យោងតាមរបាយការណ៍បូកសរុបលទ្ធផលការងារឆ្នាំ ២០១៨ និងលើកទិសដៅការងារឆ្នាំ ២០១៩ នៃក្រសួងរៀប ចំដែនដី នគរូបនីយកម្ម និងសំណង់ ដែលបានចេញផ្សាយនៅថ្ងៃទី ២៤ ខែធ្នូឆ្នាំ ២០១៨នេះ បានបញ្ជាក់ថា ការវិនិយោគលើវិស័យសំណង់នៅកម្ពុជាក្នុងឆ្នាំ ២០១៨ មានចំនួន ២៨៦៧ គម្រោង លើផ្ទៃក្រឡាដីជាង ១១ លានម៉ែត្រការ៉េ ដោយសរុបទៅមានទំហំទឹកប្រាក់ប្រមាណជាង ៥ពាន់២រយលានដុល្លារអាមេរិក។
ក្នុងគម្រោងទាំង ២៨៦៧ គម្រោងក្នុងនោះ ក្រោមសមត្ថកិច្ចក្រសួងមានចំនួន ២៤៥ គម្រោង ដោយមានផ្ទៃក្រឡាដីប្រមាណជាង ១០លានម៉ែត្រការ៉េ និងក្រោមសមត្ថកិច្ចរាជធានី ខេត្ត មានចំនួន ២ ៦២២គម្រោង ដោយមានផ្ទៃក្រឡាសរុបជាង ១លានម៉ែត្រការ៉េ។
ការវិនិយោគលើវិស័យសំណង់ក្នុងឆ្នាំ ២០១៨នេះ រួមមានទាំង សំណង់បែបលំនៅឋាន សំណង់បែប អគារខ្ពស់ៗ រួមទាំងសំណង់លំនៅឋាន បែបលក្ខណៈបុរីផងដែរ។ ដោយសំណង់ អគារខ្ពស់ ដែលមានកំពស់ចាប់ពី ៥ជាន់ឡើងទៅក្នុងរាជធានីភ្នំពេញ មានចំនួន ១១០ អគារ។
ទំហំទឹកប្រាក់វិនិយោគលើវិស័យសំណង់នៅកម្ពុជាក្នុងឆ្នាំ ២០១៨នេះ បើធៀប នឹងទុនវិនិយោគលើវិស័យសំណង់ក្នុងឆ្នាំ ២០១៧ មានការធ្លាក់ចុះជាង ១៨% ដោយឆ្នាំ ២០១៧ ទំហំទឹកប្រាក់វិនិយោគមានជាង ៦ ពាន់ ៤រយលានដុល្លារអាមេរិក៕
