កំពត ៖ មួយសប្តាហ៍មកហើយ កងទ័ពកម្ពុជា និងកងទ័ពរំដោះប្រជាជនចិនហ្វឹកហាត់រួមគ្នា លើរបៀបវីរៈជាច្រើន ក្នុងឱកាស«សមយុទ្ធនាគមាសឆ្នាំ២០១៩» នៅលើទឹកដីស្រុកជុំគិរី ខេត្តកំពត ដោយកម្លាំងយោធា នៃប្រទេសទាំងពីរ រាប់ពាន់នាក់ បានចូលរួម។
នៅថ្ងៃទី២០ ខែមីនា ឆ្នាំ២០១៩នេះ ភាគីនៃកងទ័ពទាំងពីរ កំពុងធ្វើការហ្វឹកហាត់លើរបៀបវីរៈជាច្រើនទៀតទាក់ទង និងការប្រឆាំងភេរវកម្ម និងការរំដោះចំណាប់ខ្មាំងចេញពីជុំរុំ ភេរវករ តាមរយៈសម្រូតខ្លួនពីឧទ្ធម្ភាគចក្រ ជាដើម។
គណៈកម្មការរៀបចំសមយុទ្ធនាគមាស ឆ្នាំ២០១៩ បានបញ្ជាក់ថា កងទ័ពកម្ពុជានិងចិនប្រមាណជាង២រយនាក់ កំពុងហ្វឹកហាត់យ៉ាងសកម្ម ដូច ជាជំនាញបាញ់ កាំភ្លើងត្បាល់ ហ្វឹកហាត់ តម្រង់យកម៉ែត្រចម្ងាយ និងរត់ចូលលេណដ្ឋាន (ទីតាំងប្រយុទ្ធ) បាញ់ប្រភេទកាំភ្លើងត្បាល់៦០មីលីម៉ែត្រ ៨២មីលីម៉ែត្រ និង១០០មីលីម៉ែត្រជាដើម។
សមយុទ្ធនាគមាស ឆ្នាំ២០១៩ បានកំពុងប្រព្រឹត្តទៅ រយៈពេល១៧ថ្ងៃគឺចាប់ពីថ្ងៃទី១៣ ដល់ថ្ងៃទី២៥ ខែមីនា ឆ្នាំ២០១៩ ស្ថិតនៅភូមិត្រពាំងវែង ឃុំត្រពាំងរាំង ស្រុកជុំគីរី ខេត្តកំពត។ នេះគឺជាសមយុទ្ធនាគមាសលើកទី៣ រវាងកងទ័ពប្រទេសទាំងពីរ ដែលបានធ្វើឡើងចាប់តាំងពីឆ្នាំ២០១៦មក។
របៀបវារៈជាច្រើនដែលភាគីនៃប្រទេសទាំងពីរបានយកមកហ្វឹកហាត់រួមគ្នា នាឆ្នាំនេះ មានដូចជាការស៊ើបការណ៍រកភូមិសាស្ត្រដោយយន្តហោះគ្មានមនុស្សបើក (Drone) .ការដោះ មីននិងយុទ្ធភណ្ឌមិនទាន់ផ្ទុះ, ការដោះគ្រាប់បែកគីមី និងបន្សាបជាតិគីមី. ប្រតិបត្តិការរំដោះចំណាប់ខ្មាំងដោយឧទ្ធម្ភាគចក្រ .ឧទ្ធម្ភាគចក្រ កម្ទេចជុំរុំភេរវករ ផ្នែកមនុស្សធម៌ និងជំនាញបាញ់ កាំភ្លើងធំសម្រាប់កម្ទេចភេរវករជាដើម៕
