ប្រុចហ្សែល, ប៊ែលហ្សិក៖ សហភាពអ៊ឺរ៉ុប បានចូលរួមថ្កោលទោសចំពោះការស្លាប់របស់បុរសស្បែកខ្មៅម្នាក់ ដែលគ្មានអាវុធនៅសហរដ្ឋអាមេរិក នៅពេលប៉ូលីសចាប់ខ្លួនគាត់ ហើយបានព្រមានសហរដ្ឋអាមេរិកថា លោកប្រធានាធិបតី ដូណាល់ ត្រាំ (Donald Trump) គ្មានអំណាចផ្លាស់ប្តូររបៀបនៃកិច្ចប្រជុំកំពូល G7 ទេ។
យោងតាមការផ្សាយពីទូរទស្សន៍ ស៊ីជីធីអិន (CGTN) របស់ចិន នាថ្ងៃទី០៣ ខែមិថុនា ឆ្នាំ២០២០នះ បានឲ្យដឹង អ្នកការទូតជាន់ខ្ពស់របស់សហគមន៍អឺរ៉ុប បានហៅការស្លាប់របស់លោក ចច ផ្លយ គឺជាការរំលោភអំណាច និងទង្វើនៃការប្រើប្រាស់កម្លាំងហួសប្រមាណ។
ប្រធានគោលនយោបាយការបរទេសរបស់សហភាពអឺរ៉ុប លោក ចូសេព បូរ៉ែល (Josep Borrell) បានប្រាប់អ្នកសារព័ត៌មាន នៅថ្ងៃនេះថា «ដូចប្រជាជនអាមេរិកដែរ យើងមានការភ្ញាក់ផ្អើល និងតក់ស្លុតចំពោះមរណភាពរបស់លោក ចច ផ្លយ (George Floyd។ សង្គមទាំងអស់ត្រូវតែប្រុងប្រយ័ត្នខ្ពស់ចំពោះការប្រើប្រាស់កម្លាំងហួសប្រមាណ»។
លោក ចូសេព បូរ៉ែល បានចាត់ទុកការស្លាប់របស់លោ ចច ផ្លយ «ជាការមិនសប្បាយចិត្តខ្លាំងណាស់។ វាបានបង្ហាញពីការរំលោភអំណាចមួយដោយអ្នកអនុវត្តច្បាប់។ យើងថ្កោលទោសការរើសអើងជាតិសាសន៍គ្រប់ប្រភេទ … យើងទុកចិត្តលើសមត្ថភាពរបស់ជនជាតិអាមេរិករួមគ្នាដើម្បីជាប្រជាជាតិមួយ»។
លោក ចច ផ្លយ បានស្លាប់ កាលពីថ្ងៃច័ន្ទសប្តាហ៍មុនបន្ទាប់ពីប៉ូលីសស្បែកស បានលុតជង្គង់ស្កត់ករបស់គាត់អស់រយៈពេលជាច្រើននាទី នៅពេលប៉ូលីស៤នាក់ បានព្រួតចាប់ខ្លួនគាត់។
ទូរស័ព្ទដៃរបស់អ្នកមើលម្នាក់ បានថតហេតុការណ៍ ដែលបង្ហាញពីបុរសស្បែកខ្មៅអាយុ៤៦ឆ្នាំថ្ងូរ ស្រែកថា «សូមមេត្តាផង! ខ្ញុំមិនអាចដកដង្ហើមបានទេ» និង «សូមកុំសម្លាប់ខ្ញុំ» នៅពេលប៉ូលីសបានចុចជង្គង់ទៅលើកញ្ចឹងករបស់លោក ចច ផ្លយ។ ទោះជាយ៉ាងណា ឃ្លីបវីដេអូនេះ មិនបានបង្ហាញពីការប្រឈមមុខដាក់គ្នាឡើយ។
