ភ្នំពេញ៖ លោកឧកញ៉ា ហ៊ុន តូ ក្មួយប្រុសសម្តេចតេជោហ៊ុន សែន បានបរិច្ចាគថវិកា ២ ៤១០ ០០០ ដុល្លារអាមេរិក ជូនកាកបាទក្រហមកម្ពុជា កាលពីព្រឹកថ្ងៃទី០១ ខែឧសភា ឆ្នាំ២០១៩ នៅទីស្នាក់ការកណ្តាលកាកបាទក្រហមកម្ពុជា។
ជំនួយថវិកាពីសប្បុរសជនទាំងនេះ ធ្វើឡើង ក្នុងឱកាសអបអរខួបទី១៥៦ ទិវាពិភពលោកកាកបាទក្រហម និងអឌ្ឍចន្ទក្រហម ថ្ងៃទី៨ ឧសភា ឆ្នាំ២០១៩ ខាងមុខនេះ ក្រោមប្រធានបទ «ខ្ញុំស្រឡាញ់កាកបាទក្រហមកម្ពុជា» ។
កាកបាទក្រហមកម្ពុជា បានផ្សព្វផ្សាយថា ថវិកាដែលបានទទួល កាលពីព្រឹកថ្ងៃទី០១ ខែឧសភា ឆ្នាំ២០១៩ រួមមាន៖
១/ ថវិកាចំនួន ២,៤១០,០០០ដុល្លារ (ពីរលានសែសិបមួយម៉ឺនដុល្លារអាមេរិក) ពីសប្បុរសជន/ក្រុមហ៊ុននានា ដែលដឹកនាំដោយ អ្នកឧកញ៉ា ហ៊ុន តូ អគ្គនាយកក្រុមហ៊ុន អិល អិល អាស៊ាន អ៊ិនវេសមេន។
២/ ថវិកាចំនួន ១០០.០០០ដុល្លារ (ដប់ម៉ឺនដុល្លារអាមេរិក) ពីក្រុមហ៊ុន ដុងអេ អេសធី (ភេសជ្ជៈបាកាស់) DONG-A ST (BACCHUS) ដែលដឹកនាំដោយ លោក លី ដុងហ៊ូន Lee Dong Hoon អគ្គនាយករងក្រុមហ៊ុន ដុងអេ អេសធី។
៣/ ថវិកាចំនួន ១៥០,០០០ដុល្លារ (ដប់ប្រាំម៉ឺនដុល្លារអាមេរិក) ពីក្រុមហ៊ុន អកស៍ឡី វើលដ៍ប្រ៊ីជ ខេមបូឌា OXLEY WORLDBRIDGE (CAMBODIA) CO,.LTD ដែលដឹកនាំដោយ ឧកញ៉ា សៀ ឬទ្ធី ប្រធានក្រុមប្រឹក្សាភិបាល។
សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានកោតសរសើរចំពោះទឹកចិត្តមនុស្សធម៌ ប្រកបដោយសទ្ធាជ្រះថ្លារបស់សប្បុរសជនទាំងអស់ ដែលតែងតែជឿជាក់ និងជួយឧបត្ថម្ភគាំទ្រដល់កាកបាទក្រហមកម្ពុជា ដើម្បីសមាគមជាតិមួយនេះ មានធនធានហិរញ្ញវត្ថុ សម្រាប់ធ្វើប្រតិបត្តិការមនុស្សធម៌ប្រកបដោយប្រសិទ្ធភាពខ្ពស់។
សម្តេចកិត្តិព្រឹទ្ធបណ្ឌិត បានថ្លែងអំពាវនាវដល់សប្បុរសជនជាតិ-អន្តរជាតិដទៃទៀត អញ្ជើញចូលរួមឧបត្ថម្ភគាំទ្រដល់កាកបាទក្រហមកម្ពុជា ក្នុងឱកាសទិវា ៨ ឧសភា ខាងមុខនេះ ដើម្បីឲ្យកាកបាទក្រហមកម្ពុជាអាចសម្រេច ជោគជ័យបេសកកម្មមនុស្សធម៌ក្នុងការបន្តជួយដល់ចាស់ជរាគ្មានទីពឹង កុមារកំព្រា ជនពិការ ស្ត្រីមេម៉ាយ អ្នកជំងឺរ៉ាំរ៉ៃ និងគ្រួសាររងគ្រោះដោយគ្រោះមហន្តរាយផ្សេងៗ។
សូមបញ្ជាក់ថា ទិវាកាកបាទក្រហម អឌ្ឍចន្ទក្រហម ខួបលើកទី១៥៥ ក្រោមប្រធានបទ “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” ដែលបានប្រារព្ធឡើង កាលពីថ្ងៃទី០៨ ខែឧសភា ឆ្នាំ២០១៨ កាកបាទក្រហមកម្ពុជា ទទួលបានថវិកាពីសប្បុរសជនសរុបជាង ១៨លានដុល្លារសហរដ្ឋអាមេរិក។ ក្នុងនោះ លោកឧកញ៉ា ហុង ពីវ ម្ចាស់បុរីពិភពថ្មី បានបរិច្ចាគថវិកាច្រើនជាងគេ ជូនកាកបាទក្រហមកម្ពុជា រហូតដល់ ១លាន ២សែន ៨ម៉ឺនដុល្លារអាមេរិក៕
