លោក អេ ភូថង ដែលត្រូវបានគេស្គាល់ជាកីឡាករដ៏ល្បីឈ្មោះមួយរូបនៅកម្ពុជាបានធ្លាក់ខ្លួនឈឺហើយ ដែលបច្ចុប្បន្ននេះ កំពុងធ្លាក់ខ្លួនឈឺយ៉ាងធ្ងន់ហើយ ដោយកំពុងសម្រាកព្យាបាលនៅឯមន្ទីរពេទ្យកាល់ម៉ែត្ររាជធានីភ្នំពេញ។
អ្នកស្រី សឹង សុម៉ាលី ភរិយា លោក អេ ភូថង បាននិយាយថា ប្តីអ្នកស្រីធ្លាក់ខ្លួនឈឺរយៈពេល៤ ថ្ងៃហើយបណ្តាលមកពីជំងឺក្រុមក្តៅពី ៣៨ដល់៣៩ អង្សារ ដែលបណ្តាលឲ្យមានអាការៈងងឹតមុខខ្លាំង រួចបានបញ្ជូនមកកាន់មន្ទី ពេទ្យកាល់ម៉ែត្រ។
អ្នកបានបន្ថែមទៀតថា តាមពិតបច្ចុប្បន្នប្តីអ្នកស្រីកំពុងតែសម្សាកព្យាលបាលហើយគ្រូពេទ្យថា សម្ពាធឈាមចុះខ្សោយខ្លាំង និងរលាកទងសូត្រ មានមេរោគឆ្លង និងមានជាតិអាស៊ីតច្រើន និងក្រៅពីជាអ្នកកីឡា ពិបាកទប់និង ស្ថានភាពជំងឺ ហើយនាងខ្ញុំសូមអរគុណដល់មន្ទីពេទ្យកាល់ម៉ែត្រដែលបានយកចិត្តទុកដាក់។
ការដណ្ដើមខ្សែក្រវាត់ពិភពលោក និងក្នុងស្រុក កីឡាករ អធិរាជជង្គង់ទិព្វ កែងឆេះ ជង្គង់ហោះ អេ ភូថង បានក្លាយជាម្ចាស់ខ្សែក្រវាត់ពិភពលោកនៅថ្ងៃទី០៧ ខែវិច្ឆិកា ឆ្នាំ២០០៣ ក្នុងទម្ងន់ ៧៥គ.ក្រ បន្ទាប់ពីបានយកជ័យជម្នះលើកីឡាករជនជាតិស៊ូដង់ Faisal Zakaaria ។
តាំងពីទម្ងន់៤៥ ដល់ ៦៧គីឡូក្រាម កីឡាករភូថងតែងតែទទួលបានមេដាយមាសរហូតនៅក្នុងការប្រកួតជ្រើសរើសជើងឯកទូទាំងប្រទេសរហូតដោយគ្មានកីឡាកររូបណាអាចផ្ដួលលោកបានឡើយ។ កាលឆ្នាំ២០០៩ អេ ភូថងបានក្លាយជាម្ចាស់មេដាយសំរឹទ្ធិពីការប្រកួតស៊ីហ្គេមនៅទីក្រុងវៀងចន្ទន៍នៃប្រទេសឡាវ ក្រោយប្រកួតចាញ់កីឡាករ Muhd Fairus Azwa ជនជាតិម៉ាឡេស៊ី នៅវគ្គពាក់កណ្ដាលផ្ដាច់ព្រ័ត្រ។
ស្ថិតនៅក្នុងត្រកូលឈាមជ័រជាអ្នកប្រដាល់តាំងពីជីដូនជីតា លោក អេ ភូថង បានខិតខំប្រឹងប្រែង និងឆ្លងកាត់ការលំបាក់គ្រប់បែបយ៉ាងតាំងពីកុមារភាពរហូតមានកេរ្តិ៍ឈ្មោះសំឡេងក្នុងពិភពក្បាច់គុនប្រដាល់ខ្មែរ និងគ្រប់គ្រងខ្សែក្រវាត់ប្រដាល់សេរីពិភពលោក ព្រមទាំងជាម្ចាស់មេដាយសំរឹទ្ធិ ស៊ីហ្គេម នៅប្រទេសឡាវទៀតឆ្នាំ២០០៩សម្រាប់ប្រទេសកម្ពុជា។
លោកក៏ជាសមាជិកគណៈកម្មការ ចៅក្រម និងអាជ្ញាកណ្តាលរបស់សហព័ន្ធកីឡាប្រដាល់កម្ពុជាហើយបច្ចុប្បន្នលោក អេ ភូថង មានក្លិបប្រដាល់របស់ខ្លួនដែលមានឈ្មោះថា អេភូថងកីឡា។
លោក អេ ភូថង កើតនៅខេត្តកោះកុង មានឪពុកឈ្មោះយិន រិន និង អ្នកម្ដាយឈ្មោះអាត អុន ជាកូនច្បងក្នុងគ្រួសារ ចំណោមបងប្អូនចំនួន៣នាក់ ។ ប្អូនទីមួយឈ្មោះ អួត ភូថង វ័យ៣០ឆ្នាំប្លាយ ជាកីឡាករប្រដាល់សេរីដែលមានកេរ្តិ៍ឈ្មោះល្បីល្បាញដូចលោកដែរ និងប្អូនស្រីពៅឈ្មោះអោម ភូថងអាយុជាង ២០ឆ្នាំ។
លោកកើតនៅថ្ងៃទី២៥ ខែតុលាឆ្នាំ១៩៩៧ កីឡាករជើងចាស់រូបនេះបានរៀបការជាមួយអ្នកនាងសឹង សុម៉ាលីដោយមានបុត្រាបុត្រីចំនួនបួននាក់នាពេលបច្ចុប្បន្ននេះ។ កូនទី១ឈ្មោះ ព្រី យ៉ានុតភូថង ភេទស្រីកូនទី២ ឈ្មោះ វិរៈ ខាំឈឺតភូថង ភេទប្រុស កូនទី៣ អាំ ម៉ារីនភូថង ភេទប្រុស និងកូនទី៤ អេឡិក ភូថងភេទប្រុស។ ភរិយាលោកអេ ភូថង អ្នកស្រី សឹង សុម៉ាលី ក្រៅពីមេផ្ទះ ក៏ជាអាជ្ញាកណ្ដាលការប្រកួតកីឡាការិនី និងជាគ្រូបង្វឹកជំនួយលោកអេ ភូថងផងដែរ។