ភ្នំពេញ៖ លោកវេជ្ជបណ្ឌិត លាង ឬទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាម នៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត បានឱ្យដឹងថា ជំងឺគ្រុនឈាមនៅដើមឆ្នាំ២០១៩នេះ គឺប្រហាក់ប្រហែលទៅនឹងស្ថានភាពនៅដើមឆ្នាំ២០១៨កន្លងទៅ ពោលគឺកើតឡើងចំនួនជាង ១ ០០០ករណី។
លោកវេជ្ជបណ្ឌិត បានបញ្ជាក់ថា ករណីទាំងនោះកើតឡើងភាគច្រើននៅខេត្តកណ្តាល រាជធានីភ្នំពេញ កំពង់ស្ពឺ និងខេត្តសៀមរាបជាដើម។ ប៉ុន្តែ ស្ថានភាពករណីជំងឺគ្រុនឈាមដើមឆ្នាំនេះ គឺយើងអាចគ្រប់គ្រងបាន។
មន្ត្រីសុខាភិបាលរូបនេះ បានសំណូមពរដល់ប្រជាពលរដ្ឋទាំងអស់ ធ្វើយ៉ាងណារួមគ្នាប្រយុទ្ធប្រឆាំងនិងជំងឺគ្រុនឈាម ដោយត្រូវលុបបំបាត់ជំរកដង្កូវទឹក នៅជុំវិញផ្ទះ ទីសាធារណៈនានា ព្រមទាំងការពារខ្លួនកុំឲ្យមូសខាំ។
ក្នុងករណីចេញរោគសញ្ញាជំងឺគ្រុនឈាម ដូចជា គ្រុនក្តៅខ្លាំង ឈឺក្បាល ឈឺក្រោយរង្វង់ភ្នែក ឈឺពោះ ក្អួត និងករណីខ្លះមានកន្ទួលក្រហមលើស្បែក ឬសញ្ញាហូរឈាម សូមទៅមន្ទីរពេទ្យជាបន្ទាន់ និងជៀសវាងការប្រើថ្នាំបញ្ចុះកំដៅ៕