ប៉ុន្មាននាទីក្រោយមក បន្ទាប់ប៉ូលីសបានចុចជង្គង់ជាប់នៅលើកញ្ចឹងក ជនរងគ្រោះបាននៅស្ងៀមហើយក្រោយមកត្រូវបានគេប្រកាសថា ស្លាប់។
វីដេអូនេះត្រូវបានរាលដាលយ៉ាងរហ័សនៅលើបណ្តាញទំនាក់ទំនងសង្គម រហូតបង្កឲ្យមានការតវ៉ារីករាលដាល ពីរសៀលថ្ងៃអង្គារ ដែលនៅកន្លែងខ្លះ ការតវ៉ាបានប្រែក្លាយទៅរឿងកុប្បកម្មបង្កភាពវឹកវរ។
នៅក្នុងសុន្ទរកថារបស់លោក កាលពីថ្ងៃនេះ លោក ចូសេព បូរ៉ែល ក៏បាននិយាយផងដែរថា «ជារឿងជីវិតទាំងអស់, ជីវិតជនជាតិខ្មៅក៏មានបញ្ហាដែរ»។
ចំណែក លោក ដូណាល់ ត្រាំ បាននិយាយកាលពីថ្ងៃសៅរ៍ថា លោកនឹងពន្យាពេលកិច្ចប្រជុំកំពូល G7 ដែលបានគ្រោងទុកសម្រាប់ខែនេះ ហើយអញ្ជើញប្រទេសផ្សេងទៀត រួមទាំងប្រទេសរុស្ស៊ីផង ឲ្យចូលរួមក្នុងកិច្ចប្រជុំនេះដែរ ដែលត្រង់ចំណុចនេះ លោក ចូសេព បូរ៉ែល បានឆ្លើយតបថា រុស្ស៊ីមិនគួរទទួលឲ្យចូលរួមទៀតទេ។
សូមរំឭកការអញ្ជើញឲ្យចូលរួមកិច្ចប្រជុំ G7 របស់លោក ដូណាល់ ត្រាំ រួមមាប្រទេសកូរ៉េខាងត្បូង, អូស្រ្តាលី និងយល់ព្រមប្រទេសរុស្ស៊ី ដែលត្រូវបានបណ្តេញចេញពីក្លឹបនៃប្រទេសឧស្សាហកម្មឈានមុខគេ កាលពីឆ្នាំ២០១៤ បន្ទាប់ពីតំបន់គ្រីមា (Crimea) ត្រូវបានបញ្ចូលទៅក្នុងប្រទេសរុស្ស៊ី ប៉ុន្តែលោក ដូណាល់ ត្រាំ និយាយថា សមាជិកភាពបច្ចុប្បន្នគឺ «ហួសសម័យ»។
ឆ្លើយតបចំពោះទាក់ទងករណីនេះ លោក ចូសេព បូរ៉ែល បានអះអាងថា ប្រទេសរុស្ស៊ីមិនគួរត្រូវបានអនុញ្ញាតឲ្យចូលវិញទេ «លុះត្រាមានការផ្លាស់ប្តូរមូលហេតុ ហើយបរិយាកាសអនុញ្ញាតឲ្យមានG8 ដើម្បីពិភាក្សាគ្នាប្រកបដោយអត្ថន័យ ប៉ុន្តែបច្ចុប្បន្ននេះ មិនមែនជារឿងតម្រូវឲ្យចូលរួមទេ»។
លោកបានមានប្រសាសន៍ថា «បុព្វសិទ្ធិរបស់ប្រធាន G7 ក្នុងករណីនេះ គឺសហរដ្ឋអាមេរិក ដែលត្រូវចេញលិខិតអញ្ជើញភ្ញៀវ។ តែការអញ្ជើញភ្ញៀវ ត្រូវឆ្លុះបញ្ចាំងពីអាទិភាពរបស់ម្ចាស់ផ្ទះ» ប៉ុន្តែការផ្លាស់ប្តូរសមាជិកភាព ការផ្លាស់ប្តូររបៀបរបបប្រជុំត្រូវមានមូលដ្ឋានច្បាស់លាស់ មិនមែនជាបុព្វសិទ្ធិរបស់ប្រធាន G7 នេះឡើយ»៕
