លិខិតបំភ្លឺ
ខ្ញុំបាទឈ្មោះ សោម សុខរ៉ាឌី អាយុ ៥៦ឆ្នាំ ជនជាតិខ្មែរ មានទីលំនៅផ្ទះលេខ ២ ផ្លូវលេខ ១៣(បូរីប៉េងហួត) ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ។ លេខ ទូរស័ព្ទ ០៩៩ ២១០ ០០៦។
សូមអានខ្លឹមសារទាំងស្រុងដូចតទៅ៖
ខ្ញុំបាទឈ្មោះ សោម សុខរ៉ាឌី អាយុ ៥៦ឆ្នាំ ជនជាតិខ្មែរ មានទីលំនៅផ្ទះលេខ ២ ផ្លូវលេខ ១៣ (បូរីប៉េងហួត) ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ។ លេខទូរស័ព្ទ ០៩៩២១០០០៦
គោរពជូន លោកនិពន្ធនាយកការសែតរស្មីកម្ពុជា
កម្មវត្ថុ៖ សំណើសុំបំភ្លឺពាក់ព័ន្ធនឹងការចុះផ្សាយលើសារព័ត៌មានរស្មីកម្ពុជា ចុះថ្ងៃទី០៧ ខែឧសភា ឆ្នាំ២០២០ ដែលមានចំណងជើងថា “បឹងតាមោកទៀតហើយ! តែលើកនេះមិនមែនកាត់ឲ្យដូចមុនទេ”។
យោង៖ សាលក្រមរដ្ឋប្បវេណីលេខ ៥០៩ “ធ” ចុះថ្ងៃទី២៤ ខែមេសា ឆ្នាំ២០១៨
តបតាមកម្មវត្ថុ និងយោងខាងលើ ខ្ញុំបានសូមជម្រាបជូន លោកនិពន្ធនាយក ឲ្យបានជ្រាបថា៖ នៅក្នុងកំឡុងឆ្នាំ ១៩៩៤ ទៅឆ្នាំ១៩៩៦ ខ្ញុំបាទបានប្រមូលទិញដីស្រែ និងដីដាំឪឡឹកពីប្រជាពលរដ្ឋ (ដីគោក) នៅតំបន់បឹងតាមោក ដោយដាក់ឈ្មោះអតីតភរិយាឈ្មោះ ជូ ដារ៉ារ៉េត ហៅ ធារី (ឈ្មោះជប៉ុន ASAKURA MASAKO) ទាំងអស់ ហើយយើងទាំងពីរនាក់បានសម្រេចលក់ដីប្រហែលជាង ៥០ ហិកតា ទៅឲ្យអ្នកវិនិយោគជប៉ុន ដោយការទិញ-លក់នោះមានការទទួលស្គាល់ដឹងលឺពីអាជ្ញាធរភូមិឃុំ និងនៅពេលក្រោយមកទៀតខ្ញុំបាទបានទទួលដំណឹងថាដីតំបន់នោះត្រូវបានដាក់ចូលទៅក្នុងអនុក្រឹត្យរបស់រាជរដ្ឋាភិបាល។
ខ្ញុំបាទពិតជាមានការភ្ងាក់ផ្អើល និងនឹកស្មាន់ពុំដល់ចំពោះករណីសារព័ត៌មានរស្មីកម្ពុជា ចុះផ្សាយនៅថ្ងៃទី០៧ ខែឧសភា ឆ្នាំ២០២០ មានខ្លឹមសារថា “បឹងតាមោកទៀតហើយ! តែលើកនេះមិនមែនកាត់ឲ្យដូចមុនទេ”
- គឺហាមផ្តល់វិញ្ញាបនបត្រសម្គាល់ម្ចាស់អចលនវត្ថុចំនួនមួយទីតាំងដីទំហំ ៥១.២៣ ហិកតា ស្ថិតនៅក្បែរបឹងតាមោក សង្កាត់ពន្សាំង ខណ្ឌព្រែកព្នៅ រាជធានីភ្នំពេញ និងក្រសួងយុត្តិធម៌ ត្រូវអនុវត្តតាមច្បាប់ចំពោះឈ្មោះសោម សុខរ៉ាឌី។
- ទីស្តីការគណៈរដ្ឋមន្ត្រីបានជម្រាបរដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ និងរដ្ឋមន្ត្រីក្រសួងយុត្តិធម៌ តាមរយៈលិខិតលេខ៤៧៥ សជណ.ដប. ចុះថ្ងៃទី២២ ខែមេសា ឆ្នាំ២០២០ ថា រាជរដ្ឋាភិបាលមិនចុះបញ្ជីផ្តល់វិញ្ញាបនបត្រ សម្គាល់ម្ចាស់អចលនវត្ថុចំនួនមួយទីតាំងដីទំហំ ៥១.២៣ហិកតា ស្ថិតនៅក្បែរបឹងតាមោក សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ដោយទីតាំងខាងលើជាដីសាធារណរបស់រដ្ឋ។
