ពិធីបុណ្យទន្លេ លើកទី៥ នៅខេត្តកំពង់ឆ្នាំង បានធ្វើឡើងក្រោមប្រធានបទ «ទន្លេ ផ្សារភ្ជាប់សន្តិភាព ប្រជាជន និងទេសចរណ៍»។
សូមបញ្ជាក់ថា ពិធីបុណ្យទន្លេ លើកទី១ បានធ្វើឡើង កាលពីឆ្នាំ២០១៥ នៅខេត្តក្រចេះ កាលពីថ្ងៃទី១៣-១៥ ខែមីនា។ លើកទី២ នៅខេត្តកំពង់ចាម ចាប់ពីថ្ងៃទី១១-១៣ ខែមីនា ឆ្នាំ២០១៦។ លើកទី៣ ចាប់ពីថ្ងៃទី២៤-២៦ ខែមីនា ឆ្នាំ២០១៧ នៅខេត្តស្ទឹងត្រែង។ លើកទី៤ ធ្វើឡើង នៅខេត្តកណ្តាល ចាប់ពីថ្ងៃទី០៩-១១ ខែមីនា ឆ្នាំ២០១៨។ និងលើកទី៥ នៅខេត្តកំពង់ឆ្នាំងចាប់ពីថ្ងៃទី១៥ ដល់ថ្ងៃទី១៧ ខែមីនា ឆ្នាំ២០១៩ ។
ពិធីបុណ្យទន្លេ គឺរម្លឹកដល់គុណទន្លេ ដែលបានផ្តល់ទឹកប្រើប្រាស់ក្នុងជីវភាពប្រចាំថ្ងៃ និងដើម្បីស្រោចស្រពផលដំណាំផង។ ក្រៅពីនេះ ពិធីបុណ្យទន្លេ ដែលបានធ្វើឡើងតាមខេត្តជាប់ដងទន្លេ ដើម្បីបង្ហាញនូវផលិតផលកសិកម្ម និងកសិឧស្សាហកម្ម ព្រមទាំងសក្តានុពលរបស់ខេត្តនីមួយៗ ផ្នែកវិស័យទេសចរណ៍ ដែលមានរមណីយដ្ឋានវប្បធម៌ប្រវត្តិសាស្ត្រ និងរមណីយដ្ឋានធម្មជាតិជាច្រើន។
ក្នុងពិធីបុណ្យទន្លេរៀងរាល់ឆ្នាំ តែងតែមានទស្សនីយភាពសិល្បៈ ការប្រគំតន្ត្រី ពិព័រណ៍កសិផល សិប្បកម្ម ប្រពៃណី ការតាំងពិព័រណ៍ម្ហូបអាហារ រួមទាំងសកម្មភាពកីឡាជាច្រើនផងដែរ៕
