អ្នកជំនាញអចលនទ្រព្យនៅកម្ពុជាមានសុទិដ្ឋិនិយមបានចាត់ទុកថា នៅឆ្នាំ២០១៩នេះគឺជាឆ្នាំនៃការរីកលូតលាស់ខ្លាំង នៃការទិញឬជួលអគារស្នាក់នៅ ខុនដូ មានសកម្មភាពជាធម្មតា។
លោកឧកញ៉ា ចេង ខេង ប្រធានក្រុមប្រឹក្សាភិបាលសមាគមអ្នកវាយតម្លៃអចលនទ្រព្យនិងជាអគ្គនាយកក្រុមហ៊ុន ស៊ីភីអិល បានបញ្ជាក់ថា នៅឆ្នាំ២០១៩ជាឆ្នាំមានការរីកចម្រើនទៅមុខខាងវិស័យអចលនទ្រព្យ នៃការទិញដូ លក់និងជួលនៅតែមានដំណើរការជាធម្មតា ហើយថ្មីៗនេះអ្នកវិនិយោគពីបណ្តាក្រៅប្រទេសផ្សេងៗទៀតបានចាប់អារម្មណ៍ប្រទេសកម្ពុជាបន្ថែមទៀតនៅពេលប្រទេសកម្ពុជាកំពុងតែមានការអភិវឌ្ឍន៍ជាមួយនិងសុខសន្តិភាពពេញផ្ទៃប្រទេស។
លោកឧកញ៉ាបានបន្តទៀតថា សកម្មភាពទិញ ដូរ នៅតាមជាយក្រុង និងនៅបណ្តាខេត្តមួយចំនួនកំពុងតែដំណើរជាបន្តបន្ទាប់ ជាមួយនិងការអភិវឌ្ឍធនធានមនុស្សនិងផ្តល់ទំនុកចិត្តដល់អ្នកវិនិយោគពីក្រៅប្រទេស ខណៈដែលសកម្មភាពវិនិយោគដីឡូតិ៍ បុរី និងផ្ទះល្វែង ខុនដូ កំពុងតែមានសន្ទុះខ្លាំងផងដែរ។
អ្នកជំនាញខាងលើបន្ថែមថា បច្ចុប្បន្ននេះចិនជាប្រទេសមានការវិនិយោគច្រើនជាងគេនៅកម្ពុជានិងកំពុងតែពង្រីកសក្តានុពលទិញនិងលក់របស់ខ្លួនកាន់តែខ្លាំងថែមទៀតនៅឆ្នាំ២០១៩នេះ ហើយចំណែកសមាគមអ្នកវាយតម្លៃអចលនទ្រព្យកម្ពុជាវិញក៏បានចាប់ដៃគូរជាមួយនិងសមាគមចិន ដើម្បីរួមគ្នា អភិវឌ្ឍប្រទេសកម្ពុជាបន្ថែមទៀត។
ចំណែកលោកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជាបាត់ទុកថា ឆ្នាំ២០១៩នេះ ចំពោះវិស័យអចលនទ្រព្យកំពុងតែមានតម្រូវការច្រើនដដែល ហើយអ្វីដែលកំពុងតែសាងសង់នោះមានទាំងអគារលំនៅឋាន អគារស្នាក់នៅ អគារខ្ពស់ៗ និងសំណង់អូតែល បន្តមានកំណើនជាបន្តបន្ទាប់ ដូច្នោះ រង្វង់៥ឆ្នាំទៀតវិស័យនេះនៅតែបន្តរឹងមាំ ។
លោកឧកញ៉ាបានបញ្ជាក់ទៀតថា កាលពីឆ្នាំ២០១៨ ការវិនិយោគលើវិស័យអចលនទ្រព្យនៅកម្ពុជាមានសន្ទុះលឿនក្នុងការអភិវឌ្ឍ ហើយនៅឆ្នាំ២០១៩ ជាឆ្នាំដែលល្អ សម្រាប់អ្នកវិនិយោគលើគ្រប់វិស័យនៅក្នងប្រទេសកម្ពុជាបន្ថែមទៀត។
ការបោះទុនវិនិយោគក្នុងវិស័យសំណង់ ក្នុងរយៈពេលប៉ុន្មានឆ្នាំចុងក្រោយនេះបានជំរុញដល់ការសាងសង់សំណង់អាគារខ្ពស់ៗ ជាច្រើននៅក្នុងរាជធានីភ្នំពេញ ហើយជាក់ស្ដែងក្នុងឆ្នាំ២០១៨ កន្លងទៅនេះ រាជធានីភ្នំពេញមានគម្រោងអគារខ្ពស់ៗចំនួន ១១០ គម្រោងផងដែរ។
តាមទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា ការវិនិយោគក្នុងវិស័យសំណង់ក្នុងឆ្នាំ២០១៧ កន្លងទៅ បានកើនឡើងជាង ២២ភាគរយ ដែលមានតម្លៃទឹកប្រាក់ប៉ានស្មានចំនួន ៦៤២៨ លានដុល្លារ ៕
