ភ្នំពេញ៖ ក្រសួងសុខាភិបាល បានប្រកាសនៅព្រឹកថ្ងៃទី១៩ ខែមករានេះថា មានករណីវិជ្ជមានវីរុសកូវីដ១៩ ចំនួន ២នាក់ទៀត កុមារជនជាតិឥណ្ឌូនេស៊ី អាយុ ១ឆ្នាំ បានឆ្លងពីឪពុកម្តាយ ដែលកើតជំងឺកូវីដ១៩ កាលពីថ្ងៃទី១៣ ខែមករា ឆ្នាំ២០២១។ ចំណែកម្នាក់ទៀត ជាស្ត្រីពលករខ្មែរ ធ្វើដំណើរមកពីប្រទេសថៃ។
នេះយោងតាមសេចក្តីប្រកាសរបស់ក្រសួងសុខាភិបាល បានបញ្ជាក់ថា ករណីវិជ្ជមានវីរុសកូវីដ១៩ ចំនួន ២នាក់ថ្មីនេះ គឺម្នាក់ ជាកុមារាជនជាតិឥណ្ឌូនេស៊ី អាយុ ១ឆ្នាំ មានអាសយដ្ឋាន ស្នាក់នៅខេត្តសៀមរាប ជាកូនប្រុសរបស់បុរសអាយុ ៣៤ឆ្នាំ និងស្ត្រីអាយុ ៣៣ឆ្នាំ ដែលវិជ្ជមានវីរុសកូវីដ១៩ កាលពីថ្ងៃទី១៣ ខែមករា ឆ្នាំ២០២១ ជាអ្នកដំណើរមកពីប្រទេសឥណ្ឌូនេស៊ី បន្តជើងហោះហើរ នៅប្រទេសសិង្ហបុរី មកដល់កម្ពុជា នៅថ្ងៃទី១២ ខែមករា ឆ្នាំ២០២១។ លទ្ធផលធ្វើតេស្តវត្ថុសំណាករបស់កុមារាខាងលើនេះ ផ្តល់ដោយវិទ្យាស្ថានប៉ាស្ទ័រកម្ពុជា គឺវិជ្ជមានវីរុសកូវីដ១៩ ហើយបច្ចុប្បន្ន អ្នកជំងឺ ត្រូវបានដាក់ឲ្យសម្រាកព្យាបាលនៅមជ្ឈមណ្ឌលជាតិកំចាត់រោគរបេង និងហង់សិន រាជធានីភ្នំពេញ។
ក្រសួងសុខាភិបាល ក៏បានប្រកាសពីករណីវិជ្ជមានវីរុសកូវីដ១៩ ម្នាក់ទៀត ដែលជាពលករខ្មែរ ធ្វើដំណើរមកពីប្រទេសថៃ។ នោះគឺស្ត្រីជនជាតិខ្មែរ អាយុ ៣១ឆ្នាំ មានអាសយដ្ឋាន ស្នាក់នៅភូមិគោរដ្ឋាន សង្កាត់អូរអំបិល ក្រុងសិរីសោភ័ណ្ឌ ខេត្តបន្ទាយមានជ័យ បានធ្វើដំណើរមកពីប្រទេសថៃ មកដល់កម្ពុជា នៅថ្ងៃទី១៥ ខែមករា ឆ្នាំ២០២១។ លទ្ធផលធ្វើតេស្តវត្ថុសំណាក លើកទី២ របស់ស្ត្រីរូបនេះ ផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺវិជ្ជមានវីរុសកូវីដ១៩ ហើយបច្ចុប្បន្ន អ្នកជំងឺត្រូវបានដាក់ឲ្យសម្រាកព្យាបាល នៅមន្ទីរពេទ្យបង្អែកខេត្តបន្ទាយមានជ័យ។
សេចក្តីប្រកាសបន្តថា គិតត្រឹមម៉ោង ៧ព្រឹក ថ្ងៃទី១៩ ខែមករា ឆ្នាំ២០២១ នេះ នៅទូទាំងប្រទេស រកឃើញអ្នកឆ្លងជំងឺកូវីដ១៩ សរុបចំនួន ៤៤១នាក់ ( អ្នកដំណើរចូលកម្ពុជា និងអ្នកឆ្លងបន្តនៅក្នុងប្រទេស ៣៧១នាក់ និងពលករធ្វើដំណើរមកពីប្រទេសថៃ ៧០នាក់ )។ ក្នុងនោះ ៣៨៦នាក់ ជាសះស្បើយ ( អ្នកដំណើរចូលកម្ពុជា និងអ្នកឆ្លងបន្តនៅក្នុងប្រទេស ជាសះស្បើយ ៣៦៤នាក់ និងពលករធ្វើដំណើរមកពីប្រទេសថៃ ជាសះស្បើយ ២២នាក់ )។ រីឯអ្នកកំពុងសម្រាកព្យាបាល មានចំនួន ៥៥នាក់ ( មជ្ឈមណ្ឌលជាតិកំចាត់រោគរបេង និងហង់សិន ៧នាក់ នៅមន្ទីរពេទ្យបង្អែក ខេត្តប៉ៃលិន ម្នាក់ នៅមន្ទីរពេទ្យបង្អែក ខេត្តបន្ទាយមានជ័យ ៣៤នាក់ មន្ទីរពេទ្យបង្អែក ខេត្តបាត់ដំបង ១១នាក់ និងមន្ទីរពេទ្យបង្អែក ខេត្តឧត្តរមានជ័យ ២នាក់ )៕
