរវិនិយោគកាន់តែច្រើន ។ដូច្នោះតាមរយៈដំណើរទស្សនកិច្ចសម្តេចតេជោនាយករដ្ឋមន្រ្តីនេះនឹងបើកផ្លូវឲ្យមានវិនិយោគថ្មីៗបន្ថែមទៀតក៏ដូចជាពង្រឹងទំនុកចិត្តដល់អ្នកវិនិយោគិនបរទេស»។
សម្រាប់អ្នកវិនិយោគខាងលើអះអាងថា ចំពោះវិស័យឯកជនគឺពិតជាមានសេចក្តីរីករាយជុំវិញដំណើរទស្សនកិច្ចរបស់ប្រមុខដឹកនាំកម្ពុជាទៅកាន់ប្រទេសចិន ហើយរំពឹងថា មហាមិត្តចិននឹងជួយដល់ប្រទេសកម្ពុជាកាន់តែច្រើនបន្ថែមទៀតលើផ្នែកពាណិជ្ជកម្មនិងទីផ្សារកសិផលខ្មែរ។
គម្រោងផ្លូវមួយខ្សែក្រវ៉ាត់មួយ គឺជាគម្រោងហេដ្ឋារចនាសម្ព័ន្ធសកលដែលបើកសម្ពោធជាផ្លូវការដោយប្រធានាធិបតីចិនលោក ស៊ី ជិនពីង តាមរយៈការរៀបចំជំនួបកំពូលលើកទី១ក្នុងឆ្នាំ២០១៧។
ការវិនិយោគនៅក្នុងវិស័យអចលនទ្រព្យនៅក្នុងខេត្តព្រះសីហនុកាន់តែមានកំណើនច្រើនឡើង ហើយជាលទ្ធផលគោលនយោបាយ ផ្លូវមួយខ្សែក្រវ៉ាត់មួយមានគម្រោងផ្លូវល្បឿនលឿនចំងាយប្រមាណ១៩០គីឡូម៉ែត្រដែលតភ្ជាប់ពីខេត្តព្រះសីហនុទៅកាន់ក្រុងភ្នំពេញ គម្រោងផ្លូវល្បឿនលឿននេះនឹងត្រូវសាងសង់រួចរាល់នៅចុងឆ្នាំនេះ។
គម្រោងផ្លូវល្បឿនលឿននេះត្រូវបានអភិវឌ្ឍន៍ដោយក្រុមហ៊ុនចិន China Communications Construction Company ដែលមានចំនួនទឹកប្រាក់ក្នុងការសាងសង់ប្រមាណ២ពាន់លានដុល្លារ ដែលនេះជាគម្រោងអភិវឌ្ឍន៍ដែលជម្រុញលើការអភិវឌ្ឍន៍ផ្សេងៗទៀតឲ្យកាន់តែប្រសើរឡើង៕
