ភ្នំពេញៈ អ្នកជំនាញក្នុងវិស័យអចលនទ្រព្យ បានឲ្យដឹងថា រយៈពេលជាង១ទសវត្សរ៍ វិស័យអចលនទ្រព្យនៅកម្ពុជារក្សាបាននូវភាពរីកចម្រើន និងអភិវឌ្ឍឥតឈប់ឈ នៅក្នុងបរិបថនេះ គឺជាឱកាសមួយសម្រាប់យុវជនក្នុងការចូលរួមទទួលយកប្រយោជន៍ពីវិស័យនេះ។
លោកបណ្ឌិត គីម ហ៊ាង អគ្គនាយកក្រុមហ៊ុនអចលនទ្រព្យ Khmer Real Estate បានអះអាងថា រយៈពេលជាង ១៤ឆ្នាំហើយ ដែលបានចូលប្រឡូក នៅក្នុងជំនួញ លើវិស័យអចលនទ្រព្យ ហើយជាបទពិសោធន៍ និងធនធានដែលទទួលបានសព្វថ្ងៃនេះ ស្ទើរតែ៩៩ភាគរយបានមកពីវិស័យអចលនទ្រព្យ។
លោកបណ្ឌិតបន្តទៀតថា “ទស្សនៈរបស់ខ្ញុំផ្ទាល់គិតថា ការរកចំណូលពីវិស័យអចលនទ្រព្យ គឺគ្មានវិស័យណាមួយដែលអាចមកជំនួសបាននោះទេ ព្រោះវាជាប្រភេទជំនួញ ដែលចំណាយទុនតិច តែអាចទទួលបានចំណូលច្រើន »។ ដូច្នេះសម្រាប់យុវជនជំនាន់ក្រោយ ដែលមានចំណេះដឹង និងចំណូលចិត្តក្នុងវិស័យនេះ គួរតែពិចារណា និងតាំងចិត្តឱ្យខ្ពស់ចូលរួមដើម្បីទទួលបានឱកាសល្អនៅក្នុងវិស័យមួយនេះ ចំពោះផ្នែកភ្នាក់ងារលក់ដីឡូតិ៍ លក់ខុនដូ លក់អាផាតមិន ឬលក់សំណង់បុរីនោះទេ ។
លោកបណ្ឌិត គីម ហ៊ាងបានបន្តទៀតថា នៅពេលអ្នកចូលខ្លួនមកស្វែងរកចំណូលនៅក្នុវិស័យអចលនទ្រព្យ ដែលសម្បូរទៅដោយលុយមួយនេះ ក្រៅពីអ្នកមានចំណេះដឹងទូទៅពាក់ព័ន្ធទៅនឹងការងារដែលកំពុងតែអនុវត្តនោះ អ្នកក៏ត្រូវតែមានភាពស្មោះត្រង់ជាចាំបាច់ជាមួយអតិថិជន ជាពិសេសបង្កើនកិច្ចសហការ ជាដៃគូជាមួយបណ្តាអ្នកកំពុងតែស្ថិតនៅលើផ្លូវរួមគ្នា។
នៅពេលយើងកាន់តែរីកចម្រើន ក្រុមហ៊ុនកាន់តែដំណើរការល្អ ក្នុងនាមអ្នកជាម្ចាស់ ឬជាអ្នកគ្រប់គ្រង ត្រូវតែព្យាយាមសិក្សាបន្ថែមពីជំនាញ ដែលទាក់ទង់ទៅនឹងមុខជំនួញដែលកំពុងតែធ្វើ ។ ព្រោះវិស័យអចលនទ្រព្យនៅកម្ពុជា ត្បិតថាមានភាពរីកចម្រើនខ្លាំង ជាងបណ្តាប្រទេសមួយចំនួនក្នុងតំបន់ក៏ពិតមែន នៅពេលដែលយើងរីកចម្រើនក្នុងកម្រិតមួយ ហើយឆ្អែតនឹងខ្លួនឯង មិនព្យាយាមស្វែងយល់ពីមនុស្សនៅជុំខ្លួននោះ ធនធានដែលអ្នកមាន វានឹងបាត់បង់ទៅវិញ៕