- នៅក្នុងលិខិតជូនដំណឹងដែលចុះហត្ថលេខាដោយលោក ឈួន សុធី រដ្ឋលេខាធិការ ទីស្តីការ គណៈរដ្ឋមន្ត្រីនេះបានសរសេរទៀតថាក្រសួងយុត្តិធម៌ត្រូវអនុវត្តតាមច្បាប់ចំពោះឈ្មោះ សោម សុខរ៉ាឌី ដើម្បីចៀសវាងបុគ្គលនេះ ធ្វើសកម្មភាពដដែលៗ នាំឱ្យប៉ះពាល់ដល់គោលនយោបាយរបស់រាជរដ្ឋាភិបាលលើវិស័យឯកជន។
កន្លងមកខ្ញុំបាទពុំធ្លាប់បានធ្វើលិខិតស្នើសុំផ្តល់វិញ្ញាបនបត្រសម្គាល់ម្ចាស់អចលនវត្ថុនៅតំបន់បឹងតាមោក ដូចតាមការលើកឡើងនៅក្នុងទំព័រសារព័ត៌មាន ឬលិខិតរបស់ទីស្តីការគណៈរដ្ឋមន្ត្រីឡើយ ព្រោះយោងតាមអង្គហេតុខាងលើ និង សាលក្រមរដ្ឋប្បវេណីលេខៈ ៥០៩ “ធ” ចុះថ្ងៃទី២៤ ខែមេសា ឆ្នាំ២០១៨ របស់សាលាដំបូងរាជធានីភ្នំពេញ បានសម្រេចកាត់យកទ្រព្យសម្បត្តិទាំងអស់របស់ខ្ញុំបាទ ទៅឲ្យកូនទាំងបីដែលនៅក្រោមការគ្រប់គ្រងរបស់អតីតភរិយា (ពុំមានសំបុត្រអាពាហ៍ពិពាហ៍) រួចអស់ទៅហើយ។ ម្យ៉ាងវិញទៀតរាល់លិខិតស្នាមច្បាប់ដើមទាំងអស់ពាក់ព័ន្ធនឹងដីនៅតំបន់នោះក៏ត្រូវបានអតីតភរិយាខ្ញុំបាទរៀបចំ និងប្រមូលយកទៅជាមួយនៅថ្ងៃដែលគាត់ចុះចេញពីលំឋានដោយមិនបានឲ្យខ្ញុំបាទដឹងពីមូលហេតុជាមុន។ ខ្ញុំបាទពុំដែលបានធ្វើការស្នើសុំប័ណ្ណកម្មសិទ្ធិសម្គាល់ម្ចាស់អចលនវត្ថុលើដីទំហំ៥១.២៣ ហិកតា ស្ថិតនៅក្បែរបឹងតាមោក និងមិនដែលដើរប្រព្រឹត្តសកម្មភាពណាមួយដូចការចោទប្រកាន់នោះទេ ហើយខ្ញុំបាទពិតជាពុំអាចទទួលយកបានជាដាច់ខាតចំពោះការចោទប្រកាន់ដែលធ្វើឲ្យប៉ះពាល់ដល់កិត្តិយស និង សេចក្តីថ្លៃថ្នូររបស់ខ្ញុំបាទ។
ហេតុដូច្នេះខ្ញុំបាទសូមធ្វើការបដិសេធទាំងស្រុងលើការចុះផ្សាយព័ត៌មានពាក់ព័ន្ធនឹងការស្នើសុំធ្វើវិញ្ញាបនបត្រសម្គាល់អចលនវត្ថុ និងការចោទប្រកាន់ចំពោះរូបខ្ញុំបាទថាបានធ្វើសកម្មភាពដដែលៗនាំឲ្យប៉ះពាល់ដល់គោលនយោបាយរបស់រាជរដ្ឋាភិបាលលើវិស័យឯកជន។ ផ្ទុយទៅវិញខ្ញុំបាទគឺពាណិជ្ជករមួយរូបដែលតែងតែនាំជនជាតិជប៉ុនមកដាក់ទុនវិនិយោគតាមគោលនយោបាយរបស់រាជរដ្ឋាភិបាល និងកសាងសម្ធិផលផ្សេងៗជូនប្រទេសជាតិ ជាពិសេសនៅក្នុងទសវត្សរ៍ទី៩០ ខ្ញុំបាទគឺជាវិស្វករជនជាតិខ្មែរមួយរូប ដែលតំណាងឲ្យភាគីជប៉ុនក្នុងការកសាងស្ពានមិត្តភាពកម្ពុជាជប៉ុន(ស្ពានជ្រោយចង្វារ)។
អាស្រ័យដូចបានជម្រាបជូនខាងលើ សូម លោកនិពន្ធនាយក មេត្តាពិនិត្យ និងទទួលយក សេចក្តីដូចបានបំភ្លឺតាមខ្លឹមសារដែលខ្ញុំបាទបានបញ្ជាក់ជូនខាងលើ ដោយក្តីអនុគ្រោះ។
សូម លោកនិពន្ធនាយក ទទួលនូវការគោរពរាប់អានអំពីខ្ញុំបាទ។
ថ្ងៃចន្ទ ៥ រោច ខែពិសាខ ឆ្នាំជូត ទោស័ក ពុទ្ធសករាជ ២៥៦៤ ធ្វើនៅរាជធានីភ្នំពេញ, ថ្ងៃទី១១ ខែឧសភា ឆ្នាំ២០២០
