ភ្នំពេញ៖ថ្ងៃទី០៤ ខែកក្កដា ឆ្នាំ២០១៩ រដ្ឋសភា បានបើកសម័យប្រជុំពេញអង្គ ក្រោមអធិបតីភាពសម្តេចហេងសំរិន ប្រធានរដ្ឋសភា ដើម្បីសួរនាំ និងស្តាប់ការបំភ្លឺរបស់រដ្ឋមន្ត្រីក្រសួងយុត្តិធម៌ លោក អង្គវង្ស វឌ្ឍានា ពាក់ព័ន្ធនឹងការងារ និងបញ្ហាចោទមួយចំនួន រួមមាន ការកែទម្រង់រចនាសម្ព័ន្ធតុលាការ ការរៀបចំក្រុមការងារដោះស្រាយជម្លោះក្រៅប្រព័ន្ធតុលារការ និងការបណ្ដុះបណ្ដាលធនធានមនុស្ស ពិសេសការកកស្ទះសំណុំរឿងនៅតុលាការ។
លោក អង្គវង្សវឌ្ឍានា ជារដ្ឋមន្ត្រីដំបូងបំផុត ដែលត្រូវចូលបំភ្លឺ ជូនរដ្ឋសភា សម្រាប់នីតិកាលទី៦នេះ។ ការចូលបំភ្លឺរបស់រដ្ឋមន្ត្រីក្រសួងយុត្តិធម៌ នៅថ្ងៃទី៤កក្កដានេះ ត្រូវបានគណៈកម្មាធិការអចិន្ត្រៃយ៍រដ្ឋសភា សម្រេចនៅក្នុងកិច្ចប្រជុំ កាលពីព្រឹកថ្ងៃទី០៣ ខែកក្កដា ឆ្នាំ២០១៩។
លោក ឈាង វុន សមាជិកគណៈកម្មាធិការអចិន្ត្រៃយ៍រដ្ឋសភា បានលើកឡើងថា ថ្វីដ្បិតតែរាជរដ្ឋាភិបាល និងរដ្ឋសភា មានប្រភពមកគណបក្សតែមួយ ប៉ុន្តែក្រុមអ្នកតំណាងរាស្ត្រទាំង ១២៥ រូប នឹងមិនភ្លេចតួនាទីរបស់ខ្លួនឡើយ។ ចាប់ពីពេលនេះតទៅ រដ្ឋសភា នឹងកោះហៅរដ្ឋមន្ត្រី និងឥស្សរជនពាក់ព័ន្ធ មកឆ្លើយបំភ្លឺបញ្ហាយ៉ាងយូរ ២សប្ដាហ៍ម្ដង៕
